星期六其中一個最佳節目，莫過於早上去行吓山，親親大自然，晏晝就食個悠長下午茶餐，好好嘆吓，本應都一切安排好晒，正所謂萬事俱備，只欠東風，可惜依日唔只俾東風我，仲有橫風同橫雨，行山就泡湯，不過下午茶就照舊。因為跟一班食友獲邀嚟六國嘅大堂酒廊，試一試佢啲新出品，叫得新出品，自然帶有一份期待。
大堂酒廊位處酒店入門口左邊，高樓底，襯以柔和燈光，矮身絨面梳化椅，座位之間闊落，讓人覺得休閒恬靜。若非出面風大雨大，晌偌大嘅落地玻璃中透射點陽光，感覺相信仲好呀！
之前嚟過西餐廳Le Menu食自助餐，對六國酒店都有一點點認識，知道佢哋作風都喺務實、低調，甚少搞咩花臣嘢。大堂酒廊之前一向都有供應特選消閒套餐，下午茶及宵夜時段供應（3:00-6:00pm & 9:30-12:00mn），依家就加推打正下午茶旗號嘅「特選下午茶二人套餐」（High Tea Set），只限下午茶時段供應，以及兩款廚師推介甜品「盆栽（木糠布甸）」及「焦糖蛋白布甸」，全日供應。
![bowl]() 特選下午茶二人套餐 $168
比起外面一啲4、5星酒店所賣嘅High Tea Set，動輒喺講緊$198, $228……一位，依家六國嘅定價$168供兩位用，真喺非常實惠，大可作為親嚐吓High Tea滋味嘅入門版，當然，兩者質素總會有別。不過，比起嗰啲明星、闊太出入聚腳嘅地方，晌度你會感覺更無太多拘束，感覺更為輕鬆。
套餐以三層架擺上各款食物，跟足傳統形式，而食物都喺由樓上Le Menu製作，一啲都唔馬虎。食物方面，包括最上層嘅三文治、中層嘅鬆餅及甜點、以及下層嘅小食，每樣食物都有兩件或以上（除開面三文治），唔使左切右切，大可放心樣樣都試到，餐飲包咗兩杯，都有多款選擇。
![bowl]() 迷你三文治、開面三文治（上層）
火腿迷你三文治、芝士迷你三文治兩者都好普遍，麵包仲有啲乾。反而另外兩件嘅開面三文治，大件挾抵食，一款喺香桃煙鴨胸，另一款喺刁草三文魚，睇相就見餡料滿到幾乎跌出嚟，質素亦都唔錯喎。
![bowl]() 迷你芝士餅、迷你果撻、提子鬆餅（中層）
芝士餅做得的骰，一口一件，輕易搞掂，而且芝士味挺濃郁幼滑；果撻則為大路貨式，唔差，亦唔會有咩驚喜；至於提子鬆餅，小弟較喜愛用「士乾」（scone）嚟描述，比較少出現誤會，因為一講鬆餅，真喺有人第一時間諗起嘉頓孖寶蛋糕嗰種。不過，如晌High Tea上講鬆餅，就應該只有指士乾，因為佢喺一個代表，一個傳統。士乾烘得金黃，質感鬆鬆而挺實，店方亦跟足傳統配備士多啤梨果醬同較厚身嘅濃縮忌廉，作塗搽士乾伴食。
![bowl]() 香脆炸蝦、印度雜菜咖喱角、泰式肉丸（下層）
下層都喺啲屬脆口、濃味嘅小食，最特別喺3款小食都各配唔同醬汁，香脆炸蝦配泰式辣醬，印度雜菜咖喱角配沙律醬，泰式肉丸配香草醬。幾款小食都唔錯，尤其喺香脆炸蝦，香脆又大啖蝦肉，正。
![bowl]() 餐飲
雖則晌套餐內都列名數款指定飲品，例如咖啡、紅茶、日本綠茶、日本玄米茶……等等，但基本上都可以晌飲品餐牌內點選，因為大部份都喺價錢相若，如鮮奶咖啡、伯爵茶、蘋果茶、汽水、果汁……等等。小弟揀嚟意大利泡沫咖啡，泡沫輕柔，咖啡醇香，始終酒店水平，差唔得去邊；而老婆所揀嘅喺薄荷茶，Twinings品牌，色澤透徹，帶微微薄荷清爽，幾啱春天濕漉漉嘅日子飲，一大個銀壺上枱，可沖數杯慢慢享用！
飲品餐牌
![bowl]() 盆栽（木糠布甸） $36（套餐價$56）
木糠布甸個造型驟眼望埋去真喺成個小盆栽咁，利用「木糠」瑪利餅乾碎，再混入榛子碎，做出嚟個「泥面」真喺入型入格，加上嚟自韓國嘅朱古力「碎石」及一株露斯瑪莉襯托一下，仿真度極高。由於支露斯瑪莉喺新鮮貨，唔好就咁丟低，大可拎返去軋碎佢醃雞翼、整意粉做調味。
此外，個木糠布甸「內涵」做得都一樣認真，3層瑪利餅碎，夾2層煉奶忌廉，層層相間，瑪利餅碎多咗份榛子香，而煉奶忌廉很軟滑。一如一般嘅木糠布甸，味道依舊甜到漏，若非你喺甜魔，小弟認為一杯兩個人食就較合適。又或者俾多$20（相比散叫一杯約6折左近），多杯餐飲，配熱茶都應該會唔錯。
![bowl]() 焦糖蛋白布甸 $30（套餐價$50）
無用「法式燉蛋」依個名，皆因其「燉蛋」部份只用蛋白，可能會比常見嘅法式燉蛋少咗份蛋香，但質感更輕怡幼滑，仲有，蛋白中會見到點點雲呢嗱籽，可見味道功夫盡量做到足。至於面層所燒嘅「焦糖」，既平均，且脆薄，手功唔錯喎！同樣可以加多$20轉為套餐。
除了試咗新出嘅「特選下午茶二人套餐」及兩款特色甜品，上文都講過晌處一向都有提供啲特選消閒套餐（3:00-6:00pm & 9:30-12:00mn供應），相請不如偶遇，店家亦大方讓我哋試試數款。消閒套餐一共有20款之多，有粥飯麵、意粉，又有三文治、沙律，亦有串燒、小食……等等，款式頗為多元化，包餐飲一杯，分兩個價錢$58 / $70，另有蛋糕 + 飲品套餐（$48），計及酒店級環境同招呼，絕對唔算貴。所試到嘅數款太詳細就唔多講，不過以下兩款喺小弟嘅心水！
![bowl]() 泰式青咖喱海鮮飯 $70
幾鍾意佢用個小陶泥壺盛載住啲青咖喱海鮮，一來較保溫，二來更有泰式風情。青咖喱幾濃咖喱香，食落先知都頗為辛辣，但就好鮮香。撈一撈底，海鮮都有唔少，有蝦、魷魚、魚柳…等，雖然只喺攝時間嘅消閒套餐，但喺製作依然認真。
![bowl]() 公司三文治 $70
果然夠「公司」份量，不單三文治又大又厚，而薯條亦放得唔少，鋪滿三文治之上。公司三文治落足餡料，有生菜、蕃茄、火腿、芝士、煎蛋、煙肉，因為頗為大件，食時都有少少狼狽架，味道雖然唔喺好突出，但份量絕對喺佢賣點囉！哈哈！
![bowl]() 其他所試到嘅消閒套餐，仲有雞肉牛肉沙爹 （各三串）$58、脆炸泰式蝦餅 $58及煙雞牛油梨沙律$70。味道不俗，賣相唔錯！
酒店側一連有幾間品牌café，與其離離去去都喺嗰幾間，大可過嚟六國嘅大堂酒廊嘆吓下午茶，試試佢哋新出嘅兩款甜品，或點個特選下午茶二人套餐hea吓。再次多謝酒店嘅邀請，讓小弟跟一眾朋友先試為快，輕輕鬆鬆、說說笑笑，令愁悶嘅生活多幾分滋潤。
個人評分
味道：7/10
環境：8/10
服務：8/10
抵食：8/10
平均每人消費：HK$0（試食邀請）
餐廳資料：
六國酒店大堂酒廊 Lobby Lounge
灣仔告士打道72號六國酒店地下
2866 3808
=============================================
感謝 山區麵包王 提供以上資料
山區麵包王的網誌: http://garycwm.blogspot.hk/
=============================================
| 
