18-8-2013：即興曼谷day 3(part 3)．年青的Asiatique吃喝買玩夜市場

我哋去到碼頭時好似啱啱miss咗一班船，所以係個碼頭度都等咗幾耐下，我哋坐低休息下、闔下眼瞓、又上下網咁，到上船再出發時天色都開始暗暗地lu~不過唔緊要，我哋今日剩低落嚟o既行程係去行夜市，天黑都唔怕~行程係家姐編的，我對佢完全冇懷疑，家姐揀的一定好，所以我都唔知我要去邊…哈哈~總之佢簡介話我哋要去o既夜市係由舊貨倉改建，我心目中係一個陰陰暗暗o既大室內空間，然後啲攤檔好似會展擺美食展咁乎？後來先知原來呢個叫做Asiatique o既活化夜市係好潮o既東東嚟o架~

開始少少日落，太陽映落去河上面閃閃的更靚呢~

Asiatique位置係比較冇咁熱鬧o既地段，河兩旁開始出現啲新式住宅區，呢個樓盤感覺好香港呢~

原來可以出去船頭甲板﹗哇，已經遠遠見到Asiatique個摩天輪lu~

Asiatique o既碼頭好有歐洲風情呢，一間間o既露天餐廳~啲building果然係貨倉﹗同我想像唔同o既係，原來唔係一個貨倉，而係一個貨倉area，好似劃分成十區左右？呢度好大，唔同區域有唔同風格，較靠近碼頭o既係比較高檔次少少o既鋪頭，靚靚裝潢的，而後面啲o既就平民啲，貨品呀、食物呀價錢都平易近人啲~所以只要你嚟到，總搵到適合你o既呢~

大家可以入去Asiatique個官方網頁參考下：

http://www.thaiasiatique.com/index.php/en

我哋由平易近人o既貨倉開始行﹗賣o既比較多係女孩子喜愛o既時裝精品，我哋都有收獲呀，我同家姐都買咗啲衫衫，仲要好平嗰隻，唔講價都覺得好ok﹗手信+自用方面，我係幾間唔同o既spa用品店買咗好多番梘，day用咗我買返嚟o既番梘之後，對手工皂有咗興趣，仲買咗兩本書返嚟研究添，但睇佢個款應該都唔會行動啦，因為太多材料要買﹗我其實都幾鍾意用呢啲唔同香薰味道o既番梘，間仲換下又轉下心情嘛，而且用嚟代替洗手液，番梘既環保啲，而且仲好襟用添bor~我另外又買咗個掛牆o既磁石notice board，其實一見到就俾佢上面個slogan吸引咗了—-「DREAM IT, WISH IT, DO IT」，有諗過佢o既size，捧返嚟香港會唔會太困難？但只係捧一個磁石板返嚟都怕煩，點可以實踐到夢想呢？所以唔單止買咗，仲買咗個大o既﹗﹗呵呵~呢度有好多有創意o既tee，我都買咗幾件俾day~

我哋買呢個雪條其實都有少少故事，我哋見到幾個女生好滋味咁舔緊雪條，而且顏色係好特別o既咖啡色，我哋問佢哋係邊度買，哦，原來係呢間o既奶茶味雪條﹗﹗好消暑呀~其實呢個雪條感覺都「好容易肚疴」o既樣子，因為佢冇遮冇擋就咁係個冰櫃入面，但turn out我哋兩個都安全﹗所以泰國真係不太嗱咋~我哋周街食嘢好似都ok~

入夜了，唔知家姐指咩俾我睇？

可能就係呢個靚靚o既摩天輪夜景lu~

呢個時候我哋都差不多搵嘢食﹗我哋冇乜咩target，入咗去一條巷有好多靚靚餐廳酒吧，我哋揀咗一間泰國餐廳入去~結果嚟咗四日，好似每一餐都係食泰式呢~

睇番之前啲相，我原來真係好鍾意+常常食生冷嘢~繼早上食咗香蕉朱古力新地，晏晝食咗椰子雪糕，啱啱食咗奶茶雪條之後，而家仲要飲埋生冷嘢之中o既皇者，西瓜沙冰﹗﹗﹗唔知而家戒咗生冷嘢o既我，暫時過咗個冬天都ok，唔知捱唔捱得住嚟緊o既夏天呢？

家姐就話要試試佢o既啤酒~

餐廳氣氛好好，除咗樓底高，桌椅放得散多空間之外，仲有live band，質素都唔錯丫，個女主音聲線好好聽，可以上電視o既程度，又唱英文歌又唱泰文歌，感情豐富，而且仲有團員和音呢~好似後來有得俾人點歌，不過我哋唔識啲泰國歌所以都冇點~

食物都好好，但我哋好似叫得偏鹹，唔係好平衡到~

夜晚o既摩天輪更靚呢，不過我哋冇錯丫，又唔係情侶~ :p

為咗避免最尾嗰一兩班船太多人，我哋早啲啲走，係碼頭附近見到呢間好似鬼屋o既東西？﹗應該要活化咗佢變成可以入去探險o既鬼屋﹗﹗>v<"

byebye Asiatique，值得一到o既夜市，與其話佢係夜市，其實更加似一個半露天o既商場，嚟到感覺好年青呢，因為好多曼谷青年嚟呢度玩~我點都要影下呢個俾大家睇下啦﹗﹗之前食晚飯已經飽到上喉嚨，但家姐果然去旅行時食量o既爆發力非同小可，返到酒店附近佢要encore多個芒果糯米飯囉，恕我今次奉陪唔到了，佢其實都唔駛我陪，佢一個人食都叫咗大size囉，一整個芒果嗰隻…勁﹗

待續

前往其他泰國旅遊blog

============================================

感謝 Rita 提供以上資料

Rita的網誌: http://www.wufamilyblog.com/~rita/

============================================