事隔3年，環境都無乜點變，食物類別都大同小異，但似乎款式多咗，不過啲點菜紙就靚咗好多，色彩鮮艷，有圖有相，並加埋數字同顏色嚟區分，12張點菜紙，No.1-12，類別由日式小食、汽水啤酒、刺身料理、台式料理、東瀛燒物、日式揚物、粉 / 麵 / 飯類、港日式料理、新菜推介、壽司 / 手卷、火鍋料理到精美潮流甜品，應有盡有，食物超過180款。以今晚星期六晚5:30-6:00pm入座計，成人都喺收$159+10%（我哋人多餐廳免咗），任飲任食兩小時，其實都抵架，當然，今晚我哋又喺俾緊教會價啦$100，哈哈！其實見佢周不時晌飲食雜誌賣廣告，有心剪埋低啲優惠券，就仲可以慳多少少。

教會人多勢眾，依類聚餐一向都自由組合，既然有時限，快快手搵齊幾個相熟老友，圍埋一枱6個人就密密點，準備喪食。因為12張點菜紙有12個類別，除汽水嘢飲外，為免重複點到亂晒，大家分頭行事負責點唔同食物，唔使問邊個啱唔啱食，喜歡食啲咩，總之隨個人喜好樣樣點少少一齊分享，啲嘢總有人啱食嘅，況且，有我包底嘛。

日式小食

6款日式小食點咗其中3款：蟹籽肉鬆沙律、中華沙律、味咐螺肉，最鍾意喺碟碟都的的骰骰，試到個味就夠喇。個蟹籽肉鬆沙律真喺有落肉鬆架，此外仲有青瓜絲同蟹柳絲，沙律用嚟開開胃嘅，酸酸咪咪就可以啦！而個味咐螺肉較濃味，螺肉軟軟腍腍，喺最驚遇上「擦膠」螺肉啫。

啤酒 / 汽水 / 熱飲

小弟今晚試飲咗兩款嘢：玫瑰洛神花梳打和凍青蘋果綠茶，以前者好飲啲，洛神花梳打酸酸甜甜，不過玫瑰味似乎欠奉。

刺身料理

刺身點都喺屬於貴價少少嘢，亦喺同枱較多人有興趣嘅和食，所以，先後點咗3碟，離不開三文魚、甜蝦、八爪魚、墨魚片、鮑魚片、馬刀貝、鯛魚、榮螺片等等。雖然唔喺咩高質素，但食起嚟都唔差，感覺算鮮味，至少唔會古古怪怪，又或有咩異味。

台式料理

台式料理點菜紙一共有9款食物，不過，有啲唔多似台式喎。不過，都唔理台式唔台式，啱食就喺合適。台北路邊田螺、馬拉盞炒時蔬兩款都喺惹味菜，尤其前者，都好耐無食田螺喇，而且啲螺都幾大隻！

東瀛燒物

可能大家都鍾意食香口嘢，所以燒物同揚物都點得比較多，就好似東瀛燒物類，剔吓剔吓就10款中揀咗7款，包括：鹽燒秋刀魚、鹽燒鯖花魚、炭燒雞肉串、汁燒雞腎串、機燒凡立貝串（唔喺磯燒，喺「機」燒，唔通搵機燒）、鹽燒雞中翼及和風燒薄餅。燒秋刀、燒鯖花麻麻哋，汁燒雞腎反而幾好食，而凡立貝串最有睇頭，一串兩大粒帶子，最普通喺個和風燒薄餅，流流哋。

日式揚物

我哋點咗好多海老天婦羅（炸蝦），亦點咗一大籃蕃薯、南瓜天婦羅，以及軟殼蟹天婦羅，粉漿稍微有啲厚，不過，點幾多俾幾多，無縮水俾少啲，算喺咁啦！蕃薯、南瓜天婦羅幾好食，夠粉香。

粉 / 麵 / 飯類

飽肚嘢盡可能都唔點，不過，有朋友想試鮑魚雞絲粥及滋味水蟹粥，覺得喺粉麵飯類中，依兩款似喺貴嘢。咁老實講，兩碗粥又真喺有鮑魚雞絲同蟹鉗，已經可以話喺好意外，無欺場啦。粥底算夠綿，味道不俗，相信朋友滿意收貨！

港日式料理

估唔到，我哋晌港日式料理堆中，亦點得唔少嘢，12款嘢揀咗6款，一半一半咁啦。清酒骨湯煮大蜆、咖喱炒青口、黑椒薯仔和牛粒、田園什菜炒野菌、魚籽醬炸青蠔、一口炸豆腐，以後兩者最深印象，尤其個魚籽醬炸青蠔，其實喺青口嚟，唔喺蠔，不過酥炸後加少少沙律醬同黑魚籽醬，鹹鹹鮮鮮效果唔錯，而一口炸豆腐上次都有試，外皮炸得甘脆入口熱呼呼，裡面保持滑嫩，所以確喺好食呢！

新菜推介

除咗個汁燒墨魚鬚串唔覺有咩特別外，其他5款都點齊一試，包括香芒醬爆珠沙律、黑魚籽三文脆餅、關東銀蘿酥、日式胡麻牛舌、香茅串串雞腿。個爆珠沙律其實無咩特別，只喺用咗大大粒人造香芒醬爆珠，反而黑魚籽三文脆餅及日式胡麻牛舌帶嚟驚喜，前者三文魚刴蓉加入黑魚籽放晌加拿餅，鹹鮮脆，配拾幾好；而牛舌厚切粒粒食落煙煙韌，配胡麻汁，麻香好食，又用雞尾酒杯盛載，賣相別緻。

壽司 / 手卷

壽司、手卷喺另一類飽肚之物，所以，就算有成十多款選擇，我哋都只喺點其中兩款過吓口癮，三文魚壽司、鮑魚片壽司，不過不失，壽司飯亦唔會太鬆散，三文魚、鮑魚片都幾鮮甜。其實依家睇番，有幾款都仲可以不妨點嚟試試，如燒芝士牛肉反卷、芝士吉列蝦反卷。

火鍋料理

記得上一次點過火鍋料理，即喺涮涮鍋，比較花時間搞，雖然有成30多款配料，不過都喺無謂費時失事，所以火鍋料理喺今晚唯一無試嘅類別！

精美潮流甜品
甜品肯定比上次嚟多咗好多，一大張甜品紙共有14款甜品，真喺比一般日式放題勁多。以小弟咁多心又鍾意食甜品，無可能唔叫齊咁多樣嘢囉！唔講你可能唔信，以下張相叫齊晒咁多款甜品，其實都喺我嘅一人份，當然老婆都有黐啲嚟試，所以，同枱朋友都睇到眼傻，話我使唔使咁誇，哈哈！

14款甜品分別有果仁慕絲蛋糕、意大利芝士蛋糕、藍莓乳酪蛋糕、富良野鮮奶蛋凍、北海道牛乳布甸、楊枝甘露、益力多紅豆糕、日式泡芙、杞子桂花糕、磁燒棉花糖、雪糕糯米糍（改咗雀巢雪糕）、懷舊糖不甩、朱古力脆吐司、彩虹水果撈。其實整體份量唔算多，因為樣樣都細細件！啲蛋糕類唔錯，尤其件藍莓乳酪蛋糕；鮮奶蛋凍同牛乳布甸中規中矩；益力多紅豆糕味道幾得意，而杞子桂花糕好多子同桂花；最唔得喺楊枝甘露、彩虹水果撈，前者水汪汪，好似飲緊淡味嘅芒果汁，後者只喺求其搵啲罐頭雜果撈埋一碗。懷舊糖不甩真喺好耐無食過，而朱古力脆吐司喺烘熱嘅脆餅唧啲朱古力漿，似件過口癮嘅零食。

雖然今晚嚟食喺俾緊教會價，不過若以正價，近二百樣嘢任飲任食兩個鐘，而質素好好又未算，好差又唔喺，雖知一分錢一分貨，唔通你想蔗渣嘅價錢，想食燒鵝嘅味道咩！至於侍應或經理態度方面，我又無乜遇到其他食家所講咁唔好，或者我哋以教會名義嚟食，在佢嚟講喺大客啦，因為幫襯最早嗰輪，又一次過百多個客嘅生意咁做，所以招呼都好啲啦！

個人評分
味道：7/10
環境：7/10
服務：7/10
抵食：8/10
平均每人消費：HK$100（教會有補貼）

餐廳資料：
五月花港台日料理
荃灣德海街18號富利達中心1樓
2615 0616