「麵粉貴過麵包」，相信大家都知，基本上依個道理喺唔多可能。一個麵包嘅零售價，除麵粉成本，仲要計埋燈油火蠟、人工鋪租，咁先有錢賺，盤生意先有得繼續做。依家成日聽到哩句嘢，都喺講香港啲地價，發展商買入嘅地積呎價（麵粉價），仲貴過啲同區二手樓嘅巿場呎價（麵包價）。但如果我話你知，$5兩個有餡包，唔喺迷你裝喎，喺正常大過個拳頭嗰啲喎，唔知你會唔會有種「麵粉（計埋燈油火蠟、人工鋪租）貴過麵包」嘅感覺呢！
小弟所住嘅屋苑附近間馥軒，其實晌過年前曾推出過一輪「反通漲益街坊」嘅優惠，$5/兩個有餡包，$3/兩個無餡包，日日唔同，有時推出喺有餡包，有時就無餡嘅，總之日日一款，賣完即止。初時諗住過年前益街坊高興吓，當做吓宣傳，其後亦停咗一輪。後尾又有番，仲做到依家添。佢哋會兩個兩個咁一袋袋，袋好晒放近門口位，方便啲客買完返工返學。
小弟慣於晌屋企煮早餐食，偶有唔煮時，會留意吓仲有無得買，據店員講，由於每日只出一、兩盤，早上出一次，正午又出一次，絕對唔喺隔夜賣剩貨，賣完就無，頗搶手，所以唔喺次次經過見到都有。雖然唔識馥軒個老細，唔知佢實際為人喺點，不過，按依次推廣多少認同佢對街坊嘅良心。題外話，其他馥軒有無咁嘅舉措就要問問先知，因為佢張宣傳單張只註明「盈暉臺」依間！
![bowl]() 吞拿魚包．火腿蛋包 $5 / 兩個
正價本身賣成$4.5 / $5一個，都喺市面合理嘅定價，不過依家$5就有兩個，真喺當買一送一咁滯，仲要無將貨就價喎。唔敢講話一定喺全港最平，但相信平得過哩個價嘅都唔會多，除非收鋪清貨嗰啲。
![bowl]() 吞拿魚包
馥軒啲麵包本身都OK架，外觀唔跩，烘焗得金黃，包心稠密，質感軟軟熟熟，同埋你見佢中間有成大大舊吞拿魚肉餡，足晒料架！
![bowl]() 火腿蛋包
包內一片火腿、一片蛋，仲伸晒出個包外，食落片火腿唔喺啲劣品貨式，所以，實實際際無欺場。
![bowl]() 自家沖少檸檸茶
一大清早，唔想飲得太酸，自家沖咗杯少檸檸茶配兩個包。身為曼聯躉嘅小弟，當然用上心愛嘅傑斯仔茶杯啦，仲要喺著緊99年三冠王件球衫；噚晚魚生粥緊緊熟贏雷丁1:0，拋離次席曼城15之多，餘下剩番9場波，湊夠13分就攞到第20座聯賽冠軍，希望佢哋醒醒定定，唔好重蹈舊年覆轍啦！
個人評分
味道：6/10
環境：7/10
服務：8/10
抵食：10/10
平均每人消費：HK$5
餐廳資料：
馥軒 Empery Bakery
美孚景荔徑8號盈暉家居城地下03號鋪
2785 6388
=============================================
感謝 山區麵包王 提供以上資料
山區麵包王的網誌: http://garycwm.blogspot.hk/
=============================================
| 
