我們在12:31pm在St.Gallen搭S3火車,諗住去施泰因Stein am Rhein,不過我又覺得太早去到wor,所以就決定額外加插行路過德國的行程!因為唔知得唔得,又無上網search過,所以我地都好興奮!列車於約13:30pm到達kreuzlingen,一個無咩人會到既站,出到站人影都無隻,我睇一睇車站外既地圖版,確認德國既方向,就開始行喇!
一路行左約20分鐘,就到達關口了!個關口好似不設防咁,我地就戰戰兢兢地繼續向前行,結果….
過左喇!講堅,我完全唔覺我地已經去到德國,我地仲唔肯定自己仲係咪瑞士,直至見倒換左歐羅,先確定我地已經到左瑞士。
一路行入德國康斯坦茨(Konstanz)舊城區,由於我從來無plan過今次瑞士之旅會去埋德國,所以對依度所有野都好興奮!我仲著住件瑞士衫架,哈哈!
過左前面座城牆,我地就會進入康斯坦茨(Konstanz)舊城區。
到了舊城區,非常熱鬧!康士坦茲位於波登湖西端,德國的西南角,毗鄰瑞士。她是一座有2000年歷史的古城,也是一座年輕的大學城。
我無諗過我會由瑞士一個荒蕪既火車站,行左半個鐘就黎到德國一個咁熱鬧既城市!
再沿住市場街Marktstatte一路向前行,就會見倒市中心最大的大教堂。
大教堂於1089年落成,可以登上高76 m的高塔,不過我地一蚊歐羅都無,所以無得比錢上XD
大教堂內部。
好彩市中心都好多地圖,所以離開康斯坦茨時都可以睇下火車站係邊。
其實我唔知道Swiss Pass包唔包由Konstanz番瑞士的火車,不過我心諗都係幾分鐘車程,就博下啦!結果,三分鐘就番到Kruezligen站了!(番到去check番Swiss Pass係包架!)
由Kruezligen去Stein am Rhein的火車於14:31開出,我地真係岩岩好,用左一個鐘就來回瑞士德國了!勁!
由Kruezligen去Stein am Rhein的火車無咩人坐,大家坐右邊的話可以一路望巴登湖Bodensee的美景。
約二十分鐘後,我地就次14:58 pm到達Stein am Rhein施泰因,直譯作萊茵河寶石。
火車站在山上,行落城區大概要15分鐘。
過左萊茵河就到城區。
Stein am Rhein施泰因叫做萊茵河寶石,寶石是指城鎮的街道像寶石一樣美麗。特別是城中美麗的壁畫,是沒有一個城市能媲美的。
一入到Understadt街,我地就好似去左第二個世界。
市政廳。
就好似入左一個中世紀世界咁,真係好靚。
小鎮的餐廳大都集中在舊城和萊茵河畔,夏天時大家都選擇坐在露天的用餐區享受美食和美景。
我地一路行,兩邊都有好多餐廳同場紀念品鋪。
最後行到Untertor城門,亦是舊城區盡頭。
Stein am Rhein雖然只是一個30分鐘就可參觀完的小城鎮,但就像一粒細小的寶石一樣,散發出的光芒總會吸引無數人參觀。
我們最後到達Stein am Rhein的碼頭,準備搭船去今日最後,亦都係最令人期待的景點,Schaffhausen,欣賞閃耀萊茵瀑布的國慶煙花!
河中有好多人,我都好想好似佢地咁!
等左都幾耐下,去Schaffhausen的船就到了!可能係國慶煙花關系,都幾多人上船下。
Stein am Rhein to Schaffhausen (Ferry),Swiss Pass免費,行程約1.5小時,要注意船都幾疏下,要好好編排行程。
我地坐係下層,船一路沿住萊茵河行駛,我們亦都可以一路享受美景,又可以休息下,為今晚睇煙花留下一點體力!
河邊有好多人游水,一見倒我地就會say hi。
好快就到達Schaffhausen沙夫豪森了。
我地於18:15pm落船,在21:15 pm煙花前參觀埋沙夫豪森!
下一篇將會非常非常精彩,萊茵瀑布上的煙花絕對是我看過最震撼的煙花,一定不要錯過呀!
經驗分享:
- 如果不步行到Konstanz的話,其實火車只要3分鐘就會由Kruezligen到達Konstanz的,而且Swiss Pass都包。
- Swiss Pass包所有火車,所有來往Kruezligen, Konstanz, Stein am Rhein, Schaffhausen的遊船。
- 遊船網頁:http://www.urh.ch/
- Stein am rhein火車站行去城區是下坡路,所以最好搭船走,如果唔係又要行番上斜搭火車。
瑞士快速連結 (D1 = Day 1)
============================================
感謝 晉盈遊 提供以上資料
晉盈遊的網誌: http://chunyingtravel.com/
============================================