意大利菜一向喺喜歡嘅菜系之一，不過就僅限於薄餅、意粉，因為晌香港食一餐真正嘅意大利菜確喺唔平。今晚嚟到沙田麗豪酒店嘅意廊一嚐意菜，見識一下意大利菜嘅滋味。
麗豪酒店位置幾吊腳，最唔使點行嘅喺晌沙田火車站再轉巴士，問過酒店有免費穿越巴士來往沙田火車站，不過班次較疏落，索性轉馬鐵去到第一城站，再行過去，都喺10min，唔使左等右等。
意廊處於酒店地下，內裡裝修唔喺好豪華，幽幽靜靜，但就幾有情調（亦因為環境太幽暗喇，逼不得已要開閃光燈影嘢食），對住大涌橋路一邊都喺落地大玻璃窗，景觀開揚，其實出面鋪晒木板，架起晒露天位，不過今晚咁熱，都喺晌室內涼涼冷氣好。再者，啲梳化椅又幾好坐，幾舒服。
晚餐散叫當然自主啲，但亦會貴唔少，作為食意大利菜嘅入門晚餐，意廊推出咗個「特選6道菜晚餐」，原價$288 + 10%，優惠價$208，近乎7折，所以定價頗吸引。6道菜包括前菜、餐湯、意大利粉、雪芭、主菜同甜品，真喺好抵食。
![bowl]() 香煎鵝肝配意大利陳醋汁
賣相精簡，鵝肝如手掌般大細，墊有少少薯蓉。鵝肝底面兩邊都煎得香脆，咬落很粉嫩，入口即溶，口感喺頗為油膩嘅，但蘸點意大利陳醋汁，醋汁醇香，帶微酸，立時令鵝肝唔再覺太油。
![bowl]() 海鮮濃湯
經過一道輕巧嘅前菜，再嚟就喺餐湯。樣貌睇落平平無奇，但味道很濃很鮮，似喺飲落海洋鮮味，正！
![bowl]() 忌廉蟹肉露筍意大利粉
依個意大利粉喺個間場嘅小主菜，所以份量唔會好多，幾炷麵就食晒。不過味道就無得頂，蟹肉好鮮甜，加點點露筍點綴，既好睇，露筍又爽脆；而且個忌廉汁打得好有奶香，又啱啱掛晒上啲意粉度，不多不少；啲意粉煮得亦恰到好處，食落有咬口，好有水準。
![bowl]() 精選鮮果雪芭
味道無得揀，只有青檸，但作為過場清清味蕾，青檸味自然OK啦！
![bowl]() 扒龍蝦配辣蕃茄醬
卒之主角出場，主菜三揀一，分別有扒龍蝦、煎西冷扒同焗帶子龍脷柳（焗帶子龍脷卷配紅椒汁）。老婆要咗依個扒龍蝦配辣蕃茄醬，雖然只喺半隻龍蝦，但好有肉地，加上肉質好鮮甜，以扒燒處理，帶出陣陣炭火香；配以辣蕃茄醬，既辣且酸，又刺激，又醒胃，老婆好讚賞依道菜。
![bowl]() 煎特級西冷扒配辣蕃茄醬
小弟就食肉獸，所以要個煎特級西冷扒，件扒幾大件，足有8oz，好有肉味，又多肉汁，煎得好香，伴埋薯菜青豆，又喺一道滋味主菜。
![bowl]() 意式芝士餅配白酒梨
估唔到去到最尾都無馬虎，唔喺普通一件芝士餅就算，猶如一份小拼盤，有一小件芝士餅、白酒梨同雲喱拿雪糕，伴以生果粒同開心果仁碎。賣相已經好唔錯，味道一樣有水準，尤其個白酒梨，梨肉好青甜，滲出淡淡白酒香。
整餐飯感覺很好，最後嘅一杯即磨咖啡，醇香嘅咖啡味，令我仍沉醉晌求先每道菜嘅滋味當中。
個人評分
味道：9/10
環境：8/10
服務：8/10
抵食：8/10
平均每人消費：HK$185
餐廳資料：
意廊
沙田大涌橋路34-36號麗豪酒店地下
2132 1235
=============================================
感謝 山區麵包王 提供以上資料
山區麵包王的網誌: http://garycwm.blogspot.hk/
=============================================
| 
