坑口體育館　兒童遊戲室

又係去唔同遊戲室既時候啦！近排單車館遊戲室新開，小朋友差不多一星期去三四次。今日天氣炎熱，所以諗住不如去遊戲室玩啦，最少有冷氣，唔駛成身汗。怎知道小朋友竟然話唔想去單車館，要去其他遊戲室。我就提議不如去坑口體育館啦，都有好耐無去過了，上一次去的時候剛剛新開，那時候小朋友才剛剛兩歲。所以促成了今次坑口體育館遊戲室之旅。

坑口遊戲室交通其實唔算方便，最近的地鐵站當然係坑口站。如果你有興趣來的話，你可以坐港鐵到坑口站，再步行過來。亦有一些巴士小巴係經過附近的，不過基本上你唔係住將軍澳的話，要來玩其實唔就腳的。

去到遊戲室樓下，我問下小朋友記唔記得自己曾經來過玩。佢竟然可以答我記得，仲話自己個時兩歲，好耐無來過咁話。究竟佢係真記得？還是怎樣呢？所以小朋友的記憶力真係唔好睇小，大家答應左你小朋友的野記得做啦！哈哈。

遊戲室處於體育館的1樓，入到去坐電梯或者行一層就到。門口有嬰兒車的停泊處，家長可以自駕再泊車係到。由於無帶相機的關係，相片係手機質素，煩請大家忍耐一下。

外面係有一排排的椅子俾人排隊的，不過我地去到時唔係咁多人，所以夠鐘就可以直入。而不得不提，坑口遊戲室有一樣好特別的東西，就係佢會播放音樂兒歌的，暫時我只係這一間遊戲室見過有呢個設備。一路玩，一路聽歌都幾開心的。
 擴音設備，歌曲亦係由這兒播放。其實佢仲有咪，應該可以包場開PARTY。可惜政府唔會批。
放好鞋可以入去了。

遊戲室都算大，根據政府網頁，這遊戲室有226平方米。唔細得單車館的幾多。其實係建設遊戲室方面政府都算唔錯，基本上新的體育館都會有，而且面積都唔細。最大問題真係保養做得差，不過已經係另一個題目了。



這組俾小朋友又打又坐又跳的玩具都差不多了，已經失去了彈性。大家細心睇下，中間條柱上面係有魔術貼的，其實個場有一些英文拼字配對遊戲，看圖配字的。不過已經變晒小朋友的飛碟。
唯一的滑梯，好似俾人流放，自成一角的…


亦有一些俾幼兒玩的設施。
另一個特別位，就係這個閱讀角。你睇佢右邊係有一個書架的，有一些幼兒睇的布質書本。原意應該係俾家長陪幼兒可以有一個較安靜的角落閱讀，親子一下。不過大部份書都已經變晒大一點小朋友的玩具，而個閱讀角亦建造到成個擂台一樣，所以依家都已經變成左擂台。係一個好好訓練小朋友跑跳爬的設施。

不過如果人唔多，我覺得仍可以試下陪同較少的小朋友一同閱讀。
而洗手間就煩一點，要外出才可以去到，不過都係隔離，算做方便。如果可以有通道係遊戲室直達就更好，那小朋友可以自行去洗手間，家長亦可以更放心。洗手間係兒童手間，有兒童洗手間的設施、親子廁板。最靚的就係洗手盆，高度較合小朋友。


總括來說，坑口遊戲室的空間，設施都算不錯的。不過仍是與香港一般政府遊戲室一樣，就是保養出現問題，設施越玩越少，越玩越舊，損壞了便沒有了，不會補充，亦不會翻新。這是否與政府的施政的思維一樣呢？一次過性的施政，俾錢建好就算了，之後係唔會有預算繼續的。就算係咁，壞左變個新都可以掛…唉。
開放時間。

遊戲室係附屬係體育館內的，坑口這個體育館較特別的設施係有室內緩跑徑，夏天怕晒、怕熱的朋友可以諗下來這兒跑步了。

第二個特別的係有一個閱讀角，大部份都係體育雜誌，為區內人仕提供圖書館以外的選擇？
最後最後，如果人太多入唔到場，或者你小朋友玩唔夠。唔緊要，體育室館出面就係公園，你可以繼續跑跑跳跳，玩到夠為止。

場館介紹：
康樂及文化事務署 坑口體育館

場館地址：將軍澳培成路38號西貢將軍澳政府綜合大樓1-3樓
查詢電話：2623 5928

交通資訊：
如果你係自駕的話，附近只有公屋屋苑停車場。可以泊係明德或厚德邨。

公共交通呢，除左政府網頁上的附近係有巴士站的，你亦可以乘港鐵係坑口站B出口步行過來，慢慢行大概十分鐘吧。

============================================

感謝 SiuB_Fan 提供以上資料

SiuB_Fan的網誌: http://siutimfamily.blogspot.hk/

============================================