中午時段，餐廳照樣有提供自助午餐，價錢$158 + 10%（星期日至五供應，個別信用卡仲有85折），估唔到原來都有幾多人幫襯，問問侍應話周不時有搞啲研討會之類，所以，有時仲會爆場添！

因為此行目的唔喺嚟食自助午餐，所以，都只喺行個圈望一望，食物數量同款式跟夜晚差唔多，都喺中西湯、麵包、冷盤、海鮮、沙律、芝士盤、生果、魚生、壽司、熱盤、爐端燒、薄餅、酥炸小食、燒西冷、甜品、雪糕、自助啡茶……等等。星期日，親子吓一家平平哋嚟食番餐都唔錯，之後仲可以行過去中山公園個大草地玩添。

其實佢個a la carte散叫餐牌，都有好多選擇，由頭盤、沙律、湯類、三文治，到多款精選主菜及亞洲特色美食，以及數款甜品，不愁無啱口味嘅選擇，唯一喺無做套餐形式，散叫起嚟個價錢會貴啲，但今日試過就知絕對喺酒店級級數。

炸魚薯條 $68（Small）/ $108（Regular）

之前睇過食友嘅一篇食文，對個炸魚薯條大讚，所以，都想試吓，不過，個標價跟食友文中所標示就平咗好多，原來喺以前用上貴價嘅鱈魚，但可能未必人人願意俾二百幾蚊食個炸魚薯條，故此依家就改用另一種中價靚貨，價錢就可以相宜好多。外層炸漿薄脆甘香，又唔會有油膩感，一咬咔嚓應聲裂開，師傅嘅炸功應記一功，出奇哋魚柳入口都喺咁嫩滑。薯條亦都好鬆脆，一啖薯條，一啖沙律，互作平衡。無論炸魚，抑或薯條，蘸點他他汁，感覺輕省啲，再唔喺，隨碟嘅檸檬，就更大派用場嘞。

慢煮三文魚柳配菠菜及扁意粉 $178

家下好興慢煮菜式，尤其魚類及肉類，慢煮好處喺完全保留食材鮮味及肉汁，絕無流失。一碟有3件慢煮三文魚柳，頗大件頭，魚肉非常嫩滑，又滿滿油脂，甘香豐腴，配上三文魚子作裝飾，十分合襯。而菠菜忌廉汁做得香滑細膩，口感滑溜，沾上醬汁嘅扁意粉，既咬口，又滋味。

雖然菜式唔太花巧，但感受到師傅嘅專注同用心，如能推出套餐，相信更具吸引力啊！

個人評分
味道：8/10
環境：8/10
服務：8/10
抵食：7/10
平均每人消費：HK$0（試食邀請）

餐廳資料：
薈萃閣 ip cafe
西環干諾道西152號港島太平洋酒店
2131 5908