7點半就起左身，一出露台望下，出面煙霧彌漫，呀妹佢地已經出左出面花園行黎行去了。今日行程密得不得了，我地要去日月潭遊湖，之後去集集，再去車埕，再去埔里，最後去清境！即管睇下我地一日內可唔可以去哂啦！
7點半食早餐，食之前出去花園散下步先。
出到去發現Alan同Elsie已經由台中到達，我地之後會有11個人一齊玩！咁耐以黎都無試過有11個親戚一齊去旅行的。
朝早既民宿花園。
其實山季花園民宿真係好大，好可惜我地享受左一晚就要走了。
番到民宿餐廳食早餐。
好豐富呀！不過尋晚BBQ食得實在太飽，所以今早都唔係食得好多野。
食完早餐行番出去，嘩！D霧氣無哂，非常晴朗！好開心呀，要知道日月潭出名成年都被霧氣包圍，我有預感今日會非常好天。
羅司傅好準時8:40AM就黎到Pick up我地，我地11人出發了！今次第一次「帶」咁大個團，好興奮，為我將來開旅行社儲d經驗！
民宿距離日月潭遊船碼頭約15分鐘車程，我地8:55AM落車，買左11張9:00AM出發遊船船飛，所有船飛都係公價300台幣了。
上到船都幾多人下，因為我地都比較遲上船的。連溫家寶都話想黎日月潭玩下，就知道依度係幾靚啦！
日月潭是以拉魯島為界，東、西兩側因形似「日輪」和「月鉤」因而得名，百年來享有臺灣八景的美譽，也是台灣地區最負盛名水力發電重地；風景區以「高山湖泊」、「原住民文化」、「自然生態」等觀光遊憩特色，每年吸引超過6百萬中外遊客到訪。
船行左約15分鐘就到達拉魯島，拉魯島是日月潭的地標，傳說是邵族最高祖靈的居處，也是邵族早期的聚落之ㄧ。
拉魯島無得上岸，上面掛住好多抗議標語…..
離開左拉魯島後，遊船好快就會去到對面岸既第一個景點。
我地坐既日月之星號。
到達第一站：日月潭玄光寺
玄光寺為一仿唐式建築，正方形的地磚散發著光滑與樸實感。寺內「國之環寶」匾額乃先總統 蔣公親題，寺外大牆上，刻有玄奘西域遊行圖與碑文三座；左為日華親善紀念，中有大唐玄奘法師傳記，右則中日佛教親善交流紀念碑。此外，門前尚有兩尊石像，殿前有大鼓一座，登梯而上可見供人敲槌之醒鐘。
我地上到岸就同身穿民族服裝既靚女們合照先啦！
碼頭邊有一間好出名既呀婆茶葉蛋，不過無開門，有d失望。
行上玄奘寺都幾多石級，不過上到去就可以睇到日月潭靚景。
天朗氣清的日月潭。
玄光寺，個人對寺廟無咩興趣，都係鍾意多影湖景。
行到寺後面又有野睇。
一個佛的側面。
影下相，行幾行就遊覽完玄光寺，我地係第二邊行番落去。
遠眺拉魯島。
行到返碼頭，發現呀婆茶葉蛋開門了！！好多人買！
我地一人食一隻，正！
去到碼頭，發現剛剛走了一班船>.< 要等15分鐘，我地就玩影相黎自娛！
係我地影得好high時，突然有一位相貌勁chok的人走埋黎，話我地唔好係度跳，因為有船黎緊！
但係根本無船黎，佢仲繼續坐係條繩上面chok！全部人O哂咀！
等左一陣，船就來了。
這是全台灣最高的燈塔，是海拔最高。
好快就去到第二個景點 - 伊達邵
伊達邵舊名「德化社」、「化蕃社」，邵族主要居住於此，是日月潭邊人口聚集最多的村落。現在，就變左遊客買手信，食野掃街既地方！
一行入內街，就係數之不盡既街鋪，買野喇！
姑姐最開心，周街都係d同貓頭鷹有關既野，岩哂你！
第一次見到貓頭鷹專門店！
我就試左依度出名既阿薩姆紅茶，好好味！
我好快就行完街，見其他團友們都仲係度不斷掃街，我就行出湖邊行下。
天氣真係好好，不過有d熱。
玩完伊達邵，我地就坐番船番歸了！番到去碼頭，又有人表演。
我地約12點離開日月潭，打電視叫羅司傅黎接我地，向集集進發！
經驗分享：
- 落船時佢會幫你在手上蓋印，咁你就可以再上番船去下個景點。
- 上玄光寺有幾條路，最好在碼頭行上去時走左邊的路，比較無咁斜，左落黎時就走第二邊的，可以欣賞到不同景色。
- 整個日月潭遊湖我們共用了3小時。
相關文章：
台中5天遊機票篇
Day 1 抵達台中【 米卡沙旅店】
Day 2.1 新社【薰衣草森林】
Day 2.2 新社莊園【歐式花園古堡】
Day 2.3 日月潭民宿 露天花園燒烤
Day 3.1 日月潭遊湖
Day 3.2 集集車埕篇
Day 3.3 清境夜遊小瑞士花園
Day 3.4 清境單棟小木屋
Day 4.1 清境青青草原
Day 4.2 18度巧克力工房
Day 4.3 台中必逛夜市【逢甲夜市】
Day 5.1 台中最終章【手信篇】
============================================
感謝 晉盈遊 提供以上資料
晉盈遊的網誌: http://chunyingtravel.com/
============================================
2014吉隆坡3日遊
