6-2-2009：第一站高雄．六合夜市

估唔到十二月先去完cebu，咁快又有得去旅行，真好﹗話說此行本身係要去台東參加朋友o既婚宴，但適逢佢o地家族又有白事，所以就唔會係家鄉台東舉行lu，結果就變成一個探訪+觀光啦~

拎o左下晝半日假，三點左右離開醫院，因為買好o左五點幾o既機票呀，會合爹媽，同埋今次同行o既大姨，一齊出發咯﹗check-in後仲有少少時間，仲食埋個大快活西多士下午茶添﹗

每一次去旅行都總愛影張咁o既相，作為旅程o既開端﹗

今次坐o既係港龍航空公司，特徵係…飛機餐特細份﹗我o地有個笑話，送餐時，空姐同我o地講：「慢慢食﹗」爸話呢句說話真係可圈可點，呵呵~「慢慢食﹗好細份o架咋~食得快好晒冇晒~」「慢慢食~慢慢享受﹗」「慢慢食﹗咪哽親﹗」…仲有好多可能性~

去到高雄lu~其實今次主要去台東，不過香港冇直航飛機去台東嘛~

由機場搭捷運出去市區，我o地o既酒店就正正係高雄火車站旁邊~聽講捷運啟用o左唔係好耐o架咋，爹媽舊年o黎時都未啟用~所以無論係月台定係車廂都好新淨﹗

捷運o既單程票就好似深圳地鐵o個款咁~

呢個扶手o既設計非常好﹗有三枝﹗大家唔駛扶得咁逼~另一方面，如果有個人靠o左係個扶手上面，其餘o既人都仲有得扶，讚呀﹗

去酒店安頓好，我o地就去六合夜市進發﹗今次住o既係商務旅館，感覺有少少似日本o個D酒店，叫做康橋商務旅館，走廊呀、房間呀，都細細的窄窄的，但裝飾好新、乾淨企理又明亮﹗感覺都很好~

其實都唔係第一次o黎六合夜市啦，不過上次o既印象都少少模糊lu，只記得，千祈唔好飲菠蘿汁﹗因為唔係新鮮榨的…睇下有咩食先~

草莓﹗可以自選淋汁，有煉奶、蜜糖、朱古力or糖粉﹗我o地揀o左煉奶，好甜蜜o既味道啊~我同媽都大讚好食，爸就麻麻地啦~

媽叫我一定要影﹗因為係台灣史o既其中一部份呀，消費券~我o地今次呢趟旅程，周圍D鋪頭都可以用呢~

鮮果汁店，估下我爸買o左咩汁汁飲？有兩款材料係入面的，家姐一估就估中晒兩種，day都一估估中一款﹗day都好叻o架啦，佢都未試過同我爸一齊去飲o個種汁~俾著我都唔知第二款係乜~

臭豆腐真係好臭丫﹗不過炸得香香脆脆又真係幾好食，再加上醃菜o黎食，唔錯唔錯﹗

呢間咁有風味o既鋪頭係食擔仔麵o既~

其實我都唔係好記得擔仔麵係咩味lu~個湯底唔錯，真係用D魚乾呀、豬骨呀、蔬菜o黎煮o架~麵質都滑滑的，我都好喜歡食﹗

好得意呀D狗仔衫仔鞋仔﹗連羽絨都有﹗最有趣o既係一set四隻o既波鞋﹗

六合夜市，我o地都又食又買，滿載而歸﹗

番到酒店，本應即刻沖涼瞓覺，預備第二日行程，但俾我發現o左免費wi-fi上網﹗哇，我更愛我o既小LG了﹗隨身有部可以上網o既手機，貴得有價值﹗

============================================

感謝 Rita 提供以上資料

Rita的網誌: http://www.wufamilyblog.com/~rita/

============================================