探險家攻略 > 27-4-2011：上海pre-wedding+杭州day 3(part 1)．搭高鐵往杭州去、滿意的酒店

27-4-2011：上海pre-wedding+杭州day 3(part 1)．搭高鐵往杭州去、滿意的酒店

由 Rita 於 2011-04-27 00:00:00 發表 | 累積瀏覽 334

分類：

影完相完成任務，之後嗰幾日都係去玩玩玩囉~我哋第三日就會出發杭州，都想係杭州spend多少少時間，因為以前去親都係即日來回，係網上睇真係好多地方幾有趣，如果多啲時間希望可以去多啲地方呢~今次自己玩有前後三日喎，應該唔錯啩~(當時天真地諗…:p)

因為之前食過酒店早餐質素麻麻地o既緣故，我哋決定出街食﹗之前係我哋住嗰間酒店o個條路行過少少見到有間賣湯包o架，即是小籠包吧？點知我哋九點左右去到佢未開門呢，四周行下都唔係好似有咩鋪頭仔食下地道嘢咁，算啦算啦，KFC都好啦，可能都有啲特色食物啩~

真係幾特別喎，早餐時間竟然樣樣早餐都冇？﹗得番兩款，day要左田園雞堡餐，比較「KFC」，我就要咗粥同油條﹗(唔係雞粥同埋唔係雞肉油條，但都唔知點解關KFC事…)另外加多份XO醬蘿蔔糕(似乎都同KFC冇關…)~麻麻地啦，粥同蘿蔔糕都ok，但個油條真係怪怪地，同香港食o既唔同囉，好實~哎吔吔~後來我哋出去，先知道呢啲餐供應至9:30am，因為係特價早餐，之後就要食貴啲o既東東lu~我哋走時個餐牌已經換晒第二啲啦，難怪佢樣樣都賣晒啦~

返酒店時經過先一晚幫襯o既乳酪店，R到wifi喎，呵呵~

我哋執拾好行李就出發，打算坐高鐵去杭州，好似都係一個鐘左右咋~

浩浩蕩蕩咁去到上海站…點知…oops﹗資料搜集不足﹗原來大多數去杭州o既火車都係上海虹橋站instead of上海站出發的，好在，我哋係上海站o既自動售票機都買到去杭州o既高鐵車票~冇辦法啦，再坐番地鐵過去虹橋站啦~

不過都唔係一件容易o既事，雖然上海都算係國內數一數二o既大都市，但處處都好多障礙，拎住大件行李o既我哋要出入一啲都唔方便丫~呢條斜路…一啲都唔user-friendly，其實係「free fall under control」，最後day都係就咁抬番落嚟就算…

終於見到令人感動o既「大件行李專用通道」，好興奮咁衝過去，但結果…個拍咭位置係失靈的﹗嘟咗冇反應又唔開閘﹗虛有其表﹗笑到我哋兩個彎咗腰…哈哈~最後都係經過番啲「一個人行專用窄道」先過到去~

另一樣搞鬼o既係，原本諗住1號線係陝西南路轉10號線去虹橋，咦？﹗點解要出站先o既，又要再買票o既？原來呢個「轉車站」係專for智能卡user的，我哋單程票應該要分開買票or係第二個站轉，咁我哋唔知嘛，買咗票直接去到虹橋，咁同出閘個職員講，佢就咁開咗個閘俾我哋出去啦，我哋心諗…得唔得o架？﹗原來要行出街再過多幾條馬路先轉到去另一條線﹗我哋入站時當然出問題啦，同個入站職員講，佢又就咁放我哋入去了，搞笑﹗

經過一波三折，好在都去到虹橋站…離開車仲有接近一個鐘，我哋食咗lunch先啦~個站好大好靚好新，食物選擇都好多，我哋揀咗永和大王~

我要咗紅燒牛肉麵，day要咗炸菜肉絲飯，加個芒果布甸，職員問我哋要唔要餐，day話要啦，飲品要豆漿…上菜時又搞笑咯，有兩杯豆漿一杯熱檸茶，原來其中一個餐有嘢飲，而啲豆漿佢就當我哋散叫…搞到有兩個人三杯飲品o既局面﹗爆笑咗一輪，我好沾沾自己咁聰明地，倒咗杯檸茶落去本身嗰支康師傅紅茶入面，ok~食物味道都唔錯呀~

高鐵站好大好靚~可惜食飽飽之後時間唔多，方便一下之後都要過去月台lu~

自動售票機唔係太醒目，兩個人買票都冇得安排一齊坐，好在我哋旁邊個位冇人坐，可以順利搬過嚟~雖然…最後兩人都呼呼大睡…

時速去到三百幾o既高鐵﹗正~

噢，去到杭州嗰邊落雨丫﹗慶幸o既係，我哋已經影完靚靚婚紗相，但擔心o既係，落咁大雨點係杭州玩呢…

落車lu~

因為行李都幾多，所以都搭咗的士去酒店，先要同一大堆人逼逼逼逼逼，半排隊地上咗的士，然後嘛，第一次體會到杭州o既塞車情況，呢個嘛，之後總有好多機會再講﹗高架橋理論上係紓緩交通吧，但都係塞塞塞﹗大家上橋落橋cut線cut左cut右，難怪咁塞~好在去到酒店都係搭咗RMB 22啫~

呢間係我自己上網揀o既酒店，係holiday inn o既express系列，因為係大陸住酒店先前都有啲不良經歷，諗落都係揀間有牌子o既穩陣啲﹗

不負我所望~

個酒店大堂都見得人丫﹗比起上海o既華美國際大方時尚得多了~

我都好鍾意個房間呀，我「嘩」o既係居然有iphone loudspeaker o既鬧鐘，我都好想有一部呢，day「嘩」o既係，房間o既thermostat係Honeywell牌子，佢話係行內有名o既大牌子，靚嘢嚟o既喎~果然係電子人﹗房間、浴室都好好，仲有梳化添~正﹗

稍為休息一陣都再出發了，希望第一日都去到少少地方~

諗住試下搭巴士，我哋酒店對出個站叫做石灰垻，呢度個巴士網絡，有咩車搭呀、點樣轉車呀，都可以上網search定，都幾好~我哋都成功搭巴士去到西湖丫﹗