7-2-2011：USA trip day 6．與康熊貓聚聚舊@Japan Town & Muir Woods

嚟到呢度，又進入行程o既第三個階段﹗第一階段就係Las Vegas啦，第二階段就自己玩San Francisco啦，而家嚟到第三階段，我哋同康熊貓聚聚舊，佢會帶我哋周圍去玩﹗而且係充滿住神秘感+驚喜o既行程呢，全權由康熊貓決定，我哋無論去到邊都會好高興o架~

首先我哋約咗朝早十點左右係San Francisco o既Stratford Hotel pick up我哋，不過佢搵呢個地方都花咗少少時間，而且又塞車，所以我哋碰面o既時間都晏晏地lu~我哋直奔去食lunch o既地方~康熊貓帶咗我哋去Japan Town食嘢~

我問佢呢啲盛開o既粉紅色小花係咪櫻花，佢話係cherry blossom，咁即是係櫻花啦﹗估唔到去到加州都會見到櫻花呢~咁我哋四月會去日本影婚紗相嘛，希望影櫻花，但睇過今年o既櫻花開放預測報告，好似會比起我哋去o既日子早開花呢，唔知到時狀況如何，而家唯有咁諗啦，去到California都睇咗櫻花咯，去日本有冇都唔緊要啦…(雖然心底裡面唔係咁諗…都係好想有盛放o既櫻花…)最多咪key美國啲櫻花上去啲相度囉…

我哋揀咗商場入面o既日本菜嚟食，叫咗兩個定食三個人share，哇，好精緻呀，味道都好好﹗yummy~又有得飲下湯同飲下茶~真好﹗

我哋係Japan Town個商場隨便逛咗一陣鋪頭，就出發去今日o既主打景點—-Muir Woods了﹗

康熊貓較好個GPS導航系統就出發咯~架車行行下時佢有欲言又止o既樣子…後來我見到附近o既景物，我問佢：「咦，我哋會唔會經過金門大橋o架？」佢就答我：「就係我都唔知會唔會經過，我都唔敢講你知住呀﹗」跟住GPS咁行，yoyoyo~我哋真係會經過呀，忽然間變得興奮起來呢~(笨蛋﹗咁都好興奮…哈哈~)

所以要影下呢張興致勃勃o既相﹗

不過呢張就影條橋影得清楚啲喇﹗

康熊貓開頭講話去「紅樹林」同埋「行山」，我心裡面就幻想住水邊、矮矮o既樹木、招潮蟹…後來去到先知道，原來係紅木樹林(redwood forest)，所以景色應該係深山之中，有高高o既樹木至啱~:)

http://www.nps.gov/muwo/index.htm

係大門口影張招牌相先﹗全靠自拍王~

Muir Woods National Monument已經set up係度保護個樹林有103年歷史啦，大家都可以好方便咁嚟親親大自然~

呢啲redwood可以長到好大o架，你睇啲年輪﹗上面嗰一個個細牌仔就對應番嗰條年輪同人類歷史o既大事件﹗呢棵樹有接近1000年咁老lu~

可以見到好老好老好巨o既大樹﹗

好﹗我哋上山去~雖然冇完備o既行山裝束，但呢條路都好平易近人o既，所以雖然我哋平時咁少運動，都可以輕鬆應付到~呢度都有幾條track可以揀﹗不過其中比較長嗰條有一截維修中，咁費事又要行番回頭路啦，我哋揀咗呢條行啱啱一個圈的~

係高高o既樹林之中，顯得我哋好渺小呢~

咁專注影緊啲乜？

我哋沿路見到好多色彩繽紛o既菇菇，根據小學o既教育，長得越鮮艷o既菇菇就越…毒﹗莫非我哋見到咁多毒菇？﹗有紅色、有橙色、有黃色﹗但好似卡通片入面紅色底有白波點嗰啲Mario菇菇就見唔到~

哇，參天古木﹗

呢啲樹榦雖然幼，但咁密咁多都好壯觀呢~

唔係我咁大力~我冇破壞大自然呀﹗呢度自然倒塌o既樹都唔會搬走佢o架，會由得佢自然腐化，咁就可以「化作春泥更護花」啦，不過呢，佢哋都會顧及到遊人o既安全o既~

呢個樹洞大到可以住個人入去﹗不過我哋影呢張相時就冇小動物走出嚟~:p

巨﹗

去到souvenir shop，有好多用redwood製成o既木木紀念品呢，我都買咗兩張木製postcard寄番嚟俾爹媽同埋家姐姐夫~好有特色呢﹗

晚飯康熊貓帶咗我哋去一個華人mall食咗上海菜，味道都好好，食咗冬瓜竹筍火腿湯、鎮江肴肉、小籠包、鹹湯丸、炒飯~個鹹湯丸都幾特別呢，皮就係平時熟悉o既湯丸皮，而裡面就包住啲豬肉，我都係第一次食呢~

食飽飽之後康熊貓帶我哋去鋪頭﹗係佢之前做intern o既時裝精品店，叫做anthropologie~

http://www.anthropologie.com/anthro/index.jsp

呢個櫥窗就係佢一手一腳整o架啦~不過聽番佢講，有啲花花已經跌咗落嚟…oh no no~

入到去間鋪頭就叫人開心得不得了，因為裡面好cosy，貨品亦好精美，除咗有賣衫之外，仲有好多生活精品雜貨，廚具、餐具、床上用品、書本、傢俬都有，而且樣樣都好靚~可惜唔帶得佢哋番屋企啦，價位太高了﹗一條連身裙要大約US$200呢，不過佢成功o既地方係，即使啲東東賣得咁貴，大家齋睇唔買都可以好輕鬆咁係入面參觀喎，可能因為售貨員唔會俾壓力大家啦，而且燈光柔和，又播住啲輕鬆o既音樂，又俾大家係鋪頭裡面影相喎﹗呢間鋪頭實在太好了~呢度亦係俾artist好好發揮o既地方，佢哋o既一張枱、一個櫃、一件實物原大o既擺設都係artist一手一腳製作﹗good~

我哋之後就番去康熊貓屋企sleep sleep lu~仲有一件高興o既事﹗就係餓咗兩日上網o既我終於可以開下facebook，炫耀一下去旅行o既少少相片﹗呵呵~(high咗~雖然已經番咗嚟一個月﹗)

待續

前往其他美國旅遊blog

============================================

感謝 Rita 提供以上資料

Rita的網誌: http://www.wufamilyblog.com/~rita/

============================================