港島太平洋酒店薈萃閣IP Café都唔喺第一次幫襯，2008年初第一次幫襯，當時嘅自助晚餐收$258 +10%；時隔三年2011年尾又再幫襯，加咗少少，收$298+10%，依然算喺港島區定價較平嘅自助餐之一。今次三顧「薈萃」，又可以大擦一餐之餘，更同一班啱傾啱講嘅食友暢談歡聚，總之我哋嘅食旨就喺：不問政治，乜都想試，哈哈！而且跟同枱嘅酒店公關講東講西，談到上、西環近年變化之大，唔少酒店翻新、開業，隨著將來地鐵港島延線嘅落成，相信依兩區變化仲大呀。
由依家至七月尾，自助晚餐嘅主題都喺做緊「鮮‧味‧三重奏」，成人收費$338（一至四）/ $358（五至日），小童收費$208（一至四）/ $228（五至日），長者收費$228（一至四）/ $248（五至日），，對比上兩次嚟又加咗少少，但都算溫和。但如果話你知做緊69折優惠，最貴嘅旺日成人收費都唔使三百（註：未計服務費原價加一），喺咪吸引到想有啲動身呢！
餐廳環境跟兩年前嚟嗰時無乜點變，食物款式又大同小異，印象中多咗燉湯、意大利風乾火腿、芝士碟及北京片皮鴨，而且整體食物質素都有所提升，尤其熱盤同甜品，水準都明顯比上次嚟好。雖未及啲5星酒店，但勝在經濟實惠。地方雖則唔太大，但感覺挺寬敞，食物方面亦總算「五臟俱全」：中西湯、燉湯、麵包、冷盤、海鮮、沙律、芝士盤、生果、魚生、壽司、意大利風乾火腿、熱盤、爐端燒、薄餅、酥炸小食、燒西冷、甜品、雪糕……等等。
雖然話嚟食自助餐，原來依度好似一般西餐廳，都有多款散叫菜式供應，若非公關特別介紹，真喺走寶錯過都唔知。所以，真喺自助餐以外嘅意外發現，亦令今餐更精彩！
![bowl]() 海南雞（半隻）Hainanese Chicken $98
如果你諗住晌間西餐廳度食海南雞喺嘥氣，唔慌正宗得去邊，咁你就大錯特錯喇。因為佢個海南雞有同集團做星馬菜出色嘅「沙嗲軒」做後勤支援，水準絕對跟得上沙嗲軒出品。以上湯浸熟黃油雞，製成香嫩無骨嘅海南雞，皮爽肉嫩，皮下脂肪少，雞味又濃郁，配埋地道嘅黑醬油、辣椒醬、薑蓉，點可以唔俾個讚佢吖。如果加埋碗雞油飯，咁就更完美喇！兩年前晌沙嗲軒要半隻海南雞，收你$175，依家一舊水有找，真喺難以置信喎。
![bowl]() 雞 / 豬 / 牛（半打）Half dozen of Chicken/ Beef/ Pork Satay $98
沙嗲亦喺沙嗲軒另一名物，同時間食到沙嗲軒兩樣好嘢，當日公關仲要預備咗一打俾我哋品嚐，真喺超開心啫。雖然只得雞沙嗲同豬沙嗲，都好滿足啦！新鮮即燒嘅串燒一定要趁熱辣辣嚟食，否則風味大減，汁豐肉嫩，又帶點碳火香；最驚喜喺伴咗個鳳梨花生醬，頗有新意，食落又幾夾喎，花生香滲出點點菠蘿清甜，確實有趣，好易一串又接一串食唔停。
![bowl]() 烤煙豬手配酸椰菜、薯蓉及時蔬Roasted Smoked Pork Knuckle with sauerkraut, mashed potato and seasonal vegetables $178
星馬菜有沙嗲軒支援，西菜又點？一道德國菜「烤煙豬手」同樣出色，豬手呎碼頗巨型，先燻後烤，外皮烤得甘脆，咬落卜卜聲，真喺爆脆到不得了；而肉質鬆軟，感覺唔油，兼且唔乾唔嚡，蘸芥辣或秘製醬汁都出色，值得推介嘅菜式。由於依個喺試食版，未有酸椰菜、薯蓉、時蔬，只伴少少沙律菜，若配埋酸椰菜就更有德國風味。公關話，暫時會推出優惠，4位或以上惠顧將會送上一碟烤煙豬手，又或其他當日款式嘅主菜。
![bowl]() 香煎雲尼拿法式甜包伴草莓雪糕Pan-fried vanilla brioche with Haagen-Daz Strawberry Ice-cream $88
雖然今回試到嘅並未包括士多啤梨雪糕，但香煎雲尼拿法式甜包伴鮮煮雜莓果醬都幾唔錯，單睇賣相都已經幾吸引。法式甜包暖暖哋，口感濕潤，味道甜甜，配以雜莓嘅酸香，感覺頗平衡，再者，雜莓果醬新鮮即煮，莓味更鮮活突出。
因為幾款單點菜式做得好味又有水準，所以都食咗唔少，佔去不少胃容量，故此，跟住再食自助餐菜式時，只好樣樣淺嚐試多啲。
![bowl]() 中西湯．燉湯．麵包
一般自助餐都一定提供中湯西湯，少數酒店會有燉湯，遇上有燉湯供應，我又豈會錯過呢！是日燉湯喺蘋果燉雞湯，果然足料，仲加埋蟲草花，倍感清潤；西湯原先喺蘑菇忌廉湯，唔知點解咁好賣，清晒喎，後尾改咗南瓜忌廉湯，不過南瓜味唔濃，拍住個燉湯真喺比下去。幾款小麵包，唔喺咩特別款式，勝在旁邊加部烘包機，烘翻熱更好食。湯品隔離仲有粥品，不過唔太興趣，就無細詳留意。
![bowl]() 海鮮．冷盤．沙律．生果
海鮮嘅選擇有雪花蟹腳、青口、熟蝦、翡翠螺；冷盤有煙三文魚、雜錦凍肉腸，以及一些的骰小食如蟹柳芒果小碟；沙律方面除咗有4款預製沙律外，沙律吧材料有3款沙律菜（羅馬生菜、紫生菜、火箭菜）、紅腰豆、粟米粒、甘筍絲、車厘茄、紫椰菜絲及多款配料（煙肉碎、提士乾、麵包粒、芝士粉……等等），而醬汁估唔到又有成5款選擇，包括意大利油醋汁、凱撒沙律汁、蜜糖芥末、芝麻汁及千島汁；至於生果有鮮菠蘿、西瓜、哈蜜瓜、火龍果、西柚。我最鍾意就喺沙律拼海鮮、冷盤同生果，自家製一份大堆頭海鮮沙律，內容十分豐富。沙律菜好爽脆，最愛就喺蜜糖芥末汁，仲有就配番煙肉碎搭芝士粉提味，熟蝦、翡翠螺亦都不俗，鮮菠蘿拼西柚，一澀一甜，自己鍾意就OK啦。整體翻貨都幾快，偶爾見雪花蟹腳要等耐少少先補到貨！
![bowl]() 雜綿芝士碟．北京片皮鴨
雖然餐廳提供咗4款芝士，不過今次就無乜點試，反而試咗北京片皮鴨加巴馬臣芝士薄片。北京片皮鴨喺餐廳嘅是日精選，其實個人覺得自助餐搞片皮鴨唔喺太划算，因為片皮鴨燒好即食先最正，就算依家烘住隻鴨，餅皮放晌蒸籠保溫，味道都總會差一截。
![bowl]() 魚生．壽司．意大利風乾火腿
一向都好少晌自助餐度食壽司，今次都無例外，而魚生亦唔喺必然要食嘅嘢，所以都無試，風乾火腿聽同行食友講未夠油潤，打消一試念頭。雖則幾樣嘢都無試，但都報告吓有咩選擇，魚生有三文魚、油甘魚、北寄貝，至於壽司有三文魚、油甘魚、蟹柳、甜蝦，幾款壽司卷及喬麥麵。
![bowl]() 熱盤
地方所限，熱盤陣容比較弱啲，10款熱盤一眼睇晒，期間亦唔太覺得有轉款，但補給充足。因為有限數，都影低晒所以熱盤有乜，等小弟逐一介紹：清蒸海上鮮、燒BBQ汁排骨、慢煮油鴨肶、香煎牛仔骨、扒羊扒配香草汁、辣酒煮花螺、豉椒炒蜆、清炒時蔬、海鮮炒時蔬、海鮮炒烏冬。小弟精選咗部分心水嚟試，清蒸海上鮮條蒸斑好大條，好鮮味，只喺少少過熟，始終要蒸咁大條斑都唔易控制；燒BBQ汁排骨肉質鬆化，BBQ汁好香濃；慢煮油鴨肶唔太羶，有點點橙香；香煎牛仔骨，煎得甚香；扒羊扒配香草汁，感覺有啲韌，羶味唔重；辣酒煮花螺，都幾辣吓，不過酒香唔太突出，佐啤酒就最合拍喇；豉椒炒蜆，好惹味，蜆肉亦算肥美。最奇怪喺個海鮮炒烏冬，唔見有咩海鮮喎！
清蒸海上鮮
燒BBQ汁排骨
慢煮油鴨肶
香煎牛仔骨
扒羊扒配香草汁
辣酒煮花螺
豉椒炒蜆
清炒時蔬
海鮮炒時蔬
海鮮炒烏冬
![bowl]() 爐端燒．薄餅．酥炸小食．燒西冷
晌餐廳右側有個開放式廚房，提供以上幾款食物，包裝爐端燒（雞翼、豬腩肉、牛脷、鴨胸、雞肉腸、豬肉腸、茄子、雜椒、鮮冬菇、車厘茄、南瓜），款式不定時推出；仲有蒜蓉包、薄餅、芝士焗椰菜花、炸白飯魚、芝士蝦春卷、燒西冷牛肉，上文提過嘅北京片皮鴨都可以晌度搵到。留肚戰甜品，所以又喺無試晒。開放式廚房已有大型焗爐，薄餅晌度新鮮焗，加上見佢個薄餅賣相唔錯，味道又確唔錯，蕃茄汁底及芝士都落得唔手緊，而難免會攤涼咗，又可要求焗一焗翻熱；芝士焗椰菜花的的骰骰一小杯，下白汁多略嫌芝士味唔夠；芝士蝦春卷外層較油較腍，味道好一般；原條燒西冷牛肉唔喺好大條，肉質柔軟，肉味不俗，有燒汁或黑椒汁，仲要蘸點芥辣。
![bowl]() 甜品．雪糕
最後衝入甜品個戰場度，對一般甜魔嚟講，薈萃閣嘅甜品無論數量、款式都可能未滿足到佢哋，其實一小張長枱已擺有13款甜品（迷你士多啤梨撻、藍莓芝士餅、芒果乳酪慕絲餅、合桃班尼配法式忌廉、朱古力甘筍蛋糕、美式萍果批、桂花糕、紅莓奶凍、朱古力奶凍、腰果曲奇、芒果涼粉、啫喱杯、紅酒梨），另外仲有即做窩夫、法式萍果批及麵包布甸兩款甜品晌開放式廚房嗰邊，加埋雀巢及HD雪糕，其實都已經唔少嘢，只喺款式方面唔夠特別，較為大路。之不過，小弟依然殺掉一整碟甜品，喺可惜在到我食甜品時，有幾款想試嘅已經無咗！以小弟口味，當中嘅藍莓芝士餅、芒果乳酪慕絲餅、美式萍果批、紅莓奶凍、紅酒梨等等做得不俗。最後，添多杯雀巢紅豆味雪糕作結，一來紅豆味雪糕較少有，二來HD已經無晒了，又費事勞煩侍應專燈拎出嚟！
![bowl]() 草莓忌廉蛋糕
同場加映，其實只要有客人晌生日月份嚟幫襯自助晚餐，就可獲贈一個1磅重嘅生日蛋糕（須2日前預訂，以及每枱限送一個，可以拎走帶返屋企）。雖然我哋無人生日，但細心嘅公關都為我哋預備好一個讓我哋品嚐一下，其實侍應已將個蛋糕包好晒，為免麻煩，我哋當然將個蛋糕「就地正法」啦。打開個餅盒，個草莓忌廉蛋糕整得好靚，賣相一啲都唔馬虎，公關話佢哋嘅甜品都喺自家嘅餅房出品。忌廉極之輕盈，中間夾有唔少果肉，海綿蛋糕嘅鬆軟度仲有改善空間，最引死人當然喺啲超大粒嘅士多啤梨啦，粒粒巨大完整，又夠甜美，令今晚嘅聚餐更圓滿。
順帶一提，餐廳喺無限量飲品供應喎，汽水、橙汁、啤酒、紅白餐酒任飲，由侍應招呼，不用自己動身，而咖啡、紅茶、檸茶檸水就採用自助形式。侍應們嘅服務勤快、有禮，亦喺值得加分嘅地方。在此多謝公關嘅邀請，敢問句，既然啲散叫菜式做得咁有水準，會唔會晌平日考慮試做半自助晚餐（當然價格可能需下調一點），吸引更多食客光顧呢？
個人評分
味道：8/10
環境：8/10
服務：8/10
抵食：9/10
平均每人消費：HK$0（試食活動）
餐廳資料：
薈萃閣 ip cafe
西環干諾道西152號港島太平洋酒店
2131-5908
=============================================
感謝 山區麵包王 提供以上資料
山區麵包王的網誌: http://garycwm.blogspot.hk/
=============================================
| 
