抱歉,發生點錯誤。
重新載入
美心西餅 Maxim's Cake Shop:共享共嚐聖誕新系列
山區麵包王
2013-12-15
1348
0
分享
收藏
我哋一班美孚街坊老死,趁天氣有番咁上下凍,聚一聚打個鞭爐當喺迎冬至,查實就純粹食番餐,順便賀一賀12月份3位生日之星。既然賀生日,又點可以無個蛋糕呢?咁啱美心又推出咗聖誕派對蛋糕新系列,早前就收到兩張換領卡,一於趁機與大家共享共嚐,等多啲人感受依款新系列嘅滋味。
今次美心聖誕蛋糕分咗3個系列,分別喺「Hello Kitty聖誕Party」、「法國頂級朱古力Cacao Barry」及「聖誕禮遇」。

Hello Kitty聖誕Party系列就最多選擇,早於11月已登場嘅Hello Kitty X Maxim’s Cakes Party系列,當中嘅「Hello Kitty摩天輪Cupcake套裝」($298)及「開心Hello Kitty」($168)都會推出聖誕特別版,而再新加入就有「Hello Kitty聖誕樹」($158)和「Hello Kitty聖誕老人村」($398兩磅),全部造型可愛,部份加入DIY元素,令小朋友更喜愛,配合不同份量,可按派對人數多寡再決定買邊個。
bowlHello Kitty聖誕樹 $158
淨喺個蛋糕盒都可愛到不得了,印晒滿滿嘅吉蒂圖案,不怪乎蛋糕食完屋主老友都想要番個盒。仲有,佢早前去完台灣,啱啱就賣咗支Hello Kitty櫻花酒返嚟,跟個蛋糕,真喺襯到絕喎。「聖誕樹」顧名思義就要似樖樹,圓錐形身披粉紅外衣嘅士多啤梨慕絲蛋糕樹,一眼望埋去好寡,皆因要你與摯友動手一起DIY將7塊唔同圖案嘅白朱古力牌仔及幻彩星星碎糖,擺晌個蛋糕樹之上,所以,個蛋糕可謂食得又玩得。蛋糕之內,喺一層鬆軟回彈力強嘅海綿蛋糕夾一層酸香柔滑嘅士多啤梨慕絲,層層疊疊,各有4層相間,如能晌慕絲中加啲士多啤梨果肉,味道及效果相信更加相得益彰。
 裝飾前 
 裝飾後
至於法國頂級朱古力Cacao Barry系列,則有兩個選擇:「Baileys朱古力慕絲蛋糕」($188)及「迷你特濃朱古力脆脆」($118)。兩者均以法國殿堂級朱古力Cacao Barry製造,前者加入Baileys愛爾蘭甜酒所做嘅慕絲,後者配上法國傳統蛋白杏仁蛋糕,可謂各有特色。
bowlBaileys朱古力慕絲蛋糕 $188
屋主老友整支「Hello Kitty櫻花酒」嚟襯個「Hello Kitty聖誕樹蛋糕」,小弟都唔弱,晌家中拎咗支Baileys愛爾蘭甜酒過嚟襯番個「Baileys朱古力慕絲蛋糕」,仲要喺心愛嘅焦糖味,哈哈。講番個蛋糕,半球形閃爧爧嘅朱古力慕絲蛋糕,雖然裝飾欠奉,但俾人印象喺華麗高貴。由下而上,有朱古力脆珠、Cacao Barry 60%朱古力慕絲、白朱古力慕絲、特濃朱古力海棉蛋糕、朱古力Baileys愛爾蘭甜酒慕絲及面層薄薄嘅特濃朱古力漿。3層慕絲味道各異,入口細滑香膩,朱古力味濃郁,真喺要細味慢慢嗒真一啲。再者,配合埋脆珠及特濃朱古力海棉蛋糕,令整體味道及口感都有著層次多變。
「聖誕禮遇」喺個重達8磅兩層高嘅大型3D立體「開心雪人」朱古力蛋糕,同樣以法國頂級朱古力Cacao Barry製作,絕對味道濃郁,如此份量適合20人以上分享。原價要$1,680,5個工作天前透過訂購熱線,仲可享美心聖誕禮遇價$980,供應期有限。
最後,好開心跟一班老友歡聚,再次多謝屋主款待!

個人評分
味道:8/10
環境:7/10
服務:8/10
抵食:8/10
平均每人消費:HK$0(試食邀請)

餐廳資料:
美心西餅 Maxim's Cake Shop
美孚美孚新邨萬事達商場地下 N75 號舖
2959 0936


=============================================

感謝 山區麵包王 提供以上資料

山區麵包王的網誌: http://garycwm.blogspot.hk/


=============================================

~END~
商店 美心西餅 (美孚新邨萬事達商場店)