23-6-2009：花蓮day 1(part 1)．由台北出發去﹗

呢幾個月番工都算番得辛苦咯，終於等到期待以久o既旅行﹗其實過去呢年去旅行去得算幾多…不過因為番工時間太長，硬係覺得等好耐等好耐等好耐先到annual咁…anyway，今次我o既目的地係台灣o既花蓮，而我o既伴就係connie喇﹗

台灣對我o黎講唔算陌生，點解又諗到再去呢？話說本身plan去大阪o既，點知臨要買機票時日本爆豬流感，咁咪卻步o羅，o個陣邊度估到香港咁快追得上先得o架~上次去台東時家姐買o左D旅遊書，通常「花東、花東」，花蓮總會包括埋係D旅遊書入面，當時睇到D圖片就已經好吸引我咯~美麗o既太平洋﹗

影第一張相時已經去到台北桃園機場lu~今次主力相機係之前新買o既大SONY HX01﹗D相真係好出色丫~睇落就可以欣賞到了~

我o地搭國光客運出番去台北車站，其實係機場時有好多間客運公司向我o地兜生意，但上次搭o既就係國光丫嘛，搭過安心D o既~

去到台北車站，乜都唔好講住，買o左花蓮o既車票先~因為係香港有睇定D班次，所以都心中有個譜~本身想搭o個班快車冇得一齊坐呢，所以改搭慢少少o個班~要搭三個鐘﹗好在有帶書o黎睇娛樂娛樂~

距離13:20 o既火車有時間，我o地上去車站二樓o既微風搵o野食，呢度集合o左五十幾家食肆呀，好誇張﹗上面都交投活躍，員工都走晒出o黎兜生意~感覺有少少似去o左日本﹗

結果揀o左呢間叫做「翰林」o既茶館~

原來呢間連鎖店o既老闆就係十幾廿年前首創珍珠奶茶o既人﹗而家分店已經遍及台灣唔同地區啦~首先創造出o黎o既係白珍珠奶茶，不過十日之內就創出為人所熟悉o既黑珍珠奶茶喇﹗

不過我o地呢餐冇飲珍珠奶茶…因為個套餐唔包﹗不過普通o既冰紅茶都好好味~我手握住o既係等上菜時o既小食脆片~有少少似新年o既蛋散~

我o地叫o左兩個茶麵share o黎食，一個係豬肉麵，一個係花枝蔬菜麵，兩個都幾好~

趕趕地，埋好單就要衝過去月台啦~

火車都好準點~

上次去台東都搭過咯，台灣o既鐵路座位都好舒適乾淨，水準唔錯﹗雖然比起日本o既JR差少少，但都夠晒舒服啦~椅背上插上小小o既座位証明~

車票~我o地買好來回票，來往花蓮雙程大約800台幣，兩程都係自強號列車，車程兩個幾至三個鐘啦~

帶o左鄭梓靈o既舊小說o黎陪我度過呢三個鐘﹗

見到綠色o既景物越o黎越多，就知道我o地越o黎越接近我o地o既目的地花蓮咯~

待續~

============================================

感謝 Rita 提供以上資料

Rita的網誌: http://www.wufamilyblog.com/~rita/

============================================