31-5-2014：三十登長城day 2(part 2)．國家政治與文化之中心

離開故宮時已經餓到不得了，但眼看四周完全唔似有嘢食﹗﹗但有架巴士載番大家去故宮嘅另一邊，多人等車都搭啦～初嚟報到實在唔係好熟邊度有嘢食，就搭去天安門啦﹗落車⋯又係乜都冇﹗結果，1蚊搭巴士，要用2蚊搭番地鐵過王府井搵食⋯ 今個trip第一次踏足王府井大街﹗食乜呢食乜呢？

因為太餓了，所以第一眼見到邊間就入去邊間了～

點菜係自己tick點心紙，南北食物都有，味道就一般般啦～反而個雞肉串有啲驚喜～炒菜心好油呀﹗經過呢餐之後我哋叫菜食就改叫砂鍋xx，烚菜好啲冇咁油～雖然食完冇話好有滿足感，但總算填飽肚子了～

有氣有力就可以繼續行程啦～大家睇睇下面嘅地圖：

地圖頂部係今早行咗嘅故宮，而下午嘅focus就係故宮以南嘅一堆好密集嘅景點，其中包括天安門廣場、人民英雄紀念碑、毛主席紀念堂、人民大會堂、中國國家博物館、國家大劇院～當然冇可能全部由內至外都逛啦～有多三日就差唔多～

day身後嘅係毛主席紀念堂，不過我哋去嗰日冇開放～有興趣可以入去個官方網站度睇睇：

http://cpc.people.com.cn/GB/69112/113427/

天安門廣場正南方係呢個正陽門，好古色古香嘅建築呢～wiki話原本嘅正陽門早係五百年前嘅明朝就有了，不過二十世紀初時失過火，我哋今日見嘅正陽門係1914年時改建嘅～ 形態非常生動嘅雕刻～

人民大會堂－－可以入去參觀㗎～好似話每個省市都有屬於自己嘅廳～

另一邊嘅係中國國家博物館，我諗要入去行又係可以行一晝﹗官方網站：

http://www.chnmuseum.cn/tabid/40/Default.aspx

天安門廣場有大大個mon，大大咁播住啲影片，我哋參觀時好似播緊江蘇嘅介紹～

電視新聞成日見到嘅天安門﹗

雖然地方好闊好大，但⋯人人人人人人人～～～～～

大到呢～清潔嘅大叔大嬸要駕電動車嚟打掃﹗

我哋轉過去國家大劇院嗰邊～

話說今次去北京係街上有三樣嘢成日都見到，成日都想試，但又好驚食咗會肚痛嘅東東，最後三樣都試咗呀，覺得唔試就會好可惜咁，第時唔知有冇機會嘛～三樣分別係：老冰棍、酸奶同埋雪梨湯～

首先係老冰棍﹗特別嘅係佢超平﹗每支RMB1，而且周圍都有得賣﹗仲要啲大叔唔係推住冰櫃喎，而係用個紙皮箱裝住一堆，奇就奇在真係夠凍﹗RMB1嘅雪條，睇睇成份⋯得葡萄糖﹗其他啲化學嘢穩定劑之類吧～味道嘛，果然好單調，解渴就解渴嘅，但冇乜特別好食，試過就算了，有義氣夾手夾腳食埋佢囉～

國家大劇院非常優美又時尚嘅外型～

有隻落咗單嘅鴨鴨悠閒地暢泳呢～我哋後來入咗內部，抬頭就係呢個淺淺的水池了～

國家大劇院個門口係下一層，唔容易搵～

自拍一張招牌相先～

可以買飛入去參觀，有學生團體呢～

與其入去睇睇啲建築only，我哋不如睇下有冇啱睇嘅節目啦～好似上次去西班牙時都睇咗結他演出﹗(請參閱：2-11-2013：西班牙day 3(part 3)．美味夜市場．異國的演奏會)

結果我哋揀咗呢個來自捷克嘅管弦樂團演出﹗其他option有西班牙嘅Flamenco，但我見上次係西班牙睇完冇耐，加上上次睇到有少少瞓著(當然時差都好有關係啦)，今次聽下音樂會啦～不過因為係即場，所以大多數門券都一早出售咗lu，有得揀嘅位唔多，我哋買嘅屬於中價飛，都要RMB400一張，下一篇blog大家就可以睇下個音樂廳同埋睇下個位靚唔靚了～

我哋買好飛之後都有好多黃牛問我哋買咩飛，我哋都冇理佢哋了，係大陸要買飛都係幫官方買好啲～真係估唔到連古典音樂會都會炒飛囉～

未夠鐘睇show我哋周圍逛逛先啦～路經呢個好有氣派嘅⋯私人宅邸，不得內進﹗

我哋諗住隨便亂逛，啱嘅食啲嘢夠鐘就返去睇show，點知越行越荒蕪﹗變成只有好多樹同埋民居～一間鋪頭都冇﹗而且越行越累⋯唔得了，既然要行，不如去王府井大街啦，如果要食嘢都機會大啲﹗於是我哋跳上咗的士～呢程的士真係最舒服嘅一程，有涼冷氣啦，又有寛闊柔軟嘅座椅啦，又靜啦，又可以徹徹底底咁休息一下﹗我真係好得我哋好冇志氣丫﹗去旅行竟然好enjoy搭的士﹗:p

落車又恢復元氣了﹗

呢個牌幾好bor～係北京其他地方都有見過～顯示咗區內時租車位嘅availability，大家就唔駛盲中中排長龍啦～

我喜愛嘅李敏鎬果然亞洲嘅人氣都好高﹗北京都見到佢嘅廣告呢～

嘩，正﹗行兩步見到王府井小吃街﹗應該可以好好掃一下街吧？

點知⋯雖然條街好熱鬧，但我哋幫趁唔到呢～有烤串，但⋯我會食嘅雞肉串呀魷魚串呀，同一間鋪頭會賣埋仲好鮮蹦活跳嘅蝎子串﹗﹗好驚嚇呀～～～～我要遠遠見到烤串就背住個方向﹗﹗其他食物都不太吸引(到我)，啲北京人好鍾意食「爆肚」，好似話牛肚同羊肚都有的，我又唔食內臟嘅～炸醬麵嘛，晏晝又食咗咯～冰糖葫蘆day又唔會同我share～圖片右三呢個乾冰彩色飲品我真係不敢恭維，睇見都冇興趣～結果乜都冇食﹗但有趣嘅東東都睇咗唔少嘅～左二嗰張就相傳係「王府井」啦，右二嘅吹糖人都好有趣，左三又有街頭京劇表演﹗

結果都有幫襯買嘢飲﹗我之前咪話過想試又唔敢試嘅三樣東東嘅，我即日試埋雪梨湯了﹗其實外表同味道都好似台灣嘅冬瓜茶，涼茶咁嘅色，甜甜凍凍，但點解唔敢買呢，因為佢通常pre-pack咗好多杯堆係counter前面冇雪住﹗都唔知煲起咗幾耐⋯直至我見有一間放係雪櫃入面，好啦試下啦，唔試又唔心息喎～飲咗，ok，heehee，下次唔駛飲了﹗因為味道麻麻地～

我哋結果決定睇完show至食晚飯啦～搭番地鐵返去國家大劇院啦﹗路過有巴士車身廣告係宣傳斯里蘭卡旅遊呢﹗香港都未好多見斯里蘭卡嘅宣傳，估唔到係北京咁容易見到﹗會唔會成為潮流呢？大家對斯里蘭卡旅遊有興趣的話可以去下我個blog啊～(請參閱：斯里蘭卡旅遊blog)

待續

前往其他中國旅遊blog

============================================

感謝 Rita 提供以上資料

Rita的網誌: http://www.wufamilyblog.com/~rita/

============================================