早前因為網站搞嘅食評遊戲中獎，而同老婆嚟過聆渢咖啡廳食咗一餐超豐富嘅自助晚餐，嗰次嘅主題喺：窩心盛「燕」國際自助晚餐；估唔到事隔數月，獲uFood邀請再嚟一嚐佢哋新一個主題嘅自助晚餐：「仲夏．海鮮薈」國際自助晚餐，所以，近期真喺幾有食運。故此，再次多謝uFood及酒店嘅邀請，雖然路途有點遠，但都阻擋唔到美食嘅吸引力！
都知道依度食物嘅供應都實在好多款式，但有咗上次經驗，搵食就唔使盲摸摸，亦都可以集中啲。除咗海鮮作為今晚嘅主題，聆渢嘅甜品琳瑯滿目，上次就因為臨尾先食甜品，好多款都無咗，所以今次亦一返常態，趁早食甜品盡興咗先，哈哈！雖然喺咁，都介紹吓晌處有啲邊食先，搞到山長水遠，賣到近成五百蚊個「蒲飛」，仲要喺閒日添，都仲咁多人幫襯。
![bowl]() 海鮮
海鮮吧跟上次嚟嘅供應差唔多，計有雪花長蟹腳、大甜蝦、青口、法國翡翠螺、智利大扇貝、荷蘭藍青口共6款，只喺少咗瀨尿蝦啫。貨源供應不絕，加上無上次假日咁多人，基本都唔使點排隊。有檸檬、辣茄汁、酸汁提供埋，而且，貨源新鮮，整體唔錯。但有一點要搞清楚，自助餐嘅主題「海鮮薈」，唔喺講海鮮吧嘅海鮮，喺其他以海鮮入饌嘅精選菜式。
![bowl]() 波士頓大龍蝦
原隻上嘅波士頓大龍蝦，喺一人份，色澤橙紅鮮艷，內裡膏多肉爽，肉質鮮甜，加埋大大隻蟹鉗啖啖肉。雖知晌出面點一隻波士頓龍蝦幾唔平，一個人食一隻實在有點奢侈嘅感覺，不過卻喺件超滿足嘅樂事！
![bowl]() 熱湯．麵包籃．芝士盤
晌海鮮吧跟前，就喺熱湯所在地，分別按慣例有中湯西餐（老火湯、忌廉湯），較上次嘅即打蘑菇忌廉湯，算不上好吸引。而麵包籃及芝士盤就正正晌熱湯對面，芝士種類不少，有啲仲切好晒一片片，方便食客，不過無搵蓋冚住就唔喺太好。
![bowl]() 冷盤．沙律
小弟覺得依兩類又喺聆渢嘅強項，因為一大張長枱擺盡多款冷盤，以及沙律吧材料，另一邊又有7款調製好嘅沙律，可以咁講，淨食冷盤沙律都夠你飽呀。心水選擇有燒牛肉、凍切肉腸、煙三文……等等。
![bowl]() 刺身．卷物
雖然無壽司，但刺身種類多，一共有7款刺身：八爪魚、北寄貝、油甘、吞拿、甜蝦、鯛魚、三文，實在好吸引，好刺身之人就實可以滿載而歸喇；另外仲有三幾款卷物，可能始終喺易飽肚嘢，眼見拎嘅人唔多。刺身全放晌雪櫃保鮮，要幾多先至切幾多，所以算得頗為新鮮。
![bowl]() 熱盤
室內嘅熱盤類供應唔算好多，大概十來款，不過有啲都幾特別，就好似杏仁提子乾紅花飯、水蜜桃煎龍脷柳、泰式醬爆一字骨……，竟然仲有海南雞喎。跟上次一樣，因為晌度實在太多選擇，所以，熱盤類又再一次放棄咗。
![bowl]() 戶外即煮食物區
熱盤放棄唔會覺得太可惜，因為戶外啲嘢仲精彩，鐵板燒，炭燒香腸、牛扒、羊架，又有明爐燒琵琶鴨（上次仲有燒乳豬添），燒雞翼，烤西冷、羊脾、火雞胸，仲有燒粟米、香蕉同菠蘿，火光熊熊，炭火香十足。唔使辛苦，就有燒烤美食，仲要晌入面涼住冷氣慢慢嘆，幾爽呢！此外，幾款主題食物，亦在此中尋，如煎蘿蔔帶子餅、香草煎蝦串、黑魚子蒸蝦餃；而自助餐常見嘅粉麵檔亦有，不過以泰式湯河為主打，所以醬汁香料特別多。食友拎嚟一碟黑魚子蒸蝦餃齊齊共享，好窩心，雖然餃皮略黏牙，但蝦肉鮮爽，黑魚子帶點鹹鮮，幾特別吖。
![bowl]() 甜品拼盤
上次個食評已講過佢個甜品真喺好有亮點，成廿幾呎長嘅甜品吧，應該有成30多款甜品，室外仲有窩夫同麵包布甸（原味及朱古力味）添，而且賣相、造形絕不媽虎，所以咁嘅排場，點唔吸引死呀。因為今次食足兩大碟，加幾款散件，仲有雪糕，所以滿足感爆燈，而味道幾得，整體屬中上質素，個別款式超正。
心水嗰幾款就寫詳細啲跟大家分享（注意，甜品無名無姓，所以以下名稱由小弟推算出嚟，僅供參考）：
![bowl]() 芒果吉士批 – 上面一大片一大片新鮮芒果肉，好鮮甜，加少少開心果仁碎點綴，吉士柔滑，批底夠薄夠脆，有啲驚喜。
![bowl]() 柚子慕絲蛋糕 – 依個仲驚喜，因為橙色表層以為喺香橙，但入口柚子沖晒出嚟，慕絲做得幼滑又喺功不可沒。
![bowl]() 沙架朱古力蛋糕 – 廚師重點推介，朱古力味嘅濃郁實在超出估計。
![bowl]() 紅莓慕絲蛋糕 – 聆風所做嘅慕絲確有一手，慕絲滲出紅莓酸香，最特別中間加入一截紅莓果凍，酸得嚟令人為之一震。
![bowl]() 芒果慕絲蛋糕 – 方形細細件，下面襯上朱古力蛋糕及朱古力慕絲，令芒果味更突出。
![bowl]() 藍莓芝士餅 - 芝士味頗濃，挺實得嚟質感保持到軟滑，而且鮮藍莓果醬亦做得出色，好鮮甜。
![bowl]() 檸檬撻 - 細細件，一啖搞掂，外層撻殼鬆脆，檸檬餡酸酸甜，感覺挺清新。
![bowl]() 綠茶迷你卷 – 又喺迷你裝，一口一件，綠茶忌廉做得軟滑。
![bowl]() 芒果吉士金寶 – 以小杯裝形式呈現，的的骰骰，三者配搭都唔錯，幾有新意嘅組合。
![bowl]() Dreyer’s Manila Super Mango – 雖然有Häagen-Dazs流心法式焦糖燉蛋味，因為上次已食過，有食友誠意推薦依款超級芒果味，入口果然好似食緊菲律賓芒果乾咁濃郁芒果味，雪糕質地又夠幼滑，正。
![bowl]() 飲品吧
室內有即磨咖啡機、紅茶、檸檬，而室外又有可樂、雪碧（細樽裝）同老虎啤，任斟任食，多少隨意。今晚作戰狀態麻麻，飲杯熱檸茶解解滯。
雖然喺試食邀請，但同枱有幾位相熟食友，大家有講有笑，所以時間亦過得特別快。最後嚟張大合照，結束今晚個「仲夏．海鮮薈」，但相信回味……仍未停止！
<仲夏．海鮮薈國際自助晚餐>
供應日期：2013年4月27日至2013年6月30日
供應時間：晚上6時30分至晚上10時
價錢：星期一至四：成人港幣$468、小童港幣$288
星期五至日，公眾假期及其前夕：成人港幣$528、小童港幣$328
個人評分
味道：8/10
環境：7/10
服務：8/10
抵食：9/10
平均每人消費：HK$0（試食邀請）
餐廳資料：
聆渢咖啡廳 Cafe Lagoon
屯門青山公路1號香港黃金海岸酒店低層地下
2452 8448
=============================================
感謝 山區麵包王 提供以上資料
山區麵包王的網誌: http://garycwm.blogspot.hk/
=============================================
| 
