你家陣流架?係流架
個薯餅係流的,咁點呀?
哼~
今日艷陽天下我走去炸野,無錯!每次寫blog總有人走出來話:我最怕炸、我屋企唔炸的、彈油乜乜物物
其實呢…我無得揀,對於一個要寫食譜既人來講無得選擇
我無奶油日日都只係蒸、炒、焗,炸都係必修科
同埋有時你攪聚會都要有唔同煮法既食品
所以我久唔久都會炸下,每月一炸咁上下啦啦啦
今次係芝士薯餅,做到流心唔難,炸唔難,但整體都幾煩
平時煮食,我絕對反對用芝士片去做,味道完全唔像樣,但整呢個用芝士片就易做好多
同埋佢溶得快,好快就會流的
用一個薯仔,蒸淋佢或烚淋佢
壓成泥…然後加一湯匙奶同加鹽,大約一茶匙
跟住撈勻佢
加入半個洋蔥碎、新鮮粟米先烚幾分鐘再瀝乾水備用
然後加入煙肉碎撈勻
將薯蓉做成圓型加入芝士片,*芝士片先切成小四方型,放入薯餅內,封面做成薯餅型
順序沾上低筋麵粉、蛋液、最後沾麵包糠
跟住半煎炸便可以
如用氣炸鍋就先表面掃油,然後用200度炸10~15分鐘至金黃色
我試過整幾個焗係失敗的……面對現實炸吧