18-5-2010：東京埼玉trip day 4(part 2)．台場DECKS．筋肉擂台．大江戶溫泉物語

嚟到東京o既台場區~呢度其實都有好幾個地方吸引咗我嚟呢~

落車o既第一站先去DECKS商場，因為呢度有筋肉擂台主題樂園呀﹗

遠離東京o既心臟地帶，有少少度假feel o既台場區，人人嚟到主要都係shopping啦、relax啦、玩樂啦~節奏都慢啲，人都冇咁密集﹗

入面有一個「台場一丁目商店街」，係懶懷舊嗰啲地方，除咗賣啲精品之外，仲有懷舊零食同埋懷舊遊戲，又有俾人影相o既地方~放個頭係紙板上面係得我會做…呵呵~好喜歡右上o既社長口水肩﹗

當然仲有好緊要o既Muscle Park啦~入場無料o架﹗但玩games就當然有料啦，而且逐樣計$$，玩多幾樣都幾肉痛o架~不過我哋唔識日文，主要都係睇人哋玩~

by the way，見到我手握住個袋嘛？heehee，因為係DECKS有斬獲﹗呢排見到我日日揹住嗰個大朵花藤袋就係呢個商場買o架喇﹗

好多大家熟悉o既game都有得玩，右上係足球射九格啦，左下係擲棒球啦~不過呢，有啲考反應、考平衡、考協調嗰啲games就要識日文先玩得lu，如果唔係就唔明啲instructions囉，我哋唯有睇下人哋玩啦，一樣咁有趣o既~

仲有個「台場小香港」﹗呢度就荒蕪少少~食肆就有好幾間，會唔會飯餐時間先至多啲人流呢？

呢度仲有個SEGA o既遊樂場o架~不過Connie就唔係太好呢啲games，下次先嚟玩啦~反正下年四月又會再去日本，應該都會stay下東京o既﹗

商場o既室內好多有趣o既東東，令人眼花撩亂，外面o既景色一樣好呢﹗

行出嚟戶外就見到個海濱公園~下面仲有人造沙灘呢~

我哋都落咗去海濱公園o既草地坐咗一陣，感受一下日本人o既忙裡偷閒﹗大家各自各都有唔同o既活動呢，放下狗啦~隻狗仔超得意﹗好似毛毛狗狗玩具咁~又有人帶下啲B出嚟啦，小女孩係為day而影的﹗又有人嚟打棒球啦、影婚紗相啦~hee，我挽住嗰個就係新袋袋啦，作個狀影張相啫﹗都係番嚟先用啦~

好好~去台場o既下一站﹗

好似叫Palette Town調色板新城o既商場，主要係想坐下呢個摩天輪呀﹗好大，而且七彩繽紛呢~

入面仲有個Toyota展示場喎，男生們就有興趣啲啦，我哋見入場又唔駛錢，都入去睇下啦﹗

入面不但展示咗唔同年代o既Toyota汽車，右下圖展示咗啲未來汽車，唔知真定假喇﹗呢度入面仲有條大車道，有呢啲電動車仔係上面行走，等遊客們可以試坐o架~有趣o既係，佢哋定期會舉辦車仔o既填色設計比賽，小朋友可以為汽車設計佢哋喜愛o既外型同裝飾，得獎o既作品係會真係整出實物，然後係呢度行駛o架~咁就有好大滿足感啦﹗

好啦，我哋登上摩天輪啦﹗見人唔多，我哋稍為等一等就可以坐到全透明車廂了﹗

全透明嘛，景觀就變成360度啦﹗

可以望得好清、好遠~雖然兩個女孩子坐唔係咩特別浪漫o既事，但都係一個令人暢快o既經驗呀~

呢個商場仲有好多靚o既鋪頭，童裝店成層都係呢﹗呢一間可以買到時尚o既童裝﹗諗起day睇雜誌講，要小朋友成功做到model，去casting時o既注意事項，係呢間鋪頭就可以買到必須o既leggings了﹗

Aqua City原來內部裝修到成個威尼斯人咁呢~不過入面啲名店確係幾相似﹗係度我發現咗呢間鋪頭…究竟係咪真係可以戴上手呢？

大概六點幾七點，我哋要嚟到今日o既重點目的地lu~大江戶溫泉物語﹗

係Palette Town有免費shuttle bus過來呢~我哋來回都搭咗~

呢個地方有咩特別？就係大家著住浴衣係江戶時期o既街道食嘢、玩，同埋可以浸溫泉丫﹗特別有風味o架~夜晚入場仲有折扣添~

我哋check-in之後，拎咗locker鎖匙，亦即係你入面o既消費記錄咭，就過去揀浴衣o既counter，揀浴衣款式同埋腰帶，唔同款式配唔同腰帶都有好多combination，所以入到去都唔會撞口撞面﹗我哋唔識著浴衣嘛，好在更衣室有圖畫教你著浴衣o既steps﹗大概都有唔少遊客嚟玩吧~著好了﹗好靚呀~

我揀咗呢件米色o既浴衣，配上粉紅o既腰帶~connie如常地低調地揀咗深藍色，係我逼佢先揀番條明亮啲o既黃色腰帶﹗

隨便逛一圈之後決定食嘢先，因為要食完嘢休息一陣先可以浸溫泉嘛~

食物o既款式都好多喎，有一檔檔好似美食廣場咁，我哋買咗一款撈烏冬、一款拉麵~其餘可以選擇o既仲有壽司呀、炸嘢呀、餃子呀之類~凍熱o既水、綠茶、麥茶都免費飲呀﹗good~

食飽咗都唔可以即刻浸溫泉o既，咁就周圍玩下啦﹗我哋先出去庭園外面試一試足浴，足浴唔駛沖涼除衫，所以可以著住浴衣行出去就ok，都好細心呢，有外套可以借用，足浴遠處有個池，有嗰啲俾魚仔啄下啄下嗰啲池呢，不過就要額外收費了，以前係御溫泉都有試過~

抵受唔住日式古老遊戲o既誘惑，而且嘛，俾錢係「嘟一嘟」咁簡單，唔小心就花咗好多錢~我哋玩咗「撈波波」同埋「擲忍者飛鏢」﹗撈波波成績都唔錯o架，你睇右上嗰幅相，起碼比撈金魚簡單o既~擲飛鏢呢，我都叫做中咗個靶不過要中紅心先有獎呢，我算唔算有做忍者o既potential呢？

左上角嗰度係一個劇場，入面有人演戲，我哋雖然唔識聽，但都感受到熱鬧o既氣氛o既~右下角嗰個遊戲機係電子撈金魚呀﹗日本仔真係乜都有~

溫泉﹗溫泉﹗因為場地好大，溫泉池o既數目都好多呀﹗內湯有成七八個，外湯都有四五個~逐個浸一陣都花唔少時間呢~爽呀~

泡完澡，更衣室入面連護膚品呢﹗用過啱o既可以買，真係識做生意﹗

食埋甜品至走~

返到新宿，見到漫畫書入面成日出現o既拉麵宵夜店呢，不過我哋又飽又累，都冇試添~

仲有最後一日行程~

待續

============================================

感謝 Rita 提供以上資料

Rita的網誌: http://www.wufamilyblog.com/~rita/

============================================