星期六唔使返工真喺寫意咗好多，閒時就會買啲糕餅返屋企當下午茶，朝早買完餸路經港鐵嘅東海堂，有幾款大件裝嘅蛋糕唔喺貴，都想試吓，本來先睇中個沖繩黑糖卷，但又見個合桃蛋白拿破崙幾唔錯，心多嘅小弟一於兩款都買晒，最多當埋第二朝早餐。最終，仲買多件凍餅，因為老婆對意大利芝士餅都感興趣，結果造就今日依個「意法日」嘅下午茶。
![bowl]() 意大利之丘 $11
「XX之丘」系列有好多款式，包括芒果、意大利芝士、曲奇妙趣同黑森林，唔好睇佢好似一件普普通通嘅凍餅，其實細心睇，大玩層次，都幾多手功，如果整個餅嘅人就知，咁搞未必喺難，但就繁複啲。由下天上，朱古力海綿蛋糕底、朱古力慕絲、清海綿蛋糕（留心，唔喺一件過，喺3小件，仲要滲咗整提拉米蘇必有嘅成份咖啡酒）、意大利馬卡風芝士，最後糝埋唂咕粉，先至完成一件「意大利之丘」，咁至賣$11，真喺食手功都抵番啦。東海堂啲蛋糕一向都水準穩定，基本嘅如蛋糕鬆軟、慕絲柔滑，同樣發生晌意大利之丘身上，此外淡淡嘅馬卡風芝士加上濃郁嘅唂咕，喺提拉米蘇嘅永恆標記。
![bowl]() 合桃蛋白拿破崙 $20
拿破崙喺法式甜點嘅經典，正名應該叫法式千層酥（法語：Mille-feuille），幾層酥皮夾啲吉士之類，但依家拿破崙嘅做法層出不窮，名稱都創意無限。喺東海堂遇上依件「合桃蛋白拿破崙」，跟用酥皮做嘅完全喺兩回事，屬老一輩做法，無千層酥皮，以上下兩層海綿蛋糕，夾住中間一朕忌廉合桃，面面撤上蛋白脆，再糝啲糖霜就大功告成。忌廉落得唔太多，令到食起嚟有啲濕潤同柔滑感，但又唔太甜唔太漏，最正喺勁多合桃！
![bowl]() 沖繩黑糖卷 $20
黑糖唔多講都知喺日本沖繩名物，最後分享嘅「沖繩黑糖卷」，賣點就喺個沖繩黑糖。件卷蛋外表、做法都無咩特別嘢，一切還原基本，但卷蛋入口，細心嗒，朕朕獨特嘅黑糖味隨隨滲出，中間嘅黑糖忌廉亦唔太多，薄薄一層點到即止，老婆就話好啱佢。
今個下午茶好充實，有時候唔一定去酒店、大餐廳嘆高茶，有時間晌晏晝停一停，買件卷蛋，買件凍餅，加杯茶，生活一樣可以變得悠閒，心境可以大於環境。
個人評分
味道：8/10
環境：7/10
服務：7/10
抵食：4/10
平均每人消費：HK$15
餐廳資料：
東海堂 Arome Bakery
美孚港鐵美孚站8號舖
2742 6811
=============================================
感謝 山區麵包王 提供以上資料
山區麵包王的網誌: http://garycwm.blogspot.hk/
=============================================
| 
