星期日返完教會，被老婆賣甩得小弟一支公，索性返美孚食，又喺搵茶記幫襯食晏兼嘆奶茶嘅時間，想起晌美孚新村內竄埋一角嘅金利銀輝茶餐廳，今餐醫肚就搵佢啦。
咪睇佢位置偏偏，都不知幾多街坊幫襯，而晌美孚區，感覺佢算喺幾有活力嘅茶記，首先地方光猛企理乾淨，無論貼晌門口窗外嘅乜餐物餐，抑或裡面放晌枱面嘅餐牌，俾人感覺都喺新簇醒目，唔似其他茶記嗰啲咁殘殘舊舊，沾滿咖啡或茶漬。
睇咗數款套餐，最有興趣又最啱食就喺個「假日特餐」，包咗：鮮茄薯仔排骨螺絲粉，牛油方包，再配煎蛋、火腿、餐肉、扎肉、腸仔、紅腸之中任擇兩款，連埋咖啡或茶，逢星期六及假日供應，6:00am-11:30am收$28，之後11:30am-2:30pm加少少收$33，都幾經濟實惠。
![bowl]() 鮮茄薯仔排骨螺絲粉
鮮茄薯仔排骨做湯都應該飲唔少，但用嚟撈螺絲粉著實唔錯，歸根究底都喺佢個蕃茄湯夠晒濃郁，鮮紅嘅蕃茄湯酸酸甜甜，茄味非常突出，絕對要一飲而盡，一滴湯都唔好嘥。雖然薯仔偏少，幸好排骨有三幾舊，比想像中多。
![bowl]() 牛油方包．煎蛋．餐肉
食法人人有唔同喜好，有人鍾意逐樣食，小弟就鍾意一次過夾埋番晒成份餐蛋治嚟食，難得煎蛋蛋黃仍然流漿，一口咬落真喺奇妙嘅配搭。好想知，喺邊個咁叻發明餐蛋治依個組合！
![bowl]() 奶茶
茶記餐飲守則，小弟屬死硬派一定揀奶茶，總喺只有晌茶記先飲到靚奶茶。對比起一般茶記嘅奶茶，金利銀輝嘅奶茶既香且滑，但就偏向重奶味，不過晌小弟心目中依然喺一杯出色嘅奶茶。
雖然得一支公食晏，不過花幾十蚊食到個咁別出心裁嘅假日特餐，又飲到杯咁出色嘅奶茶，實在好知足！
個人評分
味道：8/10
環境：7/10
服務：7/10
抵食：8/10
平均每人消費：HK$33
餐廳資料：
金利銀輝茶餐廳
美孚蘭秀道25-27號地下
2745 2419
=============================================
感謝 山區麵包王 提供以上資料
山區麵包王的網誌: http://garycwm.blogspot.hk/
=============================================
| 
