17-9-2010：台北宜蘭trip day 6．台北探索館、101大樓

嚟到旅程最後一日咯，時間都唔多，所以只留係台北逛一逛~其實爹媽兩人熟台北熟到不得了，仲有咩地方想去呢？睇旅遊書發覺有個新新地o既「台北探索館」，咦，我哋都未去過，就今日去行下啦~而且位置就係台北101旁邊，即是可以去埋誠品添~(每次去台北都想去誠品旗艦店﹗:p買買買~買一大堆返來﹗呵呵~)

我哋住o既Just Sleep酒店好近地鐵站，所以去邊度都咁方便﹗

台北探索館其實位於市政大樓入面，叫做有四層啦，都幾多嘢睇o架~

展品都好多，而且立體的、平面的、互動的都有，所以都好有趣~內容主要係講台北o既歷史，但唔單單講政治方面，講咗好多民生呀、建設呀、音樂藝術都有﹗

夠鐘開show lu，入去發現劇場搵個靚位先~咁啱又遇著一班中學生校外教學，佢哋又同我哋睇同一個show~

個theatre係圓形的，有360度螢光幕，我哋坐係中間o既「轉轉盤」上面，睇晒360度o既影象﹗貫徹影片內容o既係幾封書信，有唔同國藉民族o既人，居住係台北，然後寫信俾佢哋遠方所愛o既人，有父子、情侶、朋友，配上七彩繽紛o既畫面，動人o既音樂，條片拍得好好睇啊~又可以將台北唔同o既角度展示出嚟，又唔係單純o既旅遊特輯or城市概況，入面投入咗感情，好good~

呢度講幾個唔同民族o既小朋友，佢哋係台北o既生活係點樣咁，又好似要接觸下啲傳統東東，detail唔係好記得lu，要問番爹媽…:p

好搞笑，有電子求籤﹗

你睇佢哋睇得幾投入﹗不過大家支籤o既分別，好似只係「上上上上籤」同埋「上上上籤」o既分別，總知就係必勝啦﹗樣樣好~heehee，都係氹下遊客歡喜啫~

我之前講呢個museum好interactive嘛~

例如就係咁了﹗要睇嘢嘛，郁一郁﹗舒展筋骨至得~另外仲有好多實物原大o既模型啦，又有可以俾人聽歌睇片o既地方啦，都好有趣，特別係爹媽對於呢個城市有一份特別o既感情添~佢哋對比下三十幾年前o既台北同埋今日o既台北，又睇下啲古老嘢，事隔咁多個月我都仲諗得到媽咪興奮個樣呢~

一由個市政大樓行出來就係台北101了﹗我都未試過行過去行得咁近呢~

雖然有自拍王(區區在下…哈﹗)，自拍嚟講角度唔錯，但閃光燈唔夠強，都係背光添~anyway，有一張三人一齊影o既都唔錯丫﹗

花博快要舉行了，雖然無緣參觀，但都影下啲宣傳擺設啦~

普通巴士一架﹗但上面o既廣告係我嗰一排好迷o既韓劇「個人取向」﹗哈，影得切~yeah~

幾好喎，有得自助咁租單車~不過我哋冇時間試試lu~

台北101o既入口~

我哋去咗food court食嘢，太太太太太多選擇了~又抵食﹗我去過o既又可以比得上佢o既food court似乎只有吉隆坡雙子塔嗰個啫﹗又係勁多間鋪頭~最後一日啦嘛，我揀咗台式﹗其實主要係貪有得飲湯﹗不過個米粉同埋豆腐花都好好味丫~

都冇乜點逛個商場呀，主要都係啲名店，同埋又冇乜時間呢，影完呢張相好似就俾人阻止咗了，唔准係商場入面影相喎~

我都唔記得咗我哋係食嘢前定後去誠品書店，但都記得我買咗幾本書同埋T shirt，有邊幾本書係呢個trip買o既呢？又唔係好記得添﹗:p呀，我記得我買咗本勁好睇o既書，叫做「不去會死」，講有個日本人踩單車環遊世界的﹗當時冇買埋第2、3集，返到嚟香港先後悔呢，但係香港搵唔到呢…睇下遲啲邊個去可以幫我買番嚟啦~

台北宜蘭trip–完滿結束~

前往其他台灣旅遊blog

============================================

感謝 Rita 提供以上資料

Rita的網誌: http://www.wufamilyblog.com/~rita/

============================================