記憶中依次已經喺第5次嚟幫襯八喜，不過對上4次都喺去灣仔店，而黃大仙店就首次光顧。諗住都喺集團式經營，分店間嘅水準應該差唔多，試過之後，似乎黃大仙店就差啲啲，好似幾款例叫嘅點心：灌湯小籠包、八喜招牌春卷、台南胡椒餅、肉燥蒸芋粿，除咗個小籠包仍然喺高水準之作外，其餘3款感覺水準下滑咗啲，例如個蒸芋粿，味道保持到，依然惹味，但質感有啲散。所以，又再次證明，分店不同，好唔好食，還看大廚手勢此真理。
因為之前都寫過咁多次八喜嘅食評，所以今次唔打算寫得太詳細喇，只想重點咁寫幾樣嘢。先講服務，落單時已吩咐先上點心，其他嘅等叫才上，唔使個次序咁亂，好多時啲食肆都做得好一般，不過八喜依方面做得幾好，井然有序。另外招呼都好妥貼，雖然喺星期日晚，既無分時段，又無時限，但依間分店又幾多人幫襯，高峰時段真喺坐到爆喎。
![]()
|
|
環境幾雅緻，但坐滿時候就幾逼！
|
![]()
|
|
依邊喺近正門入口位
|
![bowl]() 金瓜川味牛 $65
之前晌灣仔店食過覺得好食，所以介紹俾屋企人試。唔太辣，少少麻，牛腩牛筋好腍，只可惜喺個南瓜未腍透，感覺若有所失。
![bowl]() 米湯魚腐翡翠苗 $48
清淡菜式，因為上面個川味牛幾重口味，所以就揀個清淡蔬菜嚟平均一下。魚腐幾軟滑，有魚味，而翡翠苗清蔥翠綠，咬落爽爽哋。依個菜唔叫得好好食，但濃味以後來個清淡，感覺輕鬆啲。
![bowl]() 宜蘭茶壺老酒雞 $128
需要預訂，賣相幾雅緻，真喺用個大茶壺盛載。其實主要飲個老酒雞湯，雞湯濃香，藥味唔重，酒味亦唔會太濃。侍應會先以小杯斟出，等各人嚐一下老酒雞湯個味，跟手再將啲湯料撈起上碟，原來真喺幾多料，有半隻雞、紅棗，黑棗，糯米，當歸，瘦肉……等等，而啲雞湯前前後後都可以沖到好多杯。
由於覺得佢啲台式點心幾得，所以點心點多啲，主菜就只喺叫咗3款。最後輪到甜品時間，因為一早訂了半打壽包，賀一賀舅仔、姨仔生日，所以甜品即場只叫兩款。壽包晌餐牌無，可以臨時叫，都喺$24半打，不過預訂穩陣啲，其實好抵食，白蓮蓉餡，包身鬆軟又唔太甜。想晌度切餅慶祝，如帶集團同系嘅美心、東海堂就唔收切餅費，否則要收成舊水，唔划算囉。
![bowl]() 奶層咖啡糕 $14
一客有3件，堂食價只喺賣$14，我就覺得幾抵。個咖啡糕其實喺一層咖啡啫喱夾一層咖啡奶凍，層層相間咁，咖啡味挺足，都幾好食！
![bowl]() 豆沙鍋餅 $20
一客切開有成8小件，為起兩個零一件，豆沙香甜，外層香脆，既可一齊分享，又喺抵食嘅甜品。
其他雜費依度都收得平啲，茶位$6，又唔收泡菜，白飯$10碗都比灣仔店平兩蚊雞，嗰邊茶位要$8架，仲要收泡菜錢$12一小碗添。今餐食咁多嘢都唔使五佰，但非常之飽呀！
個人評分
味道：6/10
環境：7/10
服務：8/10
抵食：9/10
平均每人消費：HK$100
餐廳資料：
八喜 8 Happiness
黃大仙正德街104號黃大仙中心地下G4A舖
2326 8168
=============================================
感謝 山區麵包王 提供以上資料
山區麵包王的網誌: http://garycwm.blogspot.hk/
=============================================
| 
