27-7-2014：加州婚禮+夏威夷day 2(part 3)．珊珊big day之Bay Area臨海晚宴

坐住明明嘅車一直行，慢慢到咗海邊，晚宴嘅地點－－東海海鮮酒家～咦？美國都有東海？係咪香港嗰間嚟㗎？酒樓係一間一層嘅平房，一入到去就要，「哇～～～～美國人駛唔駛識歎成咁？﹗？﹗？﹗」

酒樓闊闊嘅落地玻璃，外面馬上就係海邊了﹗﹗﹗

時間尚早，我哋出去逛逛海邊先啦～

珊珊嘅朋友們係度幫手佈置影相用backdrop，都係同一個雀仔主題呢～

酒樓外觀～

今日天氣以加州嚟講雖然特別熱，但海邊海風大，好在帶咗披肩出嚟啫～天色好嘅話，呢度可以望到Bay Area嘅唯一入口－－金門大橋㗎～我哋上次嚟三藩市時，都有坐船遊過金門大橋呢～(請參閱：6-2-2011：USA trip day 5(part 2)．華盛頓廣場、bay cruise、金門大橋、漁人碼頭)

沿住海邊有唔少人帶狗仔散步啦、緩步跑啦、仲有釣魚﹗我哋見有個人用舊好大嘅魚餌，我真係好好奇究竟佢目標嘅係咩魚？要成粒壽司咁大嘅魚餌⋯咁係咪會釣到有成條手臂咁長嘅大魚呢？當然唔係打機，梗係冇咁快上釣啦～

我哋頭先由酒樓裡面望出嚟嘅玻璃就係呢一排窗子了﹗

行行下見到珊珊、Bill同兄弟姊妹們係度影緊相呢，我都湊熱鬧影一張先～

我哋隨意散步時忽然有位女士主動話幫我哋影合照呢，真熱情～今個美國trip都遇到好幾次呢啲情況喎，係咪美國人主動啲又友善啲？謝謝啊～兩個人去旅行都少啲靚靚合照，自拍嘛又影到個頭好大成日遮住啲景，自拍王嘛，又未必時時搵到啲距離啱又平嘅面去放相機喎～

返到酒樓，欣賞下珊珊佢哋嘅engagement photos先～

回禮小禮物﹗我最喜愛嘅⋯係上面珊珊親自設計嘅貼紙丫﹗

backdrop佈置好了﹗搶先合照咗先～

晚宴正式開始啦，我哋歡迎一對新人進場﹗

最近去香港嘅婚宴，opening都好standard，切餅、合巹交杯、錫錫、致詞，原來美國佢哋興敲打杯子要求錫錫的，而且成個婚宴不限次數﹗﹗﹗新人要賓客滿意高興，要落力啲咯～呵呵～

我哋呢圍枱基本上同尋晚嘅famiy dinner陣容差不多，都係同明明朋友同仔仔、珊珊契媽、珊珊表哥坐，不過今晚就多埋表哥嘅太太同仔仔，兩位姊妹就唔一齊坐，大家冇咁陌生，都可以吱喳一下，加上契媽同我爹媽一樣都係退休教師，話題都多啲～氣氛好還氣氛好，始終人數少又有小朋友，美國雖然10人一圍枱，但食物portion比起香港12人嘅好似仲要巨，我哋開頭全力食，後尾就無以為繼⋯魚都淨係食到一啖，雞簡直夾唔到，飯我都冇掂過⋯其實食物樣樣都好好味㗎～

我哋個位係正通道口，次次進場都正好有個靚位捕捉佢哋～yeah～珊珊兩套晚裝都好靚呀～

結婚蛋糕都係雀仔theme～

酒樓個大玻璃應該係睇到日落的，但日落個太陽太猛，所以之前一段時間反而落咗簾，後尾我哋忙住食食食都冇再理過個view，後來曲終人散時再出去窗後望望，已經變成Bay Bridge嘅夜景啦～可惜能見度唔夠高，睇唔到金門大橋～多謝你哋嘅招待啊～今次嚟參加你嘅婚禮我哋都好開心呢﹗

待續

前往其他美國旅遊blog

============================================

感謝 Rita 提供以上資料

Rita的網誌: http://www.wufamilyblog.com/~rita/

============================================