探險家攻略 > 16-12-2012：斯里蘭卡day 9．居住在森林和原野@Yala

16-12-2012：斯里蘭卡day 9．居住在森林和原野@Yala

由 Rita 於 2012-12-16 00:00:00 發表 | 累積瀏覽 567

分類：

一早起身，我哋要收拾細軟準備出發去Yala了﹗當然出發前都歎番個靚早餐先啦～

我哋住嘅Aqua Zen房，連度門都非常型格﹗

今日天氣更好呢，有啲陽光，影出來個海顏色更有層次了～早餐我哋繼續要light選擇，有French toast配水果沙律，另外有wrap配蕃茄scrambled eggs﹗都係新鮮選擇～

臨走前係Cantaloupe Aqua Beach Club Hotel前個大A字影番張招牌先～

下一張相已經係幾個鐘之後嘅下一間酒店了﹗今日都花咗一個早上搭車，由Talpe去位於Yala National Park旁邊，我哋要入住嘅Chaaya Wild Yala有176公里呢(啱啱用Google Map)計算過，即使最順利都要三個幾鐘，但只計距離咋喎～我哋一早搵咗Talpe嘅酒店櫃枱幫我哋預約司機，最初講係講去Yala，司機就assume咗係去Tissamaharama，事關大多數去Yala National Park嘅遊客都係Tissa落腳，嗰邊有多啲酒店選擇，但今次我落重本揀咗住Chaaya Wild Yala，係因為佢就正正係國家公園入口旁邊，係agoda.com啲人comment都話酒店簡直就似係野外入面，小屋四周都好多小動物，咁吸引所以貴啲都住囉～但原來Chaaya Wild並唔係咁多人識，個司機去到嗰頭都要問路，而且比佢想象中遠好多⋯入去條路仲好崎嶇難行，凹凹凸凸嘅泥濘路，拋下拋下咁，但嗰架車只係一架普通嘅客貨van，真係有少少委屈咗佢同司機，所以司機都老實同我哋講收費要加碼，因為遠咗好多公里，佢成本都真係高唔少嘅，我哋都冇異議嘅～

條路好難行(只係架車行啫其實)，但去到酒店就好高興了﹗雖然係位於野外地方，但佢同時都係好舒適同現代化嘅靚酒店﹗我哋check-in係坐定定有工作人員嚟serve同埋介紹㗎～佢哋英文都好好同埋好nice添～

大家可以入去酒店個website睇下：

http://www.chaayawild.com/chaaya-wild-yala-sri-lanka.html 酒店有分beach chalets同埋jungle chalets兩款小屋，中間就係餐廳活動中心前檯complex，仲有個游泳池添～但天氣唔好，我哋逗留係呢度時間唔長，所以都冇打算去游水了～

呢間就係我哋嘅森林小屋喇﹗對於佢真係又愛又恨，好喜歡佢位於好多樹木中間，好休閒好舒服，但啲森林小屋s間間都一樣樣㗎﹗而且分佈得好零散，所以要認路認得好辛苦﹗日頭時出入都感覺安全啲，但入夜後路燈極微弱，要搵番自己間小屋好有難度﹗其實酒店有接送服務㗎，即是你如果要由小屋出去前檯嗰邊，可以打電話出嚟要求職員送你，但我哋有成兩個人，感覺又好似誇張咗啲囉～

外面係樸素嘅森林小屋，其實內裡係豪華舒適嘅現代化房間，正﹗可惜我哋瞓得係度嘅時間好短，因為第二朝要超早起身去safari丫，天未光矇矇鬆鬆就要起身啦～

除咗靚之外，同埋都好寛闊，又設備齊全，行李都唔駛就咁攤係度，有行李corner，浴室都好好～

第一樣歡迎我哋嘅動物係野豬呢～佢地自在的四處走動，旁若無人咁～

我哋上咗所謂觀景台望望，其實就係餐廳嗰楝樓嘅天台，夜晚嘅時候呢度係間bar嚟添～

正後面係個小池塘，再遠少少嘅係印度洋嚟㗎～雖然之前去過印度咁耐，但都未見過印度洋，只見過阿拉伯海，但今次嚟斯里蘭卡就接觸到印度洋喇﹗不過用「接觸」呢個字，家姐就適用，我嘛，正確嚟講都只係望過啫⋯:p (請參閱：9-12-2012：斯里蘭卡day 2(part 1)．Negombo at a glance)

肚子餓了，填飽佢先，因為時間都晏晏地，我哋決定食少少就算喇，叫咗一個pizza一個湯嚟share食～不過呢餐就食得不太暢快喇，因為有好多飛飛丫，而且仲係污糟嘅代表烏繩，不過我又唔會怪酒店唔乾淨嘅，咁係野外丫嘛，乜動物都要接受㗎啦可？

呢啲叫未出發先興奮﹗我哋聽日嘅safari會唔會見到咁多動物呢？好期待啊﹗我哋去咗呢張相後面嘅safari服務部預約聽朝嘅tour，其實基本嘅係天濛光tour，其實可以去多一個夜間safari㗎，不過我哋又唔係狂熱到咁，而且價錢都唔平，又唔想太cher，所以只去一個就ok啦～

我哋係酒店範圍都可以睇動物﹗池塘有雀鳥啦～

仲有唔同種類，當然我哋就唔識分啦～我哋今個trip用嘅相機係比較重嘅傻瓜單反機，畫面都好靚，但zoom嘅距離冇以前嗰部咁遠，呢啲時候就會覺得可惜了，如果部舊相機係度就可以好清楚睇到隻雀啦～

話說我哋想返去酒店房，唔知點解條鎖匙開唔到門，於是day就行番出去front desk問問情況，我就留守係小屋前面嘅小陽台坐坐等佢哋，因為落雨都落得有啲密了，我唔知專心係度睇書定點樣，抬頭一望⋯

哇，嚇我一跳﹗一個野豬家族丫﹗我驚一驚郁一郁，佢哋飛奔去咗隔離間小屋個底部避雨呢﹗好在我都影得切呢個難忘嘅一幕～

因為落雨，所以整個下午我哋都係小屋hea啦，好在帶咗boardgame來，我哋兩個人都可以摩力橋一番﹗大家唔知咩係摩力橋可以wiki一番：

http://zh.wikipedia.org/wiki/%E6%8B%89%E5%AF%86%E7%89%8C

今個trip我哋五個人都玩得越嚟越純熟，媽咪玩到上上地癮添～

小動物⋯仲有佢都算吧？

我哋到晚飯時間先再出動﹗

原來餐廳serve自助餐，都好丫，上次去高原茶工廠嗰次食過個自助餐都唔錯，嗰個就係斯餐，今次就西餐斯餐都有，更啱我哋口味～