5-4-2014：番禺清明遊day 1(part 2)．長隆香江野生動物世界

其實去番禺長隆度假區都幾方便，因為廣州地鐵可以直達呀﹗上一次返鄉下番禺時，番禺都仲未納入廣州範圍之中，所以交通出入都係靠大巴、車仔嗰啲，感覺係點對點交通，要自助遊就唔方便，但而家有咗地鐵，出廣州市中心、去其他周邊城鎮都方便咗好多，可能因為咁，番禺發展都好咗好多吧﹗

去到長隆站，出口已經有好多同度假區相關o既裝飾lu~我哋一人揀一個嚟影張相先~雖然我揀咗熊貓，但結果我哋都冇機會睇到熊貓添~因為時間太少，太多嘢睇丫﹗

其實成個長隆度假區好大，主題樂園都有五部分，分別係我哋今次會去o既長隆香江野生動物世界、長隆國際馬戲大劇院，同埋我哋唔會去o既長隆歡樂世界、長隆水上樂園同埋廣州鱷魚公園，要全部去晒的話，嚟三四日都唔過分~今次媽咪同家姐揀去動物園其實我開頭都有少少擔心o架，因為細個時去大陸o既動物園留低過陰影，記得嗰陣有隻熊俾人同佢影相，但工作人員control隻熊o既方法係同鐵絲圈住佢個鼻，見到都心酸，嗰次之後都唔係好敢再去大陸o既動物園lu，不過佢哋話，隔咗咁耐應該好唔同啦~好啦，即管一試啦﹗

大家可以入佢個官網睇下~

http://gz.chimelong.com/index.shtml

我哋進入度假區後，其實有shuttle bus可以免費來往幾個景區，我哋見都唔算太遠，就決定步行過去野生動物園，途中就經過歡樂世界喇，吸引我哋目光係因為聽到尖叫聲，哇，呢個過山車嘛，由頂衝落嚟基本上係垂直囉~我其實對於玩機動遊戲都ok的，不過隨住年紀大咗，對於挑戰自我，甚麼極刺激，要贏其他人o既心態已經唔存在，我成日都用「夢幻遊樂園」PC game嚟做比喻，今時今日o既我，要求o既遊戲係歡樂度高、嘔吐度低、反而刺激度唔重要，每次要舉例時就要講之前去大阪Universal Studios時嗰個過山車喇(請參閱：25-11-2009：大阪白浜day 2(part 1)．環球影城之日)﹗

好，我哋過到去動物園入口時只係下畫兩點幾，時間充足，因為開到六點半~但係發生咗不愉快事件，哎吔，而家事隔兩個星期，火氣都冇晒lu~話說我哋係香港中旅社買好動物園同大馬戲o既套票，理應去到票務處換番入場券就ok，但出問題﹗佢哋發現中旅社發出o既門券銀碼同佢哋on site賣o既套票價錢唔吻合，咁平咗嗰幾十蚊中旅社認唔認頭呢？所以佢哋急急忙忙要打長途電話搵負責人，我就焦急得不得了，爹媽姐恒係入口處等，我同day去換票，但換極都未換到，只係望住工作人員不停的賣票俾其他遊人，跟進我哋案件o既效率超慢，佢越慢、我哋玩o既時間就越少，我哋有提出，不如我哋俾現金o既差價，但又唔俾喎，係嗰度拖咗我哋有大半個鐘丫﹗媽咪都超憤怒﹗好在最後都入咗場，但第時都係盡量唔幫襯中旅社了，次次都冇好嘢~記得當年(應該有廿年前)我同媽咪係中旅社報名，媽咪放手袋係後面俾人偷咗，職員面對住應該睇到犯人吧，聲都唔聲，嗰次又係一肚氣﹗

平伏我心情o既係呢啲優美o既火焰鳥，見到佢哋之後我o既心平伏了~

同家姐嚟個合照先~

家姐部超級zoom相機真係冇得同佢比囉，咁細咁遠o既紅鶴都可以zoom到咁近~呢張有咩特別？大家記得有一次Running Man o既動物園任務嘛？成員要影到兩隻紅鶴合成o既心心圖形，家姐任務成功了~

盲中中行咗去紅鶴池之後，我哋決定要有少少規劃，我哋之中最有條理o既家姐提議我哋一定要去得成Safari on the Wheels，因為佔咗成個園o既範圍有成三分之一，所以我哋向住嗰個方向行，中途有啱睇o既就停落嚟睇啦~

路過黑猩猩o既屋企，唔…因為佢哋太似人類了，被困係細小o既玻璃房，感覺少少落寞呢~

呢個叢林發現值得一看丫﹗入去時都唔知講乜o既~原來係講園入面o既保育工作﹗

有個好專注工作o既…蠟像？展示中？乜而家啲蠟像做得咁真o既咩？oops，見到佢郁先知原來係真人…似乎工作人員唔係扮緊嘢，而係真係工作中喎~

哇，仲展示咗初生雀鳥baby丫~我就話光禿禿好可愛，day就話好恐怖喎~仲有人工孵化中o既鳥蛋添~

呢個展館仲有啲俾動物用o既醫療器材，好似CT呀、手術室呀咁，有需要o既話唔知係咪真係會係度做手術呢？

展館o既尾段叫我嘩一聲，因為day叫我o既其中一個別名叫「胡連連」，因為有一排我曾經非常迷一個電腦遊戲叫做「寵物連連看」，哈，就同呢個相似喇，呢度仲可以四人對戰添~

繼續睇其他動物﹗可愛活潑o既猴子﹗呢堆相都要鳴謝家姐了，我個相機影唔到咁近，更加捕捉唔到佢o既精靈可愛o既神髓了~

爹爹同day咁專心睇乜？

原來係鵰兄呀﹗係神鵰俠侶入面o既鵰兄大概係咁o既吧？威風凜凜咁o既模樣﹗

你睇佢凌厲o既眼神﹗﹗﹗(再次鳴謝家姐^.^")

係我心目中，犀牛應該唔算可愛o既動物，但呢隻小犀牛第一次叫我對呢種動物改觀﹗﹗因為佢原來好敏捷，跑來跑去跑得好快呢~

就係佢了﹗

呢隻蜘蛛猴都叫人印象難忘，因為佢身手非常矯捷，除咗手腳四肢之外，佢有第五肢﹗佢o既尾巴好靈活同埋好好力呢，夠力可以拉起成個猴o既重量呀~究竟佢爬嚟爬去係向遊人炫耀定係真係天生咁佻皮呢？

我哋觀察咗好耐o既猴子大族群，因為佢哋最多動靜、最靈巧了~有氣定神閒o既猴子老爺爺啦，有係猴子媽媽旁邊鑽來鑽去、又彼此打架o既小猴子兄弟呢，有為咗爭食跳落水o既為食猴啦，好有趣~

經過好多吸引o既動物，我哋終於到達自Safari on the Wheels~好在一車可以載百幾人，所以一嚟到就有得上車了﹗

我哋四人一排登上小火車~

爹媽就坐係後一排~出發﹗

一車載到好多人，而且一排只係坐四人，左右兩邊都有動物，所以都睇得好清楚丫~

呢個園區特別之處係，除咗我哋可以坐小火車之外，駕車人士仲可以駕自己o既私家車入去參觀添，鍾意係邊度睇耐啲，空間充足的話仲可以停係度慢慢觀賞動物添~大家開大車窗、天窗，確實冇人犯規落車，但啲小孩子伸咗大半個身出嚟，已經同小動物們融為一體了，哈，係差在未有人開開蓬跑車入園啫~

動物種類好多，由溫和o既草食動物，到兇猛o既獅子老虎都有，而且動物們活動空間都足夠，果然國內o既動物園進步咗好多﹗我話，呢度動物o既density同variety真係同真正o既safari差好遠呢，真正o既safari唔係放啲動物係路線o既兩旁，而係，路就起咗係度喇，啲動物過唔過嚟附近就睇佢哋心情咯~(請參閱：17-12-2012：斯里蘭卡day 10．動物safari@Yala)

係呢個園區，我哋仲見到電影「爸爸去哪兒」啲父子們住o既小木屋，我哋去時都唔知大陸都有拍呢個節目，仲出咗電影版，之前只知道韓國有呢個節目，我哋返到嚟仲特地搵咗嚟睇，我哋認識o既爸爸有林志穎同埋前跳水運動員田亮囉~唔，內容都幾有趣，但如果係上演大銀幕又好似唔係好夠看頭了~

其他safari入面o既動物都只係拼貼圖，每人只分到一小格，點解呢隻影得濛濛地o既羊我會俾佢獨佔一張相呢？因為…

我哋話佢個樣好似「神魔之塔」入面中o既惡魔巴風特﹗﹗呢隻將心符石變成暗符石o既傢伙，你話係咪參照上面嗰隻羊嚟設計造型呢？

nonono~恐龍唔係safari入面~heehee，我哋出咗嚟啦~

我哋行咗入呢個園區之後都不禁納悶，咁多真實o既動物們俾我哋睇，點解要去睇假嘢？不過兩秒後就釋懷，事關我哋最近有去睇過科學館o既「巨龍傳奇」，對於這些年來啲機械恐龍o既巧妙製作o既進步印象好深刻，香港嗰個展出同好多國家合作，啲恐龍模型唯肖唯妙，但今次睇o既恐怕係100% made in China吧，而且係幾年前o既貨色，居然都幾神似噃~入到去呢個加埋啲閃光效果，啲細路都嚇到wee wa大叫呢~

出到嚟有呢隻食蟻獸，我諗我都係第一次見到佢真身吧~

好可愛o既雀仔三人組丫~

點解會乖乖排排企？

鴕鳥對我嚟講都有回憶，當年同媽咪跟可風去紹關，嗰陣參觀鴕鳥園，我嗰陣仲騎過鴕鳥添，不過鴕鳥完全唔顧及我感受，係度飛快奔跑，我呀，慢慢由佢pat pat度跣咗落地囉~

仲有恩愛交頸o既長頸鹿~

我哋都恩愛自拍啦~

見到長頸鹿就會諗起光洙「ki-rin~ki-rin~」﹗﹗原來長頸鹿條脷超長丫﹗好似毒蛇~

罕見o既白袋鼠，睇真啲介紹，原來佢哋係普通袋鼠o既albinism，所以其實唔係另一個品種~白虎都一樣吧~

時間剩低唔多，要取捨睇下最想去邊，我話想去考拉園(香港人對於考拉呢個名唔熟悉吧，我哋通常叫佢哋做樹熊，睇介紹講，原來佢哋唔屬於熊，反而係袋類動物，應該同袋鼠更近似，所以叫樹熊會有啲誤導吧，呢度仲考拉呢個名就係英文o既Koala音譯吧~)﹗原來呢度o既樹熊已經有五代同堂，而且好多都係係長隆繁殖o既呢，佢哋係澳洲以外最大o既樹熊族群﹗呢度o既樹熊都唔係我哋印象中o既咁懶惰呢，尤其係下面兩幅o既大小樹熊，都冇導演指示，小樹熊就自動擺出souvenir o既揹揹經典pose了﹗超可愛~

完成了﹗我哋足足行到過咗六點半~進發到下一站，長隆大馬戲﹗

待續

前往其他中國旅遊blog

============================================

感謝 Rita 提供以上資料

Rita的網誌: http://www.wufamilyblog.com/~rita/

============================================