康樂及文化事務署轄下都有幾多特色嘅公園，小弟所住嘅美孚，附近嘅荔枝角公園內就有個「嶺南之風」，古雅盎然；早前同細胞小組去過上環嘅中山紀念公園，大大幅草地，悠然開朗；今回則嚟咗黃大仙山上嘅蒲崗村道公園，特點喺有個頗大嘅單車公園，細路仔可以晌單車場兜吓圈，大人就可以晌架空單車徑度踩，各得其所，唔使入到新界咁遠，都喺多得住晌同區老友Chris引路，先知九龍有此「景點」。一大班人玩完就梗喺要搵食，由公園行無耐，10-15分鐘左右，就去到慈雲山中心，嗰度大把選擇。
有茶記、西餐廳、日本嘢、快餐店、潮州鹵水、中菜、越式湯粉……等等，老友Chris推介嚟薩莉亞食意大利嘢，因為平靚正！薩莉亞意式餐廳個名都聽過，依間日本過江龍晌香港依家都有成9間店，小弟經常出沒嘅荃灣區都有，只喺唔多就腳一直無試過，既然今晚Chris兄介紹，當然不假思索就喺食佢啦，最鍾意有人提議食乜，去邊度食，唔使小弟絞盡腦汁。
好彩Chris兄派個仔一早去輪籌，我哋去到門口，真喺盛況空前，「薩」得盛起，排隊等位者眾，我哋又一行大人細路成11個咁多。最後，店員問我哋前後兩張6人卡位得唔得，有得坐，當然梗得啦，唔使啲細路仔呆企。由於晌門口戙咗個全頁餐牌，分為沙律、湯、前菜、比薩、焗飯通粉、意大行粉、扒類、甜品等8大類，趁等位之時已可以盤算想食乜，此外依度話晒Chris兄主場，佢成日一家落嚟食，滿口都喺推介菜式，所以今晚依餐真喺唔使點諗，非常多謝佢呀！
店內無乜意式裝修，甚至可以講話只喺一啲基本裝修，一切從簡，簡單得天花都只喺裝啲小吊燈，普通嘅木枱加藤椅，感覺有少少快餐店嘅格局。從簡不單止室內環境，餐具一早放晌枱上，全自助。但服務算唔錯，上菜夠快，收拾夠密，侍應唔多，但真喺勤快。
![bowl]() 蒜汁燒魷魚 $23（前菜）
喺較新嘅出品，原隻魷魚以鐵板形式上枱，配以自家製蒜汁，魷魚有少許韌，但都尚算OK，蒜汁做得頗惹味。
![bowl]() 意式菠菜伴煙肉 $17（前菜）
意國嘅家常菜式，講真賣相其實有啲「肉酸」，不過味道唔錯，菠菜中帶點煙肉鹹香，仲註明用上特級初榨橄欖油，算喺咁啦。
![bowl]() 芝士焗薯角 $17（前菜）
又有煙肉，薩莉亞啲菜式幾鍾意用煙肉，還好嘅喺佢哋用嘅煙肉唔算肥，肉多過膏。依個芝士焗薯角查實幾好食，連皮嘅薯角被白汁芝士包圍住，一啖過薯角、煙肉、芝士，香濃滋味，賣$17咋，非常抵試！
![bowl]() 煙肉菠蘿比薩 $29
廿幾蚊個薄餅，去超市買個雪藏貨都唔得呀！但薩莉亞嘅吸引力就喺在於價錢，佢嘅薄餅件頭喺8吋批，比必勝客啲細批大少少。雖然個批底好一般，薄又未至於餅乾批底咁脆，厚又無話好似厚批咁麵包感，介乎兩者之間啦，但喺落料無將貨就價，煙肉菠蘿鋪滿批面，蕃茄醬、巴馬臣芝士不缺，整之豐富。
![bowl]() 地中海海鮮比薩 $35
薄餅類一共有7款，零售價$29-$35，見咁平就試埋佢最貴嘅地中海海鮮比薩。雖然賣相唔太靚，但同樣落足料無欺場，海鮮料包括蝦肉、魷魚、煙三文，加埋濃濃芝士香，就算蝦肉魷魚唔喺咩新鮮貨色，都只喺$35就有依份享受，性格比依然算高啦。
![bowl]() 肉醬焗長通粉 $27
「肉醬焗」喺一款經典而簡單嘅意菜菜式，濃濃嘅肉醬芝士頗香，長通粉亦有咬口，薩莉亞依個肉醬焗長通粉做得不俗。
![bowl]() 墨魚汁意大利粉 $29
一客墨魚汁意大利粉份量唔少，烏卒卒嘅墨汁麵似模似樣，內裡仲有好多魷魚圈、魷魚鬚，撒埋一把香草上面。雖則墨汁味唔喺超濃郁，不過，啲意粉做到煙韌有咬口，整體可算不過不失。
![bowl]() 甜蝦多利亞 $27
跟上面個芝士焗薯角差唔多，只喺薯角變蝦仁，煙肉被篩走，加個飯底，就成為白汁芝士甜蝦焗飯。個白汁芝士焗得帶些微焦香，又撤啲芝士粉增強芝士香味，撈飯好正，果然喺簡單好味嘅組合。
![bowl]() 野菌忌廉意大利飯 $27
全店唯一一款意大利飯，對此飯抱有期望，但亦喺今晚較為失望嘅一款主菜式。雖然話配黃薑飯，較健康，但飯粒太濕漉又無咬口，口感似湯飯，再者野菌香味亦稍為弱，所以未達期望中嘅效果。
除食嘢底，飲嘢喪抵，自助飲品吧，大人收$12/位，3-12歲小朋友只收$8/位，有百事可樂、七喜、橙汁、雀巢檸茶、咖啡、紅茶、美祿，無限添飲，晌餐廳飲一杯都唔止依個價啦。唔飲嘢咁又點，冷熱水都喺晌自助飲品吧度自取，而埋單時侍應會問你有幾多人享用咗「自助飲品吧」，完全講過信字，平成咁我估你都唔好意思仲要報細數呃人啩？
雖然碟頭份量細，但個售價咁平，叫多幾款都唔覺大問題，仲可以試多啲嘢添！總之啲細路食得開心，我哋班大人又試得過癮，成件事就喺咁簡單！題外話，睇完上面啲相，唔知大家有無留意，餐牌中嘅相所用嘅器皿，跟實際出菜時嘅器皿喺一式一樣，咁多款菜式都全中，相信喺晌管理中嘅要求，你話如果連賣相都做到一模一樣，感覺喺變得何其有趣呢！
個人評分
味道：6/10
環境：6/10
服務：7/10
抵食：10/10
平均每人消費：HK$50
餐廳資料：
薩莉亞意式餐廳 Saizeriya Italian Restaurant
慈雲山毓華街23號慈雲山中心6樓611-614號舖
3421 1670
=============================================
感謝 山區麵包王 提供以上資料
山區麵包王的網誌: http://garycwm.blogspot.hk/
=============================================
| 
