同事得到張冰皮禮券，就換咗一個冰皮二人世界跟其他同事分享，講開冰皮，小弟又幾鍾意食，雖然跟傳統月餅好不一樣，似甜點多啲，但貪佢冰涼、少甜、唔油膩，兼且味道多變。上網八過吓美心嘅冰皮，佢哋都推出咗好多款禮盒裝，如冰皮七星伴明月、甜品美宴……，一盒裡邊包含咗多款唔同口味。講到款多，散裝嘅「冰皮二人世界」（即一包兩個），就真喺超多，一共有成33款，特色到不得了，楊枝甘露、芒果栗子、魔鬼脆脆、士多啤梨脆脆、心太軟、特濃朱古力石板街、朱古力榛子咖啡、夏威夷果仁朱古力、芝麻花生、藍莓芝士、曲奇妙趣、紅豆甘栗、榴槤王、夏威夷果仁班蘭、藍莓二重奏、粉红番石榴杏脯……等等，個個60g重，日日試一款都要成個月呀！之前晌Openrice「開飯搶鮮試！水果月餅大比拼」嘅試食活動中，曾試過佢嘅「粉紅番石榴杏脯」冰皮，當其時覺得中規中矩，可能拎出嚟攤嘅時間耐咁，冰皮有啲黏，而餡料又確實太少，食到番石榴味而食唔出杏脯味。

冰皮系列，成33款口味，真厲害！（圖中為大部份口味）

宇治金時冰皮月餅
今次所試嘅喺「宇治金時」，加入抹茶所做嘅冰皮，攤嘅時間啱啱好，黏糯度適中，入口軟綿帶點煙韌，而且朕朕綠茶香，又薄身冰涼，做人就唔好涼薄，但作為冰皮夠涼薄先好食。餅餡晌一片白豆蓉正中，藏身一大舊蕃薯泥，好有蕃薯香，只恨佢紅豆下得太手緊喇，得嗰幾粒！

另一款試到嘅美心月餅喺奶黃月餅，老婆嘅同事醒俾佢嘅，所以只有一個咋，美心本身出依隻尊貴奶黃月餅只有一款禮盒裝，一盒8個，每個約45克，嬌小精緻。按指示以微波爐翻熱8秒，餅身已微暖，切開後有啲搞笑，奶黃餡跟餅皮喺完全分離，小弟都喺第一次見有咁嘅情況，雖然基本上唔影響食味，但外觀方面點都被扣少少分啦；講番件月餅，餅皮挺鬆化，做人嘅嘢有時要學識睇化，唔喺盞俾自己好多唔開心，作為餅皮亦都要識「體化」，不過喺指體質鬆化；而奶黃餡頗算唔上滑溜，但又真喺啖啖留香，少甜就更令人討好，尤其依個成日講健康嘅年代，不過查實奶黃餡又雞蛋、又鹹蛋黃、又椰奶……等等，都稱唔得上健康食物呢！都喺嗰句，應吓節，少食無妨囉。

晌度藉此多謝同事、老婆同事嘅慷慨，又讓小弟食到唔同品牌、唔同口味嘅月餅！

個人評分

味道：8/10
環境：6/10
服務：7/10
抵食：8/10
平均每人消費：HK$0（禮物）

餐廳資料：
美心西餅 Maxim's Cake Shop
美孚美孚新邨萬事達商場地下 N75 號舖
29590936