9個多月的懷孕過程

由龍哈仔媽媽於 2012-08-20 22:14:38 發表 | 累積瀏覽 533

分類：

今日是37W6D，距離龍哈仔出世仲有15日！
今個星期開始要每個星期返去東區產檢啦！
希望龍哈仔快D出世
千萬唔好要媽媽催生！
依家龍哈仔未出世，仲有時間打Blog，
就等我回故返呢9個幾月的懷孕過程的喜與悲
仲記得當初和龍爸爸仲計劃緊結婚的事項，
開頭仲講笑話唔知我們趕唔趕得切生龍bb，
如果在結婚之後造人就趕唔切了，
於是我們努力了一、兩次後
上天突然賜了呢份結婚禮物給我！！！
呢個就系計劃之中的無計劃！！！
仲搞到我結婚時無得減肥，
D衫仲要擇唔顯肚的添！！！
不過我們真系好開心，
因為龍爸爸的年紀唔細啦！！！
我好想幫他快D生BB！

發現懷孕
其實我的月經一齊唔準，加上當時搞緊結婚的事，
以為自已壓力大，所以月經姐姐遲了，根本無想到自已會懷孕，
加上我懷孕初期的感覺和就快來經的感覺好相似，
都是個肚和胸脹，好累，又無吐，
所以開頭都無咩留意，
直至無來月經2個月，
先下定決心去萬寧買驗孕棒驗，
真是bingo了
之他怕驗錯，再去私家診所驗多次，
就系咁，我就成為龍年的新娘和龍年的媽媽了！！！

到東區醫院登記
之後我就拿住私家診所的懷孕證明去東區醫院登記，
當時好驚會無床位，又咩都唔識，
去到它就會給D資料你填，
填完就會給個期你做產科新症掛號，
當時我我以為可以立即見醫生，做檢查！

產科新症掛號
就系咁樣，我按它的日期返去做掛號，
首先去到就見到好多孕媽媽，
心想龍年果然多人生bb
似乎bb的競爭真系好大，
之後首先是看有關產科的影碟，
講解下之後她們的服務，流程等，
當時真是聽到一頭煙，
之後就見姑娘，做抽血的檢驗，
當中會檢查：血型、血色素、德國麻疹、性病試驗、乙型肝炎抗原測試和愛滋病抗體測試，
呢個系龍媽媽和龍哈仔要過的第一關，
然後它就安排龍媽媽做唐氏綜合症的普查，
好彩我發現懷孕都算早，
因為呢個普查只可以在11+13+6週做，過了就無，
而且我知呢個檢查好重要，所以真是好感恩！！！

唐氏綜合症的普查
我如期去到醫院檢查，當時好緊張，
因為知道可以照超聲波，會見到龍哈仔，
而且呢個檢查是好重要，
點知去到照的時候，姑娘話我知照唔到BB，
當時真系我驚，心想bb唔系有咩事，
之後再轉房由一個醫生幫我照，
好彩終於見到龍哈仔，
而且亦照到有閃閃(即是bb的心跳)，
原來我來經的日期唔準，
所以bb的size和預產期都唔準，
比預期中的細和遲，
當時亦做唔到普查，
要再另約時間再做第二次
就是咁我由8月媽媽變了9月媽媽
好彩第二次的結果無事，
我和龍哈仔又戰勝了一關！！！

龍哈仔的第一踢
電視雅培的廣告成日都播bb會用腳踢媽媽，
那時並唔知那種感覺是咩滋味，
在18W的時候，feel到肚突然動，
開頭仲以為錯覺，
但當2、3次後，
終於感受到龍哈仔的存在啦！！！
龍爸爸亦好驚奇！！！

照結構
之後都了另一個大關口，就是照結構，
當時並唔知是去照結構，只是知照超聲波，
今次龍爸爸都有去，當時仲未知龍哈仔的性別，
我一直想生女好定生仔好，
亦問了龍爸爸想要仔定要女，
龍爸爸當然話無所謂，
但我知道他鐘意仔多D，
去到照的時候，
龍爸爸好留心聽邊度是龍哈仔的手、腳、心、肺正唔正常，
當姑娘問想唔想知性別時，
龍爸爸居然無答，反而是我答想，
最後做完檢查，龍爸爸一直話bb好靚仔，好似他，
我心想照2D，龍哈仔又咁細，根本睇唔到龍哈仔的樣，
不過爸爸眼裡出靚仔，在父母的眼裡自已的仔女永遠最靚，
就等他淘醉下先！！！
最重要龍哈仔健健康康，
像誰又有咩所謂！！！

2次的飲糖水驗糖尿經驗
因為我爸爸有糖尿病，所以其它孕婦飲一次糖水，
我就要飲2次，
第一次在大約4個月的時候，
而第二次在7個月的時候，
驗糖尿都幾辛苦，
首先在驗之前一晚12點後唔可以食野，
去到醫院姑娘幫我抽第一次血，
之後我要飲一大杯的糖水，
好甜，都幾難飲，怪怪的，
期間唔可以吐，如果吐的話就下回請早，
之後等兩個鐘再抽第二次血！！！
好彩兩次都無事，不枉我努力叫自已忍口！！！

轉到健康院做產檢
大約6個月的時候，東區轉介我返健康院做產檢，
當時心想，點解要轉我去健康院，唔系一直東區跟開的咩？？？
但當去到健康院做第一次產檢時聽姑娘講，
話健康的媽媽先會轉到健康院跟進，
當時即刻定一定，加上健康院的效率比較好，
自已反而鐘意到健康院做產檢，
如時者在健康院做了4次產檢，
每次隔2個星期，
最後一次仲做了乙型鏈球菌的檢查，
但因為醫生話個肚細轉番去東區醫院跟進！！！

有驚無險的一次產檢
被安排返去到東區醫院，
首先見了醫生，又再度肚，都系話我個肚偏細，
當時好擔心，
之後再去做了個bb心跳量度檢查，
睡在病床上，然後有部機器量度bb的心跳，
我要數住龍哈仔的肚動，
成個檢查太約半個鐘到四十五分鐘，
之後做完姑娘安排我下一個星期返去做超聲波檢查，
當返到去做超聲波檢查，醫生第一句話我個肚細，
當時我和龍爸爸真是好擔心，
好彩最後bb的size，羊水等都好正常，
可能是我盤骨大，bb收了在裡面，
所以視覺上我個肚細！！！

依家38W保持在東區做產檢，
距離預產期仲有15日，
在呢9個多月來，
我的懷孕旅程，暫時唔系太辛苦，
(直至呢一刻)
龍哈仔對我都幾好
我由懷孕到依家都無吐過，
而各個大小的檢查都系有驚無險，
只是懷孕初期我易累，
到36W開始有短暫的手腫和腳腫，唔算嚴重，
和37W開始晚晚有D M痛的感覺！
相比其他的媽媽我已經好好，行得，走得和食得
真系好感恩，
龍哈仔，媽媽好多謝你，
我們要一齊努力到最後!!!

鐘意SeeWide的分享，給我們一個Like吧！