由 Rita 於 2014-07-29 00:00:00 發表 | 累積瀏覽 545
一早編好嘅行程出發前有俾家姐望一望，佢話，咁你幾時去沙灘玩？我一直諗住，沙灘就係旁邊，幾時有時間都可以去啦，唔駛專登編啩？因為佢嘅comment，我諗都係要花多少少時間享受下呢個世界聞名嘅威基基海灘嘅～因為資料唔多，唔知道有冇locker，寄存物品之類，我哋決定行出去海邊視察一下先，反正又烈日當空，之後先返酒店換衫再出去沙灘玩啦～
嘩～又長又闊嘅白色沙灘﹗﹗水清沙幼，踩起嚟都特別舒服～遠處嘅山頭係Diamond Head，我哋之後有攀上山頂丫﹗
美好嘅天氣，美好嘅景色～正﹗呢張相變成我Facebook profile pic了～
威基基海灘總叫人百看不厭，唔同嘅藍色不住的變化，後來我哋搬咗酒店之後我都成日坐露台望下個海～之前去斯里蘭卡旅行都係俾旅遊書入面嘅海吸引住，但turn out天氣唔好，所以心目中嘅印象就大大及唔上威基基啦～(請參閱：15-12-2012：斯里蘭卡day 8(part 1)．海龜大本營．Galle市區走走看)
我哋返去酒店期間入咗一間ABC Store掃貨，呀，之前介紹過ABC Store未？ABC Store係威基基遊客嘅恩物，入面包羅萬有，食嘅、著嘅、旅行時用嘅、紀念品、手信⋯總之遊客想買嘅嘢入面都會搵到，我哋都幫襯過幾次(應該係幾乎日日都幫襯下)，仲購物夠累積嘅額有得換禮物添～我哋主要買買去海灘嘅用品，因為海灘冇locker，我哋買咗個防水小袋子，又買咗個水泡(平過玩具反斗城)～講起防水小袋子，我每一次去海灘or去水上樂園之類都會諗起中山長江水世界嗰個設計優良嘅防水儲物名物﹗因為⋯設計簡單、造型優美、成本低廉﹗(請參閱：1-8-2010：中山即興trip day 2．長江水世界．孫文西路步行街)
另外都行下其他商店，我印象最深嘅係一間賣帽子嘅鋪頭，入去隨便睇下，見幾靚又戴下係頭上，出乎意料之外嘅超級舒服又靚，一睇價錢，US$155一頂帽﹗嚇死人了～當然咁貴唔關我哋事啦，後來再逛其他平民價嘅帽子專門店，果然一分錢一分貨，真係唔同的﹗我係另一間鋪頭買咗頂帽子，但相同型狀嘅我都揀唔落了，因為同貴嗰頂真係差別太大～當然，而家另一款式嘅呢頂我都好滿意，而且闊邊好遮太陽，對於呢個trip嚟講就更有用啦～
返酒店換好泳衣，出發﹗由Aqua Skyline at Island Colony直衝去威基基海灘我哋會經過今朝學跳舞嘅Royal Hawaiian Center，穿過後面就係Sheraton Waikiki，我哋今日通過Sheraton去海灘，影咗呢個靚靚嘅雕塑，另外⋯
逛咗商場嘅商店，認識咗一位夏威夷有名嘅artist－－Heather Brown﹗佢係一位女滑浪藝術家，Sheraton入面有佢嘅gallery，佢嘅畫作令人感受到快樂同幸福，亦會令人愛上呢片土地，如果唔係屋企咁細，我都想帶一張佢嘅作品返嚟香港呢～都有啲印咗畫咗嘅精品售賣，但都唔係太合適，所以，用眼睛欣賞完存放係心入面啦～大家可以睇下Heather Brown嘅網頁，係香港都可以網上購物呢～
http://www.heatherbrownart.com/
我哋經過Sheraton嘅大堂，哇，啲餐廳好靚丫，我哋結婚1000日要唔要嚟呢度慶祝？我心裡面一直念念不忘旋轉餐廳，但海灘餐廳都唔錯噃～
買埋少少飲品我哋就出去海灘了﹗﹗時間晏少少，人更多了～我哋都搵個好位置做基地先～
呢邊好多都係resort嘅專區，啲太陽遮同椅都係for resort嘅住客專用，我哋又想搵個樹蔭，唯有行遠少少啦～
呢度有丁屎咁多樹蔭，就呢度啦﹗我哋輪流吹呀吹，又熱又想快啲跳落水，但吹好至落水又好似好啲，結果我好唔明智地說咗day落水繼續吹，umum⋯淺水區超大浪，有少少狼狽添～
有水泡實在太好了～:p
珊珊嘅Maggie表姐最近去過夏威夷玩，佢極力推介我哋去North Shore嘅一個海灘，因為冇咁多人，仲可以浮潛添，佢哋遇到令人驚喜嘅海洋生物⋯估唔到我哋係超級人多嘅威基基都同樣見到⋯
海龜呀～～～～～～～～大家見到佢嘛？好大隻﹗游得咁近嚇咗我哋兩個一跳呢，又驚又喜～拿拿聲連拍幾張，返嚟至睇下影唔影到～好高興啊﹗
海灘好闊好大，即使好多人都唔會逼～
我哋係個海度，最有趣味嘅就係睇啲人滑浪﹗原本我都有考慮過參加滑浪班，除咗學莉蘿跳呼拉舞之外都學下史迪仔滑浪丫嘛～不過價錢有啲貴之餘，如果只上一堂又唔多花時間練習又好似好浪費，寧願下次spend多時間先嚟個滑浪之旅仲好～威基基真係好多人滑浪，唔同年齡、性別、國藉都有﹗大家好努力游游游游游去深水區等浪，一有個合適嘅浪，就一下子有幾個戰士滑咗出嚟，有啲好勁的可以滑好遠同埋係個浪上面翻騰﹗好好睇～不過原來而家七八月算唔多浪嘅季節，到年尾時浪更大，就有啲國際級嘅滑浪比賽會係度舉行呢～
另外一樣有興趣嘅就係stand-up paddling，好似比滑浪容易少少(？﹗)，呢對couple似乎兩份租咗一set用具嚟玩，睇落都唔似經驗玩家，我估都要有啲技巧同體能至玩到，平衡啦，點樣應業啲浪啦，個佬就玩得好過女子了～
我都想曬少少，主要遮住塊面啦～呵呵～同好多陽光與海灘嘅地方唔同嘅係，威基基好多滑浪愛好者～
滑浪者與美女～
係美國呢個自由嘅國度，我都唔怕解開比堅尼帶子曬曬個背脊，原本呢日係威基基曬得好均勻，又冇曬傷，點知之後就失守了，去Diamond Head嗰日曬咗吊帶背心嘅印都不特至，最慘係斜揹袋嘅粗帶子，去水上樂園著另一套粗帶嘅bikini，又曬出其他嘅痕，一團糟，返嚟香港再慢慢褪色會好樣少少⋯
我哋後尾換咗另一個大樹蔭嘅位就更舒服了，day放肆地瞓一覺，我就享受住海風睇書，非常好～
我哋返酒店沖個涼再出嚟搵食，見到有間餐廳大排長龍，有咩咁巴閉？﹗見到係「丸龜製麵」我哋就好開心了，yeah，唔駛排﹗我哋屋企樓下都有一間﹗
偶然發現呢個靚靚嘅建築物，原來呢個叫做「國王村」嘅shopping mall旅遊書都有介紹呢～
可惜商店就冇乜睇頭，有部份範圍都荒廢咗添～不過呢，好多間餐廳都好熱鬧～我哋揀咗一間日本料理﹗
係日本人開嘅餐廳，叫做Odoriko，非常正宗，我食咗清新嘅三文魚茶漬飯，day就食咗天婦羅丼，至於有美國色彩嘅就係沙律同埋照燒雞，個雞嘅美國色彩係⋯超大portion﹗我哋一度考慮要唔要打包返酒店，而家又有雪櫃又有微波爐我哋真係有能力咁做﹗不過我個茶漬飯又真係清啲，而day去親旅行時食量都大增，結果我哋都食清光﹗全部食物味道都好好，係啲沙律有少少怪味菜，我就差少少鍾意啦～
King’s Village嘅網址：
http://www.kings-village.com/夜裡，同一個雕塑加埋火把，氣氛就唔一樣了﹗
待續
前往其他美國旅遊blog
============================================
感謝 Rita 提供以上資料
Rita的網誌: http://www.wufamilyblog.com/~rita/
============================================
累積瀏覽 247280
全部攻略 705
全部回應 10
