由 Rita 於 2014-06-03 00:00:00 發表 | 累積瀏覽 433
離開咗鳥巢水立方，我哋係熱辣辣嘅正午時份直接搭咗的士去雍和宮附近，先搵嘢食，再逛多一陣就要返香港咯～
呢個標題又係「四爺的」？﹗之前已經係四爺的圓明園㗎咯噃，今時今日嘅雍和宮係藏傳佛教嘅寺廟，係乾隆時期改建嘅，而再之前呢個地方其實係雍親王府，即是雍正皇帝登基前嘅府第，雍正就雍正啦，又要四爺的，是關睇咗「步步驚心」之後，吳奇隆飾演嘅四爺實在太有魅力了⋯噢～我諗我決定要係僅餘嘅時間加插多嘅呢一兩個景點，可能都同我係四爺fans有關囉～
呀，我點解未去到雍和宮就講咁多，其實係想介紹我哋食lunch嘅地方，其實雍和宮座落嘅呢條大街有好多食肆，但因為雍和宮就係佛寺，所以八九不離十都係素菜館，平時我哋都唔係可以唔食素，但飢腸轆轆嘅兩人好想食得多啲，所以我哋嘅目標係non素菜⋯
結果入咗去呢間食餃子嘅「輕鬆時刻」，名符其實，職員全部都享受緊佢哋嘅輕鬆時刻囉⋯
嚟喇嚟喇﹗我哋叫咗兩款餃子，兩張相一樣？nonono，你睇餃子由裡面散發出嚟嘅色澤係有少少唔同的，餡料唔一樣，我記得一款係經典嘅白菜豬肉餃，另外嗰個係咪冬菇定係韮菜？要day幫手記記～另外個醋醃雲耳就好醒胃，之前經驗所得，想食蔬菜唔好咁油都係叫個湯好啲，今次就試下個冬瓜湯啦，啖湯都幾清甜～
埋單時一樣「輕鬆時刻」，見到阿老闆娘好隨意咁塞啲錢入櫃桶，又好隨意咁拎幾張紙幣出嚟找贖，相信裡面應該一團糟﹗﹗唔好理人哋了⋯:p
除咗素菜館多之外，更多嘅就係賣禮佛嘅用品同埋佛像之類嘅宗教物品～
張入場券好似好勁咁，唔係搣飛入場而係嘟飛，摸到裡面似乎係隻CD Rom呢，不過我哋拎到番嚟都冇睇過添～
雍和宮准善信燒香禮佛，不過只可以用「大會指定」嘅香，買咗入場券可以免費領取一束，但大會只鼓勵大家每次點三支香，所以呢度唔會太大煙，環境都相對清新少少～
我哋R聽人哋導遊講，原來兩隻獅子係一男一女，大家分唔分到呢？左邊凑緊獅子baby嘅係媽咪，踢波嘅就係爹哋囉～突然間有威風凛凛變成好cute添～
雍和宮係滿州人統治時期嘅建築物，所以牌匾上都有四種語言，紫禁城入面都係咁樣嘅呢～
呢道就係正正式式嘅雍和宮了，即是以前四爺嘅寢室～
殿宇裡面都唔准影相，只好放入個腦度save了，藏傳佛教嘅佛象形態上同我哋平時見嘅唔係好同，印象最深刻係其中有超巨型佛像，有幾層樓高呢～另外其中有啲殿入面展示咗啲宗教題材嘅藝術品，有啲好精緻嘅刺繡畫～
贈香處－－就係我頭先講可以免費領取香嘅地方喇～
逛完雍和宮，孔廟同國子監就正正係旁邊，當然唔好錯過啦～今次嚟北京都冇乜買過啲乜，我哋係呢度一間紀念品店買到小小手信俾爹爹，係老子經典句子嘅啤牌，爹爹最近係嶺南長者學院教老子嘛，成日聽佢講要搵題材，見到呢幅啤牌就諗起佢了，有冇拎出嚟玩過？
孔廟同國子監係聯票，可惜我哋時間唔夠，逛完孔廟就要走啦～孔廟大家可能熟悉啲，孔廟就係供奉孔子嘅地方，至於國子監其實就係管理科舉考試嘅部門，亦培育精英人材，我都唔係好sure，大家可以睇睇wiki：
http://zh.wikipedia.org/wiki/%E5%9B%BD%E5%AD%90%E7%9B%91
咁我哋去參觀孔廟啦～對於孔戈十月月相對冇咁陌生，話晒中四嗰年去山東嘅交流團都有參觀過孔廟，details我就唔記得lu～所以你話打blog係咪好重要呢～:D
入場就見到笑容可掬嘅孔子像，感覺佢非常和藹可親呢～平時對孔子嘅印象就係中學時讀嘅零零碎碎嘅論語，係呢度有個展館講佢嘅生平，原來孔子細個時雖然家貧，但因為係貴族後代，所以都有書讀，大個做官，但官運唔如意，佢覺得教學生更有意義，孔子唔係淨係教人生大道理嗰啲㗎，佢對於德智體羣美都重視㗎～
呢度係進士題名碑，元、明、清三代嘅51624名進士嘅名、藉貫、名次，果然可以流芳百世呢～
如果好仔細睇啲字嘅話⋯不過而家好多都變得好淺色了，要瞇起眼至睇到少少～
原來所有孔廟嘅大殿都叫做大成殿～入到去大成殿大開眼界呢，一直以為孔廟只係供奉孔子，原來其他儒家老師們都有分等級，有個位去供奉㗎喎～我要search番至知，呀，係啦，裡面供奉嘅係「四配十二哲」，明明都係人類啫，做乜搞到好似滿天神佛咁呢？百度百科有四配十二哲嘅文章：
http://baike.baidu.com/view/892649.htm
想知多啲關於孔廟同國子監可以入嚟呢個官方網站：
http://www.chinakongmiao.org/templates/T_detail/index.aspx?nodeid=26&page=ContentPage&contentid=988
之前朝陽門地鐵站咪有隻鳳凰朝住太陽飛嘅，幅壁畫點咗題，雍和宮地鐵站一樣好有特色，金璧輝煌好有皇室氣派﹗
係時候返香港咯，我哋返去北京火車站領取寄存嘅行李，跟住就搭機場線去機場咯～我哋來程時係搭的士，機場線都係第一次搭﹗oops，家姐借我哋嘅「北京八達通」我哋充值過一次，但用到咁上下啱啱唔夠搭機場線，唯有俾cash啦～機場線快捷舒服，讚呀﹗
check-in後我哋入到候機室時間都好早，雖然呢張相嘅陽光非常柔和舒服，但我心情其實煩躁不安，一來又行到好攰啦，又好渴啦，我哋搭嘅班機嘅候機室係底一層，因為要轉搭接駁巴士先上飛機，嗰度又細又焗又冇位坐，我只係想飲啲嘢有個舒服嘅位置坐坐啫～心情直到⋯
買咗罐可樂嚟飲，坐下休息下就心情暢快番晒﹗大家見到嘛，呢罐係五月天「倔強」可樂嚟㗎～呢排大陸嘅可樂做緊歌詞包裝，我好lucky中咗五月天呢，之前見過賣廣告仲有「傷心的人別聽慢歌」等等，家姐後我哋少少去咗上海，佢好似幾乎全部款式買齊晒，大家可以遲啲去佢個blog度睇下，點去？我個url你delete到rita，蛇蛇後面變咗catherine就係啦～
叉一叉電，返到香港繼續努力﹗
北京之三十登長城旅程完滿結束
前往其他中國旅遊blog
============================================
感謝 Rita 提供以上資料
Rita的網誌: http://www.wufamilyblog.com/~rita/
============================================
累積瀏覽 247264
全部攻略 705
全部回應 10
