原來L16已開業多年，仲晌2012年從新裝修，無論戶內、戶外，都一派泰式風情，周圍樹影婆娑，餐廳後仲有瀑布小湖，環境非常清幽。附近嘅上班族嚟食晏，始終要睇時間，點都會來去匆匆，但星期六、日嚟食個漫活午餐，心情輕省，絕對唔會忐忐忑忑、十五十六。 

踏入室內，兩隻以泰菜名串連而成嘅小象、大象圖案，得意別致，咁你就知L16主打泰國菜，但亦附設日本菜及中菜，適合多心嘅客人。今午主要都喺品嚐泰菜，但聽正正晌附近返工嘅食友講，原來佢哋嘅日菜亦都不俗。仲怕佢做得唔專一，水準飄忽，但難得幾邊都兼顧到。

依日晏晝有少少回暖，趕到嚟有啲熱，所以，未食先飲。因為L16都兼營酒吧，所以，酒水牌內嘅飲品選擇非常之多，由餐酒、白蘭地、威士忌、啤油、雞尾酒、泰式飲品……以至果汁、汽水、特飲……等等，一應俱全。

芒果特飲 $55

有啲似印度嘅芒果酸奶（Mango Lassi），但仲要杰身啲，而且冰感又無咁重，幾好飲，因為芒果味天然，濃郁到不得了。

至於印刷精美，部份菜式圖文並茂嘅主餐牌，認真包羅萬有，餐前小食、沙律、湯類、雞牛豬、咖喱、正宗泰式美食、海鮮、蔬菜、素菜、粉麵飯及甜品，仲有多款招牌香辣菜，不拘泰式，更有多款喺中式添。

沙田柚沙律 $88
好多時泰國餐廳嘅柚子沙律都採用泰國金柚，估唔到今次L16嘅改以沙田柚入饌，味道一樣唔錯，柚肉大大件，又有爆汁效果，再加埋少少花生粒、炸蝦乾點綴，酸酸甜甜，開胃清爽。題外話，泰式沙律本身都好有個性及特色，所以，店內沙律有成10款供應。

田園鍋粑 $72

鍋粑裁成小件，方便添加醬汁一起食用。小碗內喺椰醬雞肉，雞肉刴得細碎，醬汁帶甜，好重椰汁香，質感濃厚，而鍋粑入口非常鬆脆，兩者加起嚟，確實不俗。

炸蝦餅 $72、泰式炸春卷 $52、泰式燒豬頸肉 $82

餐前小食類有廿多款，最簡單自不然喺叫L16拼盤（$208），一客有齊多款小食。不過，店方已安排好3款小食俾我哋品嚐，仲以拼盤形式送上，包括炸蝦餅、泰式炸春卷、泰式燒豬頸肉。以蝦餅及豬頸肉較較出啲，前者蝦味濃而彈牙，後者帶點爽脆；春卷唔喺話好差，只喺唔起眼，食完都留唔低咩印象。此外，仲有三色醬汁跟餐前小食同上，估唔到泥黃色嘅辣椒魚露挺辣吓。

綠咖喱雞肉配薄餅 $86

咖喱類有紅、黃、綠，均可配牛肉、雞肉、豬肉、牛腩周羊肉，不過，薄餅或蒜蓉包則要另外單點。綠咖喱辣度屬於溫和，又帶少少檸檬酸香，配雞肉唔錯，只喺醬汁質感較為單薄。

蒜茸胡椒肉 $76

列晌「正宗泰式美食」一欄，睇樣唔覺乜嘢，入口有一陣陣火辣，好重嘅胡椒辣勁，反而蒜味被遮掩晒，再者，似喺一道炒肉片，惹味確喺惹味嘅，但始終都略嫌欠缺亮點。

泰式燒羊扒 $138

今回最喜愛嘅菜式，因為唔單止燒得羶香，一上枱已香氣四溢，而且肉嫰多汁，入口肉質軟腍，好有水準嘅碳燒菜式。

水煮魚 $238

上文都提過，店內有提供多款中式招牌香辣菜，如宮保炒羊肉、口水雞、天府蝦仁……等等，當然唔少得依款水煮魚啦。雖然晌泰式餐廳食川菜，有點怪怪嘅感覺，但睇起嚟賣相幾對辦，魚片食落都挺滑溜，不過，辣度絕對好溫和，有啲失去應有嘅神髓，嗜辣嘅人應該幾失望，但怕辣又想試吓「水煮」菜式嘅人，就可以放心一試。

金蒜香茅地獄蟹 $388

單睇菜名已好有霸氣，未試都知佢喺一道重口味嘅菜式。以金蒜、香茅、辣椒爆炒肉蟹，蟹肉嘅鮮味又嚟得帶些多層次嘅香料味，鮮味與惹味都平衡到。雖然稱之為「地獄」，不過無想像咁辣，頂多都喺兩、三層地獄而已。

乾炒貴刁 $82

其實今日菜式之豐富，讀到依到你都知，不過，或者店方都怕我哋唔夠飽，試菜名單中預備咗一道粉麵飯「乾炒貴刁」。因為喺乾炒關係，所以唔見一般炒貴刁咁下蛋漿，貴刁內亦只有些少豆腐乾，碟邊伴有半個青檸、辣椒粉等，食前要先將各配料跟貴刁撈勻，可能貴刁有啲乾身，個人覺得一般啫。

餐飯去到尾聲，甜品總唔少得，再翻翻餐牌，甜品選擇原來甚多，兼且有啲特色雪糕！

椰汁香芒糯米飯 $66

經典嘅泰式甜品，椰汁喺以小碗另上，而糯米飯用上白糯米及紫糯米溝黑糯米兩燭，由於小弟都好鍾意食糯米，無論黑白紫，加上濃濃椰奶香，飯粒又煙糯，已覺得好好食，唯一可惜少少喺芒果唔夠香甜。

南瓜蛋 $46

賣相有趣嘅南瓜蛋，喺一個南瓜加燉蛋嘅甜品組合，不過，南瓜食落未腍透，尤其近邊位，仲有少少生硬，而燉蛋部份如換上雞蛋布甸，感覺更良好，因為依家燉蛋入口唔軟滑，有啲老嘅感覺。

椰汁西米糕 $46、千層糕 $46

雖然之前兩道甜品稍有所欠，不過，是日打孖一齊上嘅最後兩款甜品，卻無令人失望。椰汁西米糕，椰漿下嘅西米糕，加入馬碲粒，清爽富口感，而千層糕質感煙韌，一層椰汁一層班蘭，清香又唔過甜。

如果嫌散叫煩，餐廳都有提供套餐，由二人、三人……到八人套餐共5款，加埋一，圍起上嚟每人都唔過$200，喺比較划算嘅選擇。

若然唔晌附近返工，揀個星期六、日過嚟，享受吓戶外陽光，感受吓春日和風，食個午飯，一樣喺唔錯嘅決定。

當你以為L16只不過喺間一般泰國餐廳，其實，佢哋仲有做婚宴、生日派對、公司大型活動……等等。晌咁輕鬆嘅環境慶祝、進餐，食物嘅味道都可能唔同啲，因為，心情好都喺一種調味劑。

個人評分
味道：8/10
環境：9/10
服務：8/10
抵食：8/10
平均每人消費：HK$0（試食邀請）

餐廳資料：
L16
金鐘法院道香港公園
2522 6333