「團購」2000 円料理放題專門店

其實龍媽媽一早就想試下呢間餐廳啦！
但由於有了龍哈仔加上坐月，
所以搞到一年都無食過魚生，連大肚去食自助餐的時都唔敢食，
足足介口了一年有多，
所以當龍媽媽坐完月後第一樣想食的就是放題啦！
依家咩都貴，想食日式放題都差唔多要$200，
而剛巧龍媽媽碰上「2000 円料理放題專門店」做團購，
一個人只需要$98就可以任食2個鐘，
連埋加一，$120有找！好抵呀！
最重要是有甜品和飲品任食任飲！咁就仲難得！
不過系得星期一至四 6:00-8:00呢個時段先有！
其他時段就要另加錢
星期一至四 8pm-10pm 需加收 $30，10pm-12pm 加收 $15
星期五至日及假期 6pm-8pm 需加收 $30，8pm-10pm 需加收 $50，10pm-12pm 需加收 $25
不過相比其它放題都系平D！

自從龍哈仔出世後，龍媽媽和龍爸爸就好少出去食飯，
其實今次去食放題仲有另一個目的，
就是慶祝龍媽媽和龍爸爸結婚週年紀念，
其實食咩都無所謂，最重要是可以和龍爸爸和龍哈仔一齊！
今次我們就去到它在銅鑼灣登龍街28號永光中心2樓的分店！

銅鑼灣分店的面積不大，桌與桌之間好窄，
最慘的是無位給我們泊BB車，搞到要收起BB車，
抱住龍哈仔食，不過龍媽媽事前無考慮過呢點，
搞到龍爸爸食到有點不耐煩！
不過其它方面都唔錯！



飲品方面選擇都好多，是自助式，自已在它雪櫃拿飲品，
龍爸爸鐘意飲冬瓜茶！

而我就試了道地的十八茶，都算唔錯！




好！黎食放題當然要第一時間食刺生先！
刺生的種種都幾多，有8種以上！
三文魚都是大大塊的，擺得靚靚咁上碟，
龍媽媽覺得三文魚唔錯，之於其它刺生就一般般啦！

再來當然要試下它的特式壽司啦！
味道一般，無咩特別，情願食刺身好過！
可能龍媽媽食的應該是特價時段，
所以有許多特式壽司例如：火炙、岩鹽和一口等系列都無左，
其實實想試下火炙和岩鹽系列，
不過無所謂給咁的價錢，都系唔好要求咁多，加上都未必食得曬，
等下次再試！




之後又叫了八爪魚、螺肉和中華沙律，
好好味，好耐無食，呢D好少會唔好食，
因為通常都唔系餐廳自已造，通常都系叫返來的！




之後仲試了個三文魚芝麻沙律，
呢個幾好味，好鐘意它個芝麻醬！




再來試了個好香口，好脆的招牌火龍卷！
呢個做得唔錯，單是呢個出面都要最少30-40蚊一碟！



再來的是火焰芝士鰻魚卷，
呢個都唔錯，好香口，芝士味都幾濃！



櫻花三文魚卷，名就好聲，味道就一般！



日式茶壺海鮮湯(只限銅鑼灣店)，
賣相設計好特別，
味道就一般，同麵豉湯差唔多，多了D海鮮！



自家焗雪場蟹杯，賣相設計幾特別，口感都好得意！可以試下！




鹽燒秋刀魚，燒得好香，好入味，連唔鐘意食燒魚的龍媽媽都話好味！
又大條！

汁燒雞肉串，普普通通！



吉列蝦、蠔和蟹鉗，都夠熱和香口，唯一唔好的是油似乎唔多靚！



芝士焗西蘭花，香濃的芝士味，配上清甜的西蘭花，幾好味！




煙鴨胸焗薯蓉，鴨胸份量好少，味道一般！



鐵板燒牛油明蝦，蝦只有2-3隻，菇的數量仲多過蝦，
不過無辦法，蝦貴！明白！味道唔錯，好香牛油味！

最後當然唔少得試下它們的甜品，
甜品款色都有很多，芝士蛋糕、 馬豆糕、桂花糕、 啫喱糖、  木糠布甸等，
不過它的甜品就麻麻地，街邊貨式，但勝在唔系好甜，
加上它唔系甜品店，有咁多甜品選，勝在誠意夠！
芝士蛋糕-無咩芝士味！