15 JULY 2014(TUE)
放暑假啦...放暑假啦，依今日放暑假嘅第一日，就收到一份神秘禮物，謝謝Friso一直都咁愛錫小小豬呀~
依個傻豬仔一見到都不知幾開心，拖住個行李箱通屋走，仲問我幾時去旅行添呀~
哈哈哈...我都好想去旅行，不過今年我同大肥豬都冇計劃出去旅行，剛剛我地又去左澳門嚟左個小旅行，所以依個暑假都應該都係留係香港啦！
行李箱暫時都冇用武之地，依家就先放晒小小豬啲寶貝玩具係入面先，不過希望好快就可以用到啦！
開始放暑假，最開心嘅就一定係唔洗再日日來回咁行四次小小豬返學校嗰一條張樓梯，因為嗰條長長嘅樓梯或者係斜路，都真係行到我CC吓呀！
亦都因為暑假開始，依個百厭嘅小小豬就會全天候二十四小時都跟住我。平日小小豬返學之後，我都有三個鐘自由時間，可以去行吓街或者返小豬媽屋企打吓BLOG，依家真係只有小小豬夜晚瞓左先有自己時間做私人嘢(打BLOG)啦！
不過，每日都可以有小小豬陪住，都係一樣唔同嘅樂趣，當然係指佢乖嘅時候，佢一發傻又令我頭都痛呀！
講起暑假，我地都有同小小豬報左啲暑期班，不過就只限屋企附近嘅社區中心，同埋所報嘅都係啲EQ班、MQ
班同埋親子遊戲班。另外，仲有一個康文署嘅足球班。
小豬爸亦都曾經問過我，仲乜唔報啲學習班，話我應該俾啲英文班...國語班，等小小豬學多啲學術性，如果唔係就會好輸蝕呀！
我同大肥豬都覺得學術性嘅課程係可以好易追得返，始終小小豬都係一個幾聰明嘅小朋友(幾個老師都係咁講呀)，所以我地都覺得學術性我地唔太擔心。
反而，我地想係現階段都係集中培養好小小豬嘅品德、情緒..依啲內心問題，因為我地都認為依啲係由細個開始培養，都係我成日講嗰一句：品行好就自然引伸到內心都會係正面，所以只要開個靚頭，之後就好易教！
我地依家嘅心態就係，那怕輸在起跑線，只要KEEP住每一天都有進步，相信最後都一定會去到我地想到嘅終點。
其他博客區
※※ SINA ※※
※※ MyBB星級Blogger ※※
※※ She.com ※※
※※ WeShare ※※
※※ U-Blog ※※
※※ SeeWide ※※
※※ BlogSpot ※※
※※ BK Milk 親子語 ※※
※※ Cook 1 Cook 星級廚師 ※※
