2-6-2014：三十登長城day 4(part 3)．閱微莊四合院酒店

仲記得上一篇blog最一兩張相嗎？我哋由朝陽門站行出嚟，抬頭都係好新穎嘅商業大廈，乜我哋要住嘅胡同真係會係呢度附近？

沿住條大街行，轉兩個彎，就變成北京胡同嘅風貌了﹗

到啦﹗我哋今晚要住嘅閱微莊四合院酒店﹗

http://www.hotel37.com/index.asp

plan今個北京trip時有幾樣嘢都好想做，一樣係上長城啦，一樣係食北京烤鴨啦，呢兩樣都完成了，第三樣就係想住下四合院﹗係網上可以預約嘅四合院旅館真係好多，但大家評價非常參差，大多數講嘅問題都係冬天熱水唔夠熱、舊房子有陣味，為咗令今個生日旅程唔好因為呢啲風險而有不良回憶，我決定book呢間所有comment都一面倒好嘅閱微莊四合院酒店﹗果然都不負所望，experience果然非常好呢～

可能入住嘅大多數都係鬼佬，所以櫃枱小姐都assume我哋係海外嘅華人(？﹗)，開口先講咗英文先，直至我哋拎咗回鄉證出嚟同埋同佢哋講普通話先至轉番channel﹗似乎接觸客人嘅職員英文都好好呢～

我哋入住嘅係蜜月套房，主要原因係我實在抵擋唔到有得住公主床嘅引誘，heehee～職員帶我哋去房間，左穿右插，原來間酒店都幾大呢～沿途經過好多靚靚嘅庭園，我哋陣間一定要再出嚟影相﹗好在專登早啲過嚟啫～

房間好大，而且陳設古色古香，好有中國風味，傢俬都好似古董咁嘅樣～

不過古典風味之中，都要配合現代人嘅生活，房間有電腦可以用，有free wifi，浴室係現代化嘅浴室，有充足嘅熱水供應，古典嘅床裡面居然有部LCD電視係牆上呢～

房間仲有complimentary嘅茶葉供應，仲有香片、龍井兩款揀添呢～我哋食完晚飯返嚟都泡咗壺茶嚟飲～

相比起坐得正正嘅椅子，我更喜歡呢張daybed(？)～

蜜月套房至有嘅公主床同埋龍鳳被呢～好高興啊～不過龍鳳被原來只係裝飾用途，好在趁早影咗相﹗晏少少有職員拍門入嚟，原來佢會幫你再鋪床，換上實用又方便清洗嘅白色被鋪，都好丫，衛生啲～

古裝床裡面嘅電視機，正～

浴室冇特別整到中國式，總算舒舒服服，似乎冬天個熱毛巾架會開埋呢～

仲有免費嘅水果盤﹗不過我哋都冇時間同胃嚟享用了～

好，出去逛逛啦～呢間就係我哋嘅蜜月套房了﹗啲decoration有時我覺得over咗啲，太多lace好似唔係太中式，有呃鬼佬之嫌～

舒適嘅庭園﹗

我哋路過其他房間，有啲外國遊客真係坐係門前嘅庭園睇下書，好好enjoy個環境呢～

四合院貓貓～

時間差不多，我哋去埋食晚飯啦～四合院自己嘅酒吧同時都係餐廳，出番去大街太遠啦，我哋就係呢度解決啦﹗估唔到餐牌入面，西餐嘅選擇比起中餐更多，大概都係迎合大多數嘅外國遊客吧，我哋覺得係中國都係食中菜穩陣啲，叫咗兩餸一湯，食物質素都唔錯﹗

要介紹下呢個啤酒雞﹗平時啲甚麼可樂雞呢，食時只覺得有甜味，可唔可樂都唔係太覺，但呢個啤酒雞真係好啤酒﹗事關佢加啤酒嘅方法就係臨尾直接讓啤酒滲透出嚟，沾上煮熟嘅雞肉上面，居然好搭調，好味～唔飲酒嘅day都覺得唔錯～

蒜蓉西蘭花就梗係好食啦，同我炒嗰啲差唔多味，但比起我煮嘅優勝，大概係佢切得啲西蘭花細粒啲，所以熟透都唔會太腍，又可以保持青綠﹗

我哋仲飲咗西湖牛肉羹，原來唔記得影相添，都好味道～

夜裡嘅四合院又有另一番景緻呢～

我哋沖完涼就匿埋係張公主床度啦，要講講睇咗個好好睇嘅節目，之前經過王府井大街都有見過呢個節目嘅廣告，就係「中國成語大會」，聽落個名好似好正經嘅教育節目咁，其實有趣刺激呢，參賽者組隊比賽，通常都係一做一猜嘅形式，好似玩超級無敵大電視咁，但要鬥快，所以你用「第一個字點點點，第二個字又乜乜乜」一定會好慢，所以重點就係要用一句說話形容出嗰個成語嘅精髓，而隊友腦海入面嘅成語bank一定要好大好廣分類好清楚，雙方都唔可以不求甚解，反應一定要夠快又口齒伶俐至得，佢哋真係好勁，可以用廿幾秒猜到五個成語﹗﹗後尾又有另一個玩法，只用兩字詞語去形容個成語，隊友估唔到就交個chance俾對手，大家累積information，鬥快估得中～估唔到成語比賽都咁好睇呢～再一次覺得⋯唉，香港啲綜藝節目真係好唔掂，冇乜文化又唔夠吸引，唔好話我哋成日鍾意睇韓國節目啦，連大陸節目都咁優秀～

中國成語大會官方網站：

http://kejiao.cntv.cn/2014zgcydh/

待續

前往其他中國旅遊blog

Google+

Rita Wu

============================================

感謝 Rita 提供以上資料

Rita的網誌: http://www.wufamilyblog.com/~rita/

============================================