正所謂小病是福，個人捱得多都總會病下，依個星期啲氣管病又復發，真真正正嘅「條氣唔順」，道氣有啲扯住扯住，猛咁咳，成個人胃口都喺差啲，食粥就成為小弟病親嘅餐膳首選！晌美孚區，專賣粥嘅店舖唔多，一喺海皇，一喺就味味佳，以前仲有間好滿粥（我幾鍾意架，可惜摺咗），所以，睇完醬生晏晝就幫襯海皇，夜晚就搵味味佳。
海皇唔使多介紹啦，本港粥品連鎖專門店，其實時有幫襯海皇，不過寫佢食評就少啲，因為多數食佢都喺貪方便求其叫碗粥，加碟炸兩、炒麵之類，真喺無咩好寫。今次想寫，一來今次食個粥幾掂，二來跟味味佳有比較，可以有多啲嘢寫吓。咁喺個咩粥？就喺自選三併粥！
![bowl]() 自選三併粥 $25
所謂「三併」，可以晌鯇魚片、皮蛋、碎牛、瘦肉絲、豬紅、羅漢齋、豬肉丸中任揀3款，小弟揀咗鯇魚片、瘦肉絲、豬肉丸，粥面仲會放有幾片油炸鬼同少少花生粒。個人覺得海皇啲粥一晌水準穩定，夠綿夠滑，今次亦無例外；此外，撈兩撈發覺都幾足料，鯇魚片、瘦肉絲落得唔少，不過細細粒嘅豬肉丸就只得兩粒，幸而幾款料都唔錯，鯇魚片幾鮮味，瘦肉絲帶點鹹味，豬肉丸亦挺爽彈，加上碗粥夠大碗，一碗粥頂一餐，都OK啦。食完粥，食啲葯，葯力好快發作，需要瞓陣先！
所以，有時都唔好話連鎖店啲嘢差，佢哋勝在夠專注，質素平穩。
個人評分
味道：8/10
環境：7/10
服務：7/10
抵食：9/10
平均每人消費：HK$25
餐廳資料：
海皇粥店 Ocean Empire Food Shop
美孚美孚新村蘭秀道28B地下43號舖
2307 6184
=============================================
感謝 山區麵包王 提供以上資料
山區麵包王的網誌: http://garycwm.blogspot.hk/
=============================================
| 
