今日因為落雨關係, 唔想四圍走, 所以再次來到滿點冰室開飯 ~
今次先係第二次幫襯, 真係勁估唔到老闆會認得我地囉 !!!
話說我地入到去, 諗緊坐邊既時候, 佢竟然同我地講 : “你地個私家位 (上次坐果個位) 今晚俾人坐左, 坐呢面啦 !!!”
認得都奇啦, 最估唔到連坐過邊個位都記得, 老闆你好勁呀 !!!
一坐低都未叫野, 老闆已經送上兩碗熱辣辣既湯俾我地 ~
因為 d 冷氣實在太強勁喇, 所以二等兵連相都未影就 “乾” 左碗湯先 ~ 呵呵 ~
鬆鬆 : “雞仔, 二等兵乾左我碗湯, 咁我飲乜吖 ???”
响二等兵睇緊餐牌既時候, 隊長又神神秘秘俾左本雜誌二等兵呀 !!!
Surprise !!!!!!!!!!!!!!!!!!!!!!!!!
封面既大頭雪糕鬆鬆好可愛呀 !!!
呢個時候二等兵係咁睇呀睇, 連個肚餓到咩咁都唔記得, 隊長奸計得逞, 循例問問睇緊鬆鬆 magazine 既二等兵想食乜後, 二等兵掛住睇鬆鬆, 又點得閒理佢吖, 咁佢就揸晒主意喇 !!!
原來鬆鬆已經侵略左好多地方喇 !!!
菠蘿咕嚕肉 ($39) ~
因為我地兩位 K 隆星人實在好鍾意食咕嚕肉呀, 生炒骨既物體, 所以覺得呢碟好好味 ~
雙滑雜菜煲 ($40) ~
雙滑即係鲮魚滑同蝦滑, 二等兵覺得鲮魚滑有點鯹, 但蝦滑就好好味 ~
菜有西蘭花, 菜芯, 生菜, 白菜仔, 菇類, 粉絲等等 ~ 清清地, 幾好味 ~ 最主要係覺得呢度 d 餸唔太多味精, 食完唔會勁口渴, 好有家庭飯 feel ~
當然唔少得兩碗白飯啦 ~ 都算幾大碗, 仲要有個小山丘 ~
好, 今晚叫兩個餸, 留肚陣間食麥記先 ~
老闆見我地就快 KO 晒 d 食物, 走過黎問我地仲要唔要添湯 tim, 我地梗係搶住話要啦 !!!
順便叫埋餐茶 ~
熱利賓納 & 熱奶茶 ~
再叫多個外賣俾屋企人食, 老闆特准, 免外賣加既 $1 !!!
埋單兩餸兩飯四碗湯兩杯野飲連一個外賣 (包括 : 餸, 湯, 飯, 飲品各一) 都係 $118, 招呼又掂, 短期內必定做硬飯堂 !!!
============================================
感謝 軍曹基地 提供以上資料
軍曹基地的網誌: http://keroxtama.blogspot.hk/
============================================
