新明發都唔喺第一次幫襯，久唔久逢星期日經過，都見佢有幾多客，好似今日咁真喺人多到爆。不過，晌大埔墟廣福里發跡嘅新明發，好評vs劣評認真一面倒，相反，晌荃灣依間新明發就好評vs劣評旗鼓相當，以OK喺最多人給予嘅評價，真令人疑惑佢哋究竟喺咪同一間店舖，抑或只喺同名同姓？但對比番兩者嘅鋪面、招牌、餐牌……等等，應無太大懸念嘅，荃灣店確喺幾年前衝出大埔嘅分店！
一張餐牌乜都睇晒：盅頭飯、中式點心、潮式粉麵，茶記格局，志在填飽肚快上快落嘅地方。無論揀盅頭飯、點心定粉麵，加$6有熱飲或汽水，加$8有凍飲，加$10就可以配特飲。同上次一樣，小弟要個盅頭飯加奶茶，老婆就淨要一碗粉麵就夠喇。
![bowl]() 豉椒排骨盅頭飯 $22．熱奶茶 +$6
盅頭飯只有5款選擇：豉椒排骨、鳳爪排骨、鱆魚肉餅、鹹魚肉餅、北菇滑雞，即喺幾年嚟都無變過，更難得嗰時款款賣$18，依家都只喺加$3賣到$22，仍然好街坊價。
盅頭飯不斷蒸不斷出籠，所以唔使點等。盅頭飯睇落份量細細，基本上唔太大食都應該夠，而排骨仲放滿飯面，算交足料。排骨略帶肥膏，我就覺得OK嘅，但老婆就嫌排骨肥，豉椒味就太淡口，少咗份惹味嘅感覺。而飯粒軟熟分明，淋上枱上任落嘅甜豉油，真喺豉油撈飯都覺得正。
![bowl]() 招牌四寶河 $25
四寶河大大碗，其實幾抵食，因為一碗有齊潮汕魚蛋、鮮墨魚丸、潮式魚扎及潮州魚餃，好豐富，而且各有不同味道及口感。河粉較一般廣式幼身，但依然滑溜非常，唯一喺覺得個湯頭稍淡。
因為兩口子趕時間，所以嚟食晏填肚，次次嚟都喺匆匆又一餐，講真，人多環境逼，點都唔會慢慢磨囉，難以津津樂道，只喺盅盅落肚！
個人評分
味道：7/10
環境：5/10
服務：6/10
抵食：8/10
平均每人消費：HK$27
餐廳資料：
新明發食家 Sun Ming Fat Restaurant
荃灣川龍街68號地下
2612 4882
=============================================
感謝 山區麵包王 提供以上資料
山區麵包王的網誌: http://garycwm.blogspot.hk/
=============================================
| 
