5-2-2011：USA trip day 4(part 2)．NBA球賽呀﹗Let’s go WARRIORS~

講真，其實今次去美國西岸o既地方基本上以前都有去過，Las Vegas就十幾年前同屋企人去啦，而San Francisco其實2006年時都有去過，咁當然啦，今次同day去，感受都好唔同o既，不過另一樣嘢，令今次個trip增加好多令人期待o既感覺﹗

因為係香港時，我忽然諗起，不過我哋去美國時去睇NBA啦﹗一個我自己都好滿意o既提議呢~知道Oakland o既主隊係Golden State Warriors，就去佢哋個網頁度搵下賽程啦﹗其實係呢個之前我哋都未聽過Warriors o架，我哋逗留係San Francisco呢段時間，可以睇到對Chicago Bulls或者對Phoenix City Sun，因為我哋會將後半截o既時間留俾朋友康熊貓，所以就決定去睇2月5號o既Chicago Bulls了﹗

對Warriors毫無認識，我哋又決心呢場波一定要捧Warriors，主場喎~於是上網買飛嗰日我同day講：「我哋由今日開始要做Warriors o既fans呀﹗」說時遲，那時快，馬上就見到佢like咗facebook入面Warriors個page﹗哈哈，自此以後，我哋就有Warriors最新o既消息啦，係唔認識佢哋任何一個球員情況之下，我哋會討論，「呀，尋晚贏咗波﹗」「哎吔~輸咗俾xx添~」~真係好傻瓜~不過我都有請教過我姐夫，佢都簡介過Warriors隊波俾我知~

Warriors o既主場可以搭BART去到，叫做Oracle Arena~我哋提早咗去到呀，諗住可能要搵一搵個地方啦，二來要購物呀，既然做得fans，梗係要著番件Warriors衫啦~

去到時，哇~個黃昏好靚呀~啲顏色簡直好似砌圖o既畫面﹗

行得近少少就睇得清楚啲了，亦開始見到Warriors o既banner~沿路比較靜，而且有啲黃牛黨係度兜售門券，有啲驚驚地~

好喇﹗我哋去到時換領咗入場券先~我哋坐203段…即是…山頂位﹗實質有幾遠都要入到去至知呀~其實NBA啲飛都幾貴，最貴可以去到US$400，我哋嗰張票價就US$36(都唔平o架)，加埋其他雜項都要超過US$40﹗

我哋去主隊紀念品店度都逛咗唔少時間，因為產品款式實在太太太多了~最後我揀咗一件寫住Warriors大隻字係心口o既有帽藍色外套，男裝啲外套款式有少少誇，唔適合第時成日著，所以day就揀咗件平實少少只有logo係心口o既灰色tee，都好靚﹗因為係adidas家嘛，所以件tee o既cutting都好好~

yeah﹗我哋o既戰利品﹗

入到場搵個洗手間換咗件衫先~時間尚早，唔怕唔怕﹗

入場時有工作人員派咗一人一份「場刊」，對我哋嚟講都好重要啊，

唔知點解，其實未嚟過睇NBA o架，但唔知點解硬係覺得要食爆谷同埋熱狗﹗於是坐低之後就叫day去買個爆谷嚟食呀~

個店員交個爆谷俾佢時，佢嚇咗一跳﹗佢拎個爆谷上番嚟時，我又嚇咗一跳﹗哇，乜咁大o既？﹗後來返嚟香港去睇戲，發現係UA戲院呢，最大嗰款爆谷都只係呢個o既三分之一size左右~真係好誇張呀﹗

雖然早咗入場，呢度顯示咗，仲有48分鐘先開場﹗不過都有唔少球迷提早入場lu~點解？

因為有好多嘢睇﹗

例如有球員出嚟練下波啦~

又有band o既音樂演出啦~

又有DJ捽碟啦~真係一定唔會悶親你﹗

臨近開場lu~大家都作最後準備﹗

例如拉下筋啦~

開波之前梗係要隊場擲下公、字之類，睇下邊個開波之類咁啦~呢個著10號衫o既球員叫做David Lee，聽講佢都幾出名o架，但今場佢真係打得認真麻麻地，又唔放膽射波，射又唔中，連罰球都係每兩球入一球咋~哎吔吔~

正式開波之前，全部觀眾都起立，要唱國歌，我以為唱國歌係好莊嚴o既部份，點知有呢個金髮女子領唱，而大家又唔會跟住唱o架喎，而佢唱得嚟又太過賣弄歌藝，我唔鍾意囉~我覺得唱國歌唔一定要好聽，但一定要認真~

yoyoyo~開波lu~金州勇士主場對戰芝加哥公牛﹗

入場時都真係好浮誇，因為係主場，所以warriors有好多工作人員，舉住啲旗呀，又有啲好強勁節拍o既音樂，加埋spotlight咁出場，勁呀﹗主場o既氣勢果然犀利﹗

開波lu~

其實Warrior girls都係我哋期待o既一環，知道有啦啦隊o既演出，之前上網睇過，好似真係好靚好惹火喎，而且佢哋仲會出泳衣月曆﹗Warrior girls o既第一套衫都幾sexy o架~小bra top + 小熱褲﹗而且啲舞好勁、好professional~佢哋出場唔單止係中場休息，連教練叫o既暫停都會出嚟一陣﹗

球賽之間真係好多表演睇，包你冇悶場囉~呢度就有啲小伙子表現跳彈床入樽絕技﹗而且仲係三個人一個series咁o既合作﹗我用連拍去影佢哋都影唔晒添呢~

我哋兩個都唔係好識籃球，唔係咩特別fans，不過都好想感受下現場氣氛﹗主場o既氣勢勁起上嚟真係會勢如破竹，好似進攻o既時候，大家就會一齊叫「Let’s go Warriors﹗」，防守時大家會一齊叫「Defence﹗Defence﹗」，heehee，頭頂嗰個screen會好似卡啦ok咁提示你﹗:p唔怕跟唔上~

如果自己嗰隊入波，就會好瘋狂咁歡呼吶喊啦，人哋嗰隊入咗波就當冇事發生過咁，而人哋嗰隊射罰球o既話，待遇就更差了，未射波就俾人喝倒采…陰公咯~我最鍾意睇自己嗰隊入三分波，因為個大電視上面會有個animation公仔係度跳3-point dance，幾棧鬼~

Warrior girls又出場lu，今次換咗衫添~後來佢哋換咗第三套衫，係最classic o既啦啦隊衫，帶埋啦啦球出嚟~

其實仲有好多其他嘢o架，我都post唔晒咁多相﹗好似有生日message啦，係過場時個大電視會有啲祝賀某某球迷o既message，所以去睇NBA慶祝生日的話都幾熱鬧，咁多人都知你生日了﹗另外跳舞o既演出，除咗最省鏡o既Warrior girls之外，仲有一堆小女孩又跳啲hip-hop，都幾好睇，另外又有一啲阿太級o既女士，呢個就冇咁精彩了~

中間又有啲Warriors o既人出嚟搞下氣氛，好似會派pizza啦，送出一啲漢堡o既coupon啦，又有用啲槍去「射」啲T-shirt俾啲球迷啦，一直都keep住好熱鬧~

我哋睇呢場波過癮o既除咗球賽刺激、互有攻守，又有現場氣氛+其他o既演出之外，有一樣重要o既嘢就係我哋前面嗰排坐咗一班後生仔，坐最右嗰個係Warriors o既fan，而坐最左嗰個就係Bulls o既fan，佢哋係自己嗰隊領先時又揶揄下對方咁，雖然唔聽得明晒佢哋講乜，但見到估到咩事~

yeah yeah yeah~ Warriors最後贏101比90呀~good呀﹗不枉我哋咁努力同佢加油~好在揀咗呢場嚟睇咋，如果揀咗幾日後對Sun嗰場o既話，輸波可能就會一遍愁雲慘霧，咁就冇咁興奮了~到咗最後五分鐘左右，未完場，啲球迷就開始離場啦，可能見勝負已定吧，我哋就撈埋汁至走~

走時都係坐番BART出番去San Francisco，都幾多人坐呢~

我哋因為食咗個巨巨巨爆谷，都唔太餓，所以係酒店對面買咗一個Burger King o既餐嚟share，食埋我哋係唐人街時買o既水果，咁都差唔多了~

入到睡房…

哇~~~~~~雖然房間比較細，但好靚喎，好溫暖家居o既feel，而且都好舒適，浴室都好好~我已經係Tripadivisor度寫咗review，大讚特讚一番了﹗大家如果去San Francisco自遊行，我都介紹住呢間Stratford Hotel，地點勁方便啦，就係Powell Street，好近Union Square，又近BART站，cable car就係酒店前面經過﹗而且又包早餐，價錢亦相宜~非常好﹗

待續

前往其他美國旅遊blog

============================================

感謝 Rita 提供以上資料

Rita的網誌: http://www.wufamilyblog.com/~rita/

============================================