由 Rita 於 2014-05-31 00:00:00 發表 | 累積瀏覽 497
返到嚟香港家姐問好唔好玩呀，我話好攰丫﹗﹗家姐話，去北京玩預咗㗎啦～四日之中，呢日算係最最最攰嘅一日，因為要去超巨嘅紫禁城參觀，而且天氣仲超熱，太陽不留情面咁曬曬曬﹗﹗
由位於王府井嘅木棉花酒店出發﹗日頭我哋嘅庭園房就睇得更清楚了～話就話有庭園，但邊個人會走出去個狹小空間度坐呢？仲要俾走廊啲人望住添～不過經過走廊時又覺得同大自然特別貼近，酒店設計都好有心思嘅～
今次訂酒店唔包早餐，我都一啲唔擔心，反正應該周街都有好多小吃店吧？我哋尋晚夜麻麻嚟到，都唔係好知四園環境，原來我哋住嘅酒店位於東華門大街，係一條兩旁都有好多大樹嘅美麗大街呢～
老闆好落力係門口招我哋入去，我哋就揀咗酒店正對面嘅小店食早餐﹗
冇俾餐牌我哋睇，佢就咁講咗幾樣嘢，好啦，嚟到北京感覺上應該要食下餛飩，雖然廣東話講「餛飩」同「雲吞」一樣，但北方嘅餛飩應該係好唔同嘅東東吧～唔，都係正常嘅豬肉餡，用紫菜嚟做湯底都幾好，返來可以參考下，差不多端午節，我呢個愛粽之人梗要試下北京嘅粽子啦，細細隻，一張粽葉就包裹住了，原來係甜粽，包咗紅豆沙餡﹗飲品就叫咗豆漿，原來係冇甜味嘅熱豆漿，健康啲啦～
東華門大街盡頭原來就係東華門，真係古時啲城門吧？
本來plan上午去咗天安門廣場、人民大會堂、國家歌劇院、國家博物館嗰堆先，其實就正正係故宮前面，因為故宮應該行好耐，入面據聞都冇乜好嘢食，咁行到好餓又未出嚟咪麻煩囉～但行行下我哋發覺原來唔准由東華門過去天安門廣場呢，可能係人流管制吧，一定要去故宮嘅最北邊再繞個大圈至得⋯錯有錯著，我哋就行咗故宮先啦，之後肚唔肚餓唔理得咁多住了～
家姐強烈推介一定要用語音導覽﹗﹗呢個其實真係做得幾好，有廣東話已經係一大優點(但我哋懷疑講解嗰個人唔係真正嘅廣東人，因為佢講乾隆皇帝有時會讀「kin4」呢個真正讀法，但有時會變咗乾淨個乾囉～)，而且全自動，你唔需要知道自己去到邊再按幾多號number，又有地圖顯示位置，你聽過嘅個紅點又會自動熄滅，非常好﹗我哋之前去西班牙遇過糟糕嘅語音導覽就更加覺得呢個好呢～(請參閱：5-11-2013：西班牙day 6(part 2)．Cordoba．並存的大教堂與清真寺)
入到去就要「嘩～」一聲了，好大、好廣闊、好宏偉⋯仲有⋯好多人﹗﹗哈～
呢個位有啲搞笑，我哋正想set自拍王時，忽然有個好熱心嘅大嬸主動過嚟話幫我哋影，咁當然求之不得啦～第一張係我本身set咗10秒，但唔知點解按時又變成冇set，第二張嘛，大嬸幫我哋影，但又有10秒功能⋯結果⋯umum⋯冇張好囉～呵呵～
太和殿前面有兩個古時嘅重要工具，右邊嘅大家可能一睇就知道係時鐘，靠嘅就係太陽嘅方位同影子啦，而左邊嘅存放咗各種量度單位嘅標準～
有明星？﹗nonono，有好多宮殿都冇開放俾人行入去睇，有個小小嘅門可以望任去，大家於是就瘋狂的嚓嚓嚓～
我對眼都睇唔到入面有乜，要全靠伸高架相機至見到乾隆親筆嘅「皇建有極」牌匾咋～
非常精美嘅石雕，巧手都算難得，最難得係唔知邊度搵咁大舊完整嘅石頭嚟雕刻～
好多時電視劇嘅宮庭戲，皇帝御座上面都有正大光明呢四個大字嘛～睇番wiki，原來最初係順治皇帝寫的，後來康熙同埋乾隆都有臨摹，而家眼前嘅就係乾隆所寫的﹗語音導賞話我哋知，原來以前會一早立太子，直至雍正有見自己親兄弟為咗爭皇位而好多爭執甚至互相殘殺，雍正之後就改咗立太子嘅方法，唔會一早公佈，而係一式兩份寫有太子嘅名字，一份自己貼身收藏，另一份就放係「正大光明」後面，到自己死後大家對番兩封遺詔就知道邊個係下一任皇帝喇﹗乾隆就係咁樣公佈出來了～
另一方面呢個位又講到雍正當時究竟係咪真命天子，有民間講法話當年康熙冇好明確話傳位俾邊個皇子，臨終時有份遺詔話傳位俾四皇子(即是雍正)，但大家講可能原本係傳位俾十四皇子，雍正再擅自刪改，我睇「步步驚心」時都有放呢個小插曲入去，語音話應該唔係真的，因為遺詔應該係漢文、滿文一式兩份，漢字咁樣改到啫，滿文就應該改唔到了～
殿宇之間間中有啲建築物改建為博物館，收藏各種古物，呢度就有個青銅器展～
御花園－－我有少少失望呢，以為會好大好華麗，不但比唔上歐洲嘅皇室庭園(請參閱：7-11-2013：西班牙day 8(part 2)．阿卡乍堡之美麗庭園@Sevilla)，而且比起江南私宅嘅庭園都差呢(請參閱：20-6-2010：上海世博遊day 5．城隍廟、豫園、南翔小籠包、阿信的展覽)，唔單止細，而且佈局又冇話好精妙，花花草草又唔係好多，反而放啲奇石、奇木係度～
呀，呢個鈞瓷展覽我好鍾意丫﹗原來係用含有礦物嘅土去做，透過reduction同oxidation嘅原理去做出各種奪目嘅顏色﹗好靚～大家可以睇下鈞瓷嘅wiki知多啲：
http://zh.wikipedia.org/wiki/%E9%92%A7%E7%AA%91
故宮裡面都有再付費嘅地方，呢個珍寶館展覽我諗最吸引應該係九龍壁了，北京另外一處有九龍壁嘅地方就係附近嘅北海公園了﹗
點解又有個皇帝寶座？nonono，原來當年乾隆後生時好尊敬爺爺，即是康熙，康熙做咗皇帝61年，乾隆話佢唔會做超過60年去表達對康熙嘅尊敬，講嘅時候估唔到自己咁長命，佢就起定個宮殿等自己退位時住，佢果然遵守自己嘅諾言，在位60年後就退位俾個仔，但一直唔捨得放手，一直操控政權到生命最後～
珍寶展入面果然有好多各種珍貴石頭、珍貴金屬做成嘅玩意兒，做工好精緻～但行到呢度時我哋已經好累啦，最大樂趣就係坐係冷氣風口旁邊⋯冇出息⋯:p
皇宮實在太大，啲路望落去全部都差唔多，又有啲宮殿要維修close咗，好難搵～我哋開始肚子餓，發現捱得到出去前應該都行唔晒，但我話有個地方一定要去﹗
就係養心殿了﹗因為「步步驚心」我至好想嚟北京的，雍正登上王位之後，佢就搬咗去養心殿住，而若曦就以姑姑嘅身份係度住，做佢背後嘅女人～
養心殿既有住處，亦有辦工嘅地方～果然，電視劇真係只係參考歷史再加工呢，電視劇嘅養心殿靚好多㗎～
記得以前係QEH做houseman時有個「養心軒」，係俾員工休息休息嘅地方，個名嘅出處應該係養心殿吧？
仲要去埋有聽過個名嘅儲秀宮，我記錯咗呢度係選秀女嘅地方，原來呢度最出名嘅係女妃嬪住嘅地方，其中表表者就係慈禧太后了～點解要影舊石頭？原來呢舊係水晶，代表住後宮妃嬪嘅冰清玉潔，亦同時提醒警惕佢哋要保持冰清玉潔﹗
呢楝坐落係御花園旁邊，睇落新穎啲嘅宮殿，原來係溥儀個洋人老師嘅住處～
有個館特別介紹呢位末代皇帝，佢接受中西方嘅教育，比起學習，佢更喜歡各種新鮮玩意～長輩送咗最左邊嗰個東東俾佢，我唔記得個名叫乜，總之就係提醒做人要持守中庸之道，唔好自滿，個杯子中間有條桿穿住，如果裝水半滿就好地地，但一裝滿咗就會倒瀉㗎啦～結果我哋好多地方都逛唔晒呢～但已經筋疲力盡了⋯臨走自拍番個招牌先～
故宮博物院嘅官方網頁：
http://www.dpm.org.cn/index1024768.html#
待續
前往其他中國旅遊blog
============================================
感謝 Rita 提供以上資料
Rita的網誌: http://www.wufamilyblog.com/~rita/
============================================
累積瀏覽 247281
全部攻略 705
全部回應 10
