探險家攻略 > 17-8-2013：即興曼谷day 2(part 1)．學做泰廚之逛市場篇

17-8-2013：即興曼谷day 2(part 1)．學做泰廚之逛市場篇

由 Rita 於 2013-08-17 00:00:00 發表 | 累積瀏覽 369

分類：

距離上一篇blog好似又隔多咗一個月，唔好意思，大家久等了~之後我可能會補寫斯里蘭卡trip未完成o既blog先，稍候再返嚟曼谷blog，事關有個舊同事準備下個月去斯里蘭卡旅行，佢話有捧我個blog場呢，既然係咁，我就為佢努力一下啦﹗今個blog o既相之前已經揀好upload好，我都係有頭有尾打埋呢篇先~

第二日o既行程其實係我心目中o既重頭戲嚟o架，之前咪講過今個trip大多係家姐plan o既，只有兩項行程係我o既must，一樣係勁勁spa啦，另一樣就係去Blue Elephant學整泰菜了﹗其實好早都有係facebook見過朋友去外地旅行學整嘢食覺得好正，自己都好想試下學整地道嘢，而係泰國學可能真係太common了，而家連旅遊書都有介紹，所以我哋好輕易就可以上網預約啦~

http://www.blueelephant.com/cooking-school/

入到個網時已經「嘩~」一聲，因為覺得好有規模呢，全泰國有好幾間分校，而課程由我哋參加o既half day體驗柴娃娃班到專業廚師班都有，而且學o既菜式亦可以係網上一目了然，仲可以揀素菜添~淨係睇個menu，呀唔係，係課程至啱，已經好想食lu~因為都好想快啲體驗，所以我哋都冇理咩餐單，揀咗第二日就去上上午o既半日堂~價錢其實都唔平，但係逛市場+學整四道菜+食譜+圍裙+禮物包都好抵啦~

雖然個心已經去咗cooking school，但都要俾下面間酒店，都略略講下出發前o既早上o既~

我哋住o既Novotel Platinum提供自助早餐，感覺款式唔算太多，一般o既西式早餐都齊全o既，但泰式選擇印象唔多，如果唔係我都會想試下啦~環境就幾舒服o既，而且繼續有高速wi-fi，可以同老公聯絡下~

我哋坐BTS去Blue Elephant Cooking School，因為怕難搵，我哋特地提早啲出門口~

但都好順利呀，原來係BTS個月台就已經見到佢了~眾多高樓大廈之間o既舊建築，更加可以見到佢o既超凡氣派﹗原來下層係餐廳，上層係廚藝學校，我哋被安排係二樓等埋其他學員先~餐廳o既玻璃門上面有好多「認證」，好似Tripadvisor推介呀之類，連香港o既新假期推介都有個貼紙係度呢~

我哋等候o既二樓大廳，同樣充滿古典風味~

奉上一杯香茅凍飲，俾你消一消暑氣先~其實我哋啱啱食完自助大早餐都唔係好渴，但唔好浪費一番心意嘛~

我哋坐下影下相時有四個吱吱喳喳講英文o既女子被帶過來，原來佢哋都係參加上午課程的，吓？到齊人喇？我仲以為大規模啲o既添~嗰四個女子都好熱情，問下我哋邊度嚟，我哋話香港咯，原來…佢哋都係香港人﹗不過應該係國際學校出身的吧，無論衣著、神情、口音都似足外國長大o既華人呢~後來先知其實佢哋都識講廣東話o既，到煮好我哋o既作品，坐埋一圍享用時大家都有傾過少少計~

出發咯，開始學煮食前，第一個節目係跟老師出去行傳統市場，原來又要搭番BTS，今次唔駛自己買車票，老師已經預備好一疊單程票，學員一人一張﹗落車後都有行一段路呢，所以唔好俾周圍啲嘢吸引而走失丫﹗落咗車之後，原來我哋要會合其他一齊上上午班o既學員，好似係一整團o既白人，咁都似樣啲，我心目中o既Blue Elephant應該係人氣高啲嘛，仲要係星期六喎~

當然去逛市場就唔係買我哋要用o既食材啦，嗰啲一早已經有職員準備好，我哋主要係去見識見識，不過老師們都確實有買嘢，係水果店就買咗紅毛丹同埋山竹番去一齊share了~對於我哋亞洲人嚟講，呢啲熱帶水果就一啲都唔陌生，不過佢哋o既英文名就唔係好熟，當時講過而家又唔記得番了~雖然平時見得多，但我娘家從來都冇買呢兩種水果返屋企食o既習慣，我都唔係好記得佢哋o既味道lu，今次食番，紅毛丹感覺係重口味厚肉版本o既荔枝，而山竹就真係驚為天人了，好蜜味好清新，不愧係果后﹗﹗後來想買啲返嚟做手信，但最尾一日又冇經過新鮮水果店呢~

我哋跟住老師走入去傳統市場，如果要比較以前去過o既其他傳統市場，我覺得泰國o既街市比較似大陸o既街市，環境比較陰暗，擺貨冇咁著重外觀，唔知係咪時間比較晏呢，交投感覺唔算太活躍~

水果店後o既第二站，係茶水檔﹗原來要先幫大家充一充電﹗咖啡o既舉手，奶茶o既舉手﹗我同家姐一人試一款~

兩個阿姐快速地預備眾人o既飲品~Blue Elephant應該係佢o地o既大客吧，一日嚟幫襯兩次，仲要每次都大手筆叫十幾廿幾杯飲品~

其實俾著我哋兩個自己嚟個街市，恐怕我哋唔會夠膽叫呢啲袋裝飲品，完全違背咗從小教導o既食物安全守則，但既然咁多Blue Elephant o既客人都有飲過，應該ok o既~一袋袋咁好有風味呢﹗味道嘛，奶茶果然係第一日時飲過o既超甜口味，但茶味都香濃，家姐個咖啡就真係唔錯喇﹗

可能有好多站？老師都行得好快，大家拉開距離，要加速咯~

蔬菜香草鋪 — 我手中o既係兩種煮咖喱用o既小茄子，以前都冇留意過咖喱入面o既佢哋添~係度，老師仲俾我哋傳住嚟聞各種o既香葉，大家o既反應都係「呀，我認得呢個﹗」、「呀，未見過﹗」之類~都係唔錯o既經歷~

傳統市場當然唔少得熟食攤檔啦，不過今次我哋只係路過，冇機會品嚐~

雜貨店 — 停留o既時間都頗長，因為有好多香料、材料要介紹，講下用嚟煮咩菜式呀咁，又俾大家試下聞下~然後呢度都係紀念品店﹗我都買咗蝦醬返去做手信呢，家姐好似買咗冬蔭公o既香料？買時我哋好高興，但後來都有少少後悔，事關下午我哋去咗遠遠o既地方逛露天市場，揹住啲手信好重呀~>.<

好有泰國風味o既一個攤檔呢，大大盤o既青檸，仲有呢啲不知名o既大豆莢，有冇人可以話我知呢啲豆莢係用嚟煮咩o既呢？

鮮魚檔就有好多我哋唔認識o既品種了，不過呢個唔係「景點」，所以老師冇介紹呢~

椰子、椰汁都係泰國人常用o既材料，呢個機器就係處理椰子用o架喇~

濃濃o既香料味~~當然唔少得泰國o既各式咖喱醬料啦~