點心仔 (美孚店)

點心仔 主要售賣小食，如燒賣、魚蛋、生菜魚肉、碗仔翅、珍寶腸、糯米雞等，此外亦有提供碟頭飯、車仔麵以及生滾粥餐。以下係探險家《山區麵包王》為大家作出既實地報導：「點心仔：我的星期六美孚早餐 ~ 點止點心咁簡單」美孚盈暉臺依個所謂商場，好多食店都做唔長，以前有三間茶記，執吓一間又一間，依家得番間荔，苑，而酒家都轉過幾手變成依家嘅百樂門，反而啲小食店捱吓捱吓一年又一年。不過，最近都開始有啲變化，就喺商場內開咗間大快活，面對咁情況，小食店嘅「點心仔」唔知受影響大唔大呢？所以，今早專登同老婆走過嚟幫襯吓佢。比起大快活，其中一樣輸蝕就喺開門時間，人哋開7:30am，點心仔就成9:00am先開，肯定做少一輪早市生意。不過，一間小店，老細加幫工幾個人胼手胝足由朝做到晚，實在奈何無辦法，始終小店資源有限。所以，小店內籠只有十零個位，密密做，相信夠餬口賺到啲都算喺咁。依類小食店主要都喺賣吓小食，如燒賣、魚蛋、生菜魚肉、碗仔翅、珍寶腸、糯米雞之類，此外，亦有提供簡單嘅碟頭飯、百變嘅車仔麵同生滾粥餐。生滾粥套餐 $21 / $25老婆揀咗個生滾粥套餐，一款粥拼燒賣或腸炒，只賣$21，而雙拼粥搭燒賣或腸炒，則賣$25。選擇唔多，只有5款粥！生滾粥要咗一碗豬肚粥，雖然話生滾，但睇見個樣有啲怪怪，色澤偏泥黃色，唔知喺咪加豬肚時連埋啲豬肚汁一齊滾。啲米粒爆晒花，但睇嚟覺得唔綿，入口又綿喎，而豬肚唔喺好多，得三幾嚿，廿零貨仔仲包碟腸粉，算喺咁啦。腸粉，唔使多講，都喺來貨貨色，不過不失，難得份量唔少。車仔麵 $24唔使多介紹，有2、3、4、5餸配一款麵，最平嘅兩餸一麵就喺$24，另加$5可配豆漿或支裝汽水。而餸料有成38款，無分價錢，樣樣都可以揀。小弟揀咗牛腩、魚肉，配粗麵，對比起個粥，估唔到都幾多餸，想食鬆化香濃嘅牛腩、彈牙味濃嘅魚肉，當然唔會晌度搵到。價錢平平哋，質素普普通通咁，志在飽肚，喺大多數人嚟點心仔食嘢嘅目的。豆漿，雪得凍啲就更好，幸而，豆味都唔差。後記，其後間中要去盈暉臺間超市，經過見點心仔嘅生意都唔喺太差，至少無一次喺「拍烏蠅」，都叫有唔少街坊幫襯吓！個人評分味道：6/10環境：5/10服務：6/10抵食：6/10平均每人消費：HK$25餐廳資料：點心仔美孚景荔徑盈暉臺1樓104號鋪電話欠奉