同Ivan兄一齊上完烹飪班，佢話約咗老婆夜晚有節目，不過時間都尚早，就話拉埋我再去Pantry Bread & Pastries食件餅飲杯啡鬆番吓，佢老婆我梗熟，喺小弟中學同班同學嘛，結果三人行一齊嘆個下午茶。
之前，我哋已經一齊嚟過依度食下午茶，所以，對餅店嘅出品都略知大概，Ivan兄話為咗我益佢上咗堂免費烹飪班，所以依餐就佢請，故此揀餅任務都落晌佢身，反正我依啲甜品鬼見愁都喺大小通吃，有食錯，無放過，揀咩款我都啱嘅。3件餅，3杯熱飲，講吓近況，呻吓工作，時間過得真快。
![bowl]() 無花果芝士餅 $38
上次已經試過依款芝士餅，不過，Ivan兄話好鍾意佢嘅味道，所以再「冧莊」再叫。價錢跟之前嚟都無變，而質量依然喺番度，水準無跌。外表有種華麗、典雅嘅感覺，旋扭如裙襬造型之內，喺海綿蛋糕、無花果肉、紅桑子啫喱、芝士慕絲多層手功嘅製作，味道依然有層次，多樣化而不參摻雜，無花果肉清香，紅桑子啫喱酸甜，芝士慕絲軟滑，一切都嚟得成為新鮮配搭。頂層嘅白朱古力波波，味道偏甜，如果換上半粒新鮮無花果，唔知會唔會更突出件餅嘅主題呢？但喺就一定唔會仲賣$38囉，需知一粒鮮無花果賣成十幾蚊一粒架！
![bowl]() 咖啡芝士蛋白卷 $32
上次試咗個紅豆綠茶蛋白卷，大家都讚晒好，今次就轉轉試另一款：咖啡芝士蛋白卷。跟綠茶蛋白卷一樣，蛋白卷都喺重香味，當中嘅咖啡味頗突出，蛋白卷口感輕盈軟綿；而當中嘅咖啡芝士打得細滑，咖啡同芝士味都算平衡，唔會話邊個太搶。再晌件蛋白卷上做截焦糖紋，咁就靚晒。
![bowl]() 檸檬芝士餅 $38
望個外型已感覺好醒神，鮮黃色絨面夠晒搶眼，襯以半粒士多啤利及糖煮檸檬薄片，令主題形象鮮明。以脆餅乾做餅乾，有別一貫做芝士餅所用嘅牛油加消化餅，嚟得無咁「漏」。內裡簡單以檸檬芝士夾海綿蛋糕，檸檬嘅果香味感覺天然帶微酸，而芝士嘅鹹味令檸檬嘅酸香更突出，入口令人覺得非常清爽，很有水準嘅人件蛋糕。
![bowl]() 意大利鮮奶咖啡Latte $32
上次嚟因為天氣熱，所以飲咗凍嘅意大利鮮奶咖啡，正如上次所講，小弟飲咖啡喺熱飲首選，因為個香濃度唔會受啲冰粒溶化而影響。今回同樣飲鮮奶咖啡，不過就要杯熱嘅，果然更醇香細滑。
雖然前後嚟咗兩次，但每次望住個餅櫃都仲喺好似好多款未試過，實在太多款式，款款都精巧的骰，要試又要留番下一次。
個人評分
味道：9/10
環境：7/10
服務：8/10
抵食：8/10
平均每人消費：HK$70
餐廳資料：
Pantry Bread & Pastries
銅鑼灣百德新街50-56號唐寧大廈地下D舖
2577 3898
=============================================
感謝 山區麵包王 提供以上資料
山區麵包王的網誌: http://garycwm.blogspot.hk/
=============================================
| 
