14-11-2011：斐濟蜜月day 8．Beqa Lagoon的海底世界

嚟到Lalati第二日，一個good morning梗係由早餐開始啦﹗Lalati係all inclusive package，一早俾嘅錢已經包括咗一日三餐，所以每一餐都叫人期待呢～

早餐一定先有個擺得靚靚嘅水果盤﹗﹗既清新又健康～早餐嘅主菜可以係餐牌上面揀，我哋住咗三晚，正好試多幾款口味～

呢張雙人吊床無論瞓幾多次都唔會厭呢，加上斐濟無懈可擊嘅天氣，正～

睇到我哋嘅行裝就知道我哋今日嘅行程咯﹗冇錯，我哋會出海水浮潛﹗今次同Oolala唔同(請參閱：10-11-2011：斐濟蜜月day 4(part 1)．超讚的Oolala day cruise)，上次Oolala係大船載住一大棚人出去大海度浮潛，今次係小型出海，一個教練帶住我哋兩個去「游」覽一下Beqa Lagoon﹗最近重睇番張小嫻嘅麵包樹系列，第二集嘅「麵包樹出走了」講嘅就係一個斐濟女孩去香港尋歌手夢嘅故事，亦係我人生第一次接觸斐濟呢個地方嘅點，故事講男主角係斐濟潛水時遇難(後來當然先知佢冇死到啦)，原來潛水嘅地方就係Beqa，以前睇時只覺得係斐濟嘅「嘰哩咕嚕地方」，去過再重睇就發現，哦，我都去過lu～

Resort嘅自家碼頭，yoyoyo，出海lu～

可惜天色麻麻地呢，好似要落雨要落雨咁～

哎吔吔，又有血腥場面﹗雖然係細細隻嘅船仔，但海上嘅浪都唔可以講小的，拋一拋我成個人pat pat離開張椅，滑稽地坐咗係地，手踭一撞就傷咗咯，而家(打blog時係2.5年後)仲留有疤痕呢，係斐濟帶多咗個「紀念紋身」返來了～

好了，教練拋低咗錨，固定好隻船，我哋一行三人就可以落水啦～

天色認真麻麻地，望望遠處嘅島嶼，有種神秘氣氛呢～

今次浮潛魚仔冇Oolala嗰次咁多，但珊瑚都係形狀各異，色彩繽紛，令人目不暇給﹗﹗大家要仔細留意珊瑚中嘅魚仔，見唔見到Mo仔呢？

其實大家去Beqa Lagoon通常會潛水，不過我都係怕怕，唔敢誇出呢一步，Beqa有別於斐濟其他嘅潛水點，係佢有斐濟唯一嘅shark dive﹗我就冇去過喇，不過可以一齊睇下關於shark dive嘅網頁同埋video：

http://fijisharkdive.com/

大家第時去咗記得影啲相同video俾我睇下啊～

對於呢個Beqa浮潛我印象最深刻嘅唔係海底世界嘅美，而係好強勁嘅浪﹗﹗我哋開頭跟住教練游時逆風，我覺得自己好努力好努力咁游都只係唔後退，完全唔感覺到前進囉，如果日日係度咁樣落力游⋯一定會瘦﹗﹗哈～不過呢，上次去Oolala我想要啲安全感所以拎咗條浮浮條，今次冇呢啲嘢其實仲自由，因為浮浮條令你上半身動作唔自然，今次冇束搏，可以專心咁游同埋欣賞海底景色﹗

佢就係我哋嘅教練了﹗amazing嘅地方係，我哋著住輕便嘅泳裝已經游得好吃力，但大家留意，教練著嘅係牛仔三角骨褲﹗﹗即是等於揹住包米嚟游，但佢身手依然好矯捷，呢啲就係日日鍛練嘅能力～

游完水當然好餓啦，沖個涼要好好飽餐一頓﹗Lalati供應嘅午餐通常都係比較輕便嘅食物，今次係wrap～

個天谷咗成朝，我哋回程時開始落雨啦，到下午已經一發不可收拾，所以整個下午我哋都只好匿埋係房囉，知道嚟斐濟會多啲空閒時間，我哋事先都係香港帶咗啲VCD嚟睇～睇下戲，休息下啦～

原本嚟Lalati都有好多諗法，因為睇佢個網頁都有各種complimentary嘅活動，其中我有想參加嘅包括行山同埋kayaking，後來都因為持續落雨而取消了，有時去旅行就會係咁，要放開懷抱，接受各種變化嘅狀況都ok先玩得開心嘛～以下係Lalati有提供嘅活動：

http://www.lalatifiji.com/complimentary_activities/

所以下一張相已經係晚餐了﹗

晚餐比較豐富，有三個course，detail同味道都唔記得了，總之Lalati嘅所有餐飲體驗都係非常好的﹗﹗讚～

Lalati有兩隻動物朋友，狗狗係人類嘅好朋友，至於貓貓就比較unpredictable，大家聽日嘅blog blog就會見到佢～黑麻麻之中有少少燈嘅就係我哋嘅蜜月小屋啦，小心地滑，所以大家嘅門匙都附上小電筒的，如果唔係真係黑到見唔到條路呀～

待續

前往其他斐濟旅遊blog

============================================

感謝 Rita 提供以上資料

Rita的網誌: http://www.wufamilyblog.com/~rita/

============================================