探險家攻略 > 16-8-2013：即興曼谷day 1(part 2)．Siam商場走透透

16-8-2013：即興曼谷day 1(part 2)．Siam商場走透透

由 Rita 於 2013-08-16 00:00:00 發表 | 累積瀏覽 518

分類：

今次行程全權由家姐負責編排，好耐冇試過去旅行之前一啲都冇prep了，不過有佢係度我就放心啦~我有加意見o既就只有想去學煮泰國菜同埋想做一個好正好正o既spa啫~既然只係短短的小休息，而且我哋兩個對曼谷o既狀態都係同冇去過冇分別(上文提要，家姐上一次去泰國係小學，我除咗幼稚園時o既family trip之外，就只有F.7 A-level後同同學仔跟團去過~)，所以去邊都係咁新鮮o架啦~ 第一日o既行程，我哋一早預約咗個「輕便少少」o既按摩(事關day 4有個「重量級」o既spa)，其餘就係隨意逛逛商場，反正啲旅遊雜誌呀、書呀成日都講曼谷點樣開咗新商場，有咩精緻o既鋪頭呀咁，都想睇下係點~ 我哋係酒店附近換多少少$$之後就過去Siam嗰幾個大商場，哇，個rate真係好過機場超級多，大家去曼谷，記得係機場唔好換咁多錢呀~我哋酒店就係Siam，Novotel Platinum其實都唔係十分之方便，要行過去最近o既BTS都要10-15分鐘左右，所以後來我哋來往BTS站都搭tuk tuk了~搵路唔係太容易，因為街上唔多路牌or指示牌，我哋開咗google map，望住我哋自己粒圓點嚟行囉~ 我哋先去第一站Siam Paragon~ 幾個商場之中，Siam Paragon裝修最靚、最新、最大、最寬敞，行得舒服，不過入面比較多名店，我哋都冇乜點入啲鋪頭，啲餐廳睇落唔錯，我哋係度食咗嚟泰國之後o既第一餐﹗食咩菜式好？就泰國菜先啦~ 雖然係貴貴商場，但食嘢又ok喎，我哋都好手鬆咁叫都唔會比平時返工食一餐差幾多~家姐話試下果汁，我哋當時忘記咗cantaloupe呢個英文字係咩意思，不如就試下啦，哦，哈蜜瓜~我就試咗泰式奶茶，原來係好甜o架~不過都好，食辣嘢，甜啲用嚟救火好啲~右上o既係蝦多士，熱辣辣新鮮即製，唔會太油膩~右下o既鴨肉咖喱味道都好正統唔難入口，但左下o既香葉肉碎嘛，我真係要投降，辣得不得了~~~~~~~~~~~~~~我試過之後一直都迴避再夾嚟食，但唔可以剩低咁浪費嘛，後來食其他嘢食飽咗之後我係逐粒逐粒肉碎夾出嚟食囉，避開啲辣椒粒辣椒籽都仲頂得順~雖然勁辣，但都好令人滿意o既一餐~ 食飽飽我哋就逐個商場去逛啦~ 今次呢個trip四周都見到皇后o既大頭相，原來係佢生日~成個城市都大大慶祝呢，好多時係張相前面都有本簿，大家可以寫上祝福字句~ 叫人清涼o既噴水池~ 進入隔離個商場，哇，始源呀﹗﹗原來係佢做代言o既護膚品，我哋異想天開o既期望，始源會唔會親身嚟參與活動呢？但見周圍都冇fans圍住，應該都唔會lu~ 呢個商場啲時裝店周圍都特價特價特價，但有啲真係唔係好揀得落，有啲就折咗都仲好貴，好在我哋有的是時間，後來都有揀到啱心水的~ 睇下呢幅立體畫先~ 見到商場露天廣場有單車展覽，呢排好熱烈踩單車o既我當然要落去睇下啦，由單車到配件到裝備都有得賣﹗我揀咗件tee俾老公，設計懶係俾人踩單車時著，即是貼身戰衣？nonono，我老公唔會著嗰啲的，只不過係一件tee，後面多咗幾個袋，可以俾你放下嘢咁，好可惜返到嚟洗咗之後縮咗水呀~ 連接旁邊個商場(我真係搞唔清楚啲商場o既名，大家要知道的話要去我家姐個blog至得：http://www.wufamilyblog.com/~catherine)，仲有其他單車展覽呢，有啲好華麗似係裝飾用多過實際o既超長超大單車，亦有我哋童年時代o既舊款BMX﹗好叫人懷念呢~ 可愛o既鬆弛熊~ 嚟到呢個位已經有唔少收獲了，你睇我一袋二袋咁~ :p去到曼谷當然要買曼谷包啦，買咗一個手袋，一個食飯袋，真係要讚一下個食飯袋，平時返工出街食lunch，帶一個銀包一部電話一抽鎖匙一包紙巾真係冇手拎，而家一個小布袋就裝晒幾樣嘢啦，出街食飯方便好多，又唔駛帶晒成個手袋喎，good~ 我哋行到咁上下決定要搵咗我哋預約咗做按摩o既鋪頭位置先~ typical o既曼谷路面，勁多車，勁塞車，叫人好頭痛，難怪啲司機成日都想鋸你一筆，短短路程都咁花時間，賺唔到幾多又行唔好多轉，如果公共交通發達啲就好了~記起上次去杭州，因為起緊地鐵，周圍都係地盤，搭車都好唔方便~(請參閱：28-4-2011：上海pre-wedding+杭州day 4(part 3)．非誠勿擾拍攝地、杭州大廈) 今個trip book咗一個按摩一個spa，我哋決定先嚟個簡單的第一日急不及待時做咗先，再嚟一個豪華的做壓軸~呢間按摩係同事介紹的，叫Centre Point Massage，係曼谷有三間分店，我哋揀咗方便第一日行程的Siam Square分店~ http://www.centerpointmassage.com/ 唔好話我唔熟曼谷，我真係以為Siam Square係一個商場，我哋望住地圖，企係十字路口o既行人天橋，居高臨下咁望下四邊，係唔係大大嗰個商場係Siam Square呢，但方位又唔啱，原來嗰個係人稱曼谷旺中o既MBK Centre，原來Siam Square係一區地鋪雲集o既地方，人稱曼谷原宿o既至啱~concept糾正後，跟住地圖同地址對番好快就搵到Centre Point了~時間未夠，又拎住重嘢，都冇力戰鬥住，我哋決定搵地方坐坐~ 見到呢間可愛o既cafe就入去坐坐啦~ 除咗環境佈置深受女孩子喜愛之外，呢度仲有wifi上網﹗雖然我哋都有上網卡，但放hotspot出嚟又食電，點都唔及有wifi好o既~ 唔記得係咩飲品了，總之係果汁mix啦~ 我哋夠鐘就去番Centre Point~入去時先俾我哋坐係度等等(又係用住佢個wifi上下網)，跟住有職員嚟接待，原來先要洗腳，坐嗰張長椅內有乾坤，打開就係個洗腳盆，佢幫我哋搽番梘摔乾淨再抹乾，俾對拖鞋就可以上樓上o既按摩區啦~F.7暑假嗰年都有係泰國做泰式按摩o既經驗，係呢度都係地下鋪上軟墊，我哋先換好提供o既睡衣褲，按摩師就會嚟服務~我哋今次揀咗草藥球手十女按摩，裡面包含埋泰式按摩了~環境唔算特別好但都ok啦，黑黑的只有柔和燈光，有香香味，然後用簾子隔開一個個客人，我同家姐一夥就冇隔開我哋啦~按摩都好舒服，我不嬲都好鍾意泰式按摩，因為啲passive拉筋好正，幫你拉鬆晒成個人，草藥球都好，不過間中會熱咗少少，同埋會濕濕地囉~整體都好滿意~不過中間有詭異o既事，做做下按摩有聽到細路女o既喊聲囉，明明應該係大人先嚟做按摩o架，後來嗰個帶埋小朋友嚟o既大人客人走時先知道，哦，真係有細路女係度o既，唔係撞鬼…但嗰下真係有啲恐怖囉~今次雖然按摩服務質素都幾好，但並非真係平我哋後來個豪華spa咁多，所以我都建議如果要去按摩，其實都可以索性book啲環境再好啲嗰啲囉~大家記住繼續追個blog，到時大家就可以睇下我哋去嗰間靚spa啦~

出到嚟天黑咯，我哋去MBK逛逛同埋搵食~

果然好似旺角中心，冇之前行嗰幾個商場咁光鮮，而且啲貨品都cheap少少，去泰國買嘢唔係淨係要平嘛，要又精美又平至得嘛，所以吸引力就低少少咯~不過我都有收獲，買咗兩隻cd，好多時去旅行都想買下當地o既流行曲嚟聽下~我本住靚仔唔一定好聽，但唔靚仔一定好聽o既原則揀咗兩隻，其中一隻仲係我哋係鋪頭度睇播緊o既演唱會dvd o既嗰位歌手，俾佢溫柔o既聲線迷到呢~但返到嚟都好少聽呀，day話聽住啲泰文覺得好古怪喎~咁都有o既~

我哋揀咗呢間餐廳食晚飯，佢叫「Yum Saap」，我地叫做做「陰濕」，唔知係咪咁讀呢？應該係泰式快餐連鎖店，我哋係第二度都見過佢~

就係佢﹗Yum Saap~

都好經濟實惠呀，味道都唔錯，不過叫錯咗兩樣一樣味o既嘢~呢個炒雜菜同埋炒媽媽麵o既汁料配菜係一樣的，但都唔怕，多啲菜係好事﹗我特別鍾意佢加咗啲雪耳落去炒雜菜度呢，吸收咗啲汁又仲爽爽地~魚餅同雞肉飯都中規中矩啦，冇話非常大驚喜，但計埋價錢就好驚喜lu~

雖然距離唔遠，但又攰又拎住戰地品，我哋決定搭今個trip o既第一次tuk tuk，果然講價係要試番嚟，都唔係好知價位係點，不過無論點都係水魚x2 o架啦~終於可以入到我哋o既酒店房lu~正常o既新式酒店啦，舒舒服服咁，但家姐非常介意個透明浴室囉，明明我哋都試過肉帛相見咯，落咗個簾透透地光又怕咩呢？結果要搵浴室邊嗰張床盞reading lamp照住堂簾，等佢個影消失佢至放心沖涼~哎吔，我哋第四日去spa時都一齊沖啦~

待續

前往其他泰國旅遊blog