4-2-2011：USA trip day 3(part 2)．華麗酒店群@the strip, Las Vegas

係Las Vegas，最多賭場酒店嗰一條大直路一般稱為「the strip」，而Luxor幾乎已經係strip o既一端了，更加端端o既就係Mandalay Bay酒店，因為我哋要去睇Shark Reef，所以都行咗過去~

金光澄澄o既Mandalay Bay酒店~入面都好華麗呢~

亭園都好有歐洲宮庭感覺，所以我哋都帶埋兔子去影下「婚紗相」﹗

因為實在太太太豪華了，酒店賭場裡面勁大囉，我哋跟住個指示牌行行行行行都未去到Shark Reef，都花咗唔少時間呢~

Shark Reef以「酒店入面o既水族館」就算係好大規模了，但以一個「水族館」嚟講就唔算特別精彩啦~記得上次2006年時康熊貓珊珊帶我去Monterey o既Aquarium就好睇得多了~仲有鎮館之寶水瀨添﹗

Shark Reef Aquarium @ Mandalay Bay

有個池可以摸摸啲魔鬼魚，有啲鱉(個殼硬的)都可以摸，但見到佢哋個樣咁惡，我都唔敢摸呢，淨係夠膽摸落去軟綿綿呢啲~

好喇﹗之後我哋就直接搭巴士過去MGM了，因為時間都比較趕呢，唔知CSI要玩幾耐~

之前講嗰啲巴士都幾方便，係條大街度啲車站都好近有一個，而且巴士都幾密﹗

MGM Grand果然grand，連個招牌都咁大咁光﹗不過最誇o既係…

真係下巴掉咗落嚟，居然酒店入面係賭場中間養咗三隻代表住MGM o既獅子囉﹗個「動物園」都幾寬敞，佢哋住得好鬆動，而且好似都幾舒服喎，可能因為有空調，比起一般室外o既動物園嚟講，呢三隻獅子都幾活潑添，又會轉身，又會玩玩具﹗勁﹗可能習慣了吧，玻璃牆外面咁多人望住佢哋都神態自若呢~

嚟MGM Grand o既一大重點﹗就係去玩CSI: The Experience~

有三個scenario可以揀，我哋揀定咗一個兇殺現場，係一個年輕女子伏屍係motel外面o既停車場，我哋首先要去「案發現場」搜證，有張工作紙，我哋要填上係個案發現場有咩發現，例如我哋要畫低地下有啲咩呀，死者有咩隨身物品下之類~之後嗰part我哋就要「化驗」每一樣證據喇，不過成本問題吧，其實好多都用電腦去做，唔係真係咁套取指摸o既~都有好多個station，好似電子搜證啦(即是搵番死者個手機入面o既sms)、指摸、屍體上面嗰隻蟲、DNA、毒品、車軚痕，最後有驗屍﹗都幾有趣o架~最後我同day都成功搵到兇手，仲有張紀念証書添﹗不過要實物要俾$$，所以我哋要咗電子版証書，返嚟屋企可以print~

好喇﹗要繼續進發了去下一站了﹗之前有朋友介紹過去Bellagio食buffet，day同同事之前都去過，都覺得好值得同我再去，正好朝早淨係食咗個brunch，留咗肚子去食buffet了~

經過啲酒店當然都要趁機影下相啦﹗因為真係好浮誇~

其中一間勁誇o既都算係New York New York﹗真係整到成個Manhattan咁﹗好多高樓堆埋一齊，以「仿帝國大廈」為首，仲有個自由神像~最犀利o既係，佢唔係紙板囉，而係真係每一楝building都係酒店房嚟o架﹗靚~

另外Excaliber以城堡做外型都好搶鏡﹗不過因為唔係真係住係城堡入面，相對地就好似冇咁興奮了~

我呢個準新娘子，見到啲婚紗都比較敏感一啲~heehee~

嚟到lu嚟到lu~

Bellagio冇浮誇o既外型，而係走正統o既歐洲式華麗路線﹗入到去裡面o既感覺都係，「呢啲就係真豪華喇」，真係好靚，好舒適，但唔會令人覺得不安，非常好﹗Bellagio最吸引人o既，當然係佢超級大o既音樂噴泉show啦，我哋經過旁邊呢條路時，就啱啱撞正表演一次，我哋都企係度欣賞咗一陣，讚嘆不已，好宏偉、好壯觀、好浪漫~食飽飽之後出嚟，我哋搵個靚位又再欣賞﹗

對我同day嚟講，Bellagio o既fountain show都有少少特別意義，之前去睇香港話劇團o既演出「我愛阿愛」，主角個第三仔就講過佢係Bellagio o既往事，形容個噴泉「一高一低、一收一放…blablabla~」，background music就係啲意大利文o既歌，印象好深刻，所以今次嚟Las Vegas都話一定要去睇下呢個fountain show囉~

呢個位置望過去Paris Hotel都好靚喎~又有鐵塔，又有凱旋門﹗嚟Las Vegas真係好似環遊埋世界呢~(要投入啲就有呢個effect﹗)

好lucky呢，去Bellagio食buffet唔駛等位~入座前就埋咗單先，連小費都include埋入去了，非常好﹗相對於而家係香港食親buffet幾乎都要>$300嚟講，呢個US$35左右o既buffet都算好抵食lu~

食物選擇都好多呀﹗每款試少少都唔得掂~香港人所喜愛o既「貴價嘢」之中，有無限量供應o既長腳蟹囉，真係幾鮮美，不過我都要留肚食其他嘢~其中好好味o既有蝦cocktail啦，有個烤銀鱈魚都好正﹗唔知點解戰鬥力咁薄弱，食冇乜幾多碟就勁飽啦~哎吔吔~可能啲食物比較膩吧~

撞啱有對新人係度食嘢~新娘子o既婚紗有條紅色邊，唔係香港見慣o既款式，但都幾靚喎~Las Vegas結婚真係好方便囉，每間酒店都有間chapel，而且標榜「no blood test, no waiting time」，所以一日就可以成功註冊，難怪咁多人係Las Vegas閃電結婚囉，我諗Bellagio又可能當中更受歡迎吧，咁豪華咁靚~

食飽飽我哋出番去搵個靚位欣賞噴泉﹗每15分鐘一次show，每次一首歌o既時間，我哋計埋食飯前嗰次，總共睇咗四次﹗

真係睇幾多次都覺得好震憾、好靚、好浪漫~同啲音樂絲絲入扣囉~頭三首歌係流行曲，最尾嗰首居然就係「我愛阿愛」嗰首呀~非常好~

其實今次去Las Vegas都覺得中國人o既影響力都幾大，適逢農曆新年，周圍都有過年o既裝飾呢~不過嘛…

究竟有冇中國人做藝術指導呢？點解農曆新年又關兵馬俑事呢？點解又會有個香爐，而且仲要放係財神爺後面？點解又有啲錢放係個香爐度？真係莫名其妙﹗總之就係所有中國theme o既嘢都出齊晒嚟啦~

係Bellagio入面迷路…

哇~經過佢哋開conference o既地方，真係好華麗，我講咗好多次，呢啲就係真高級了，高級得嚟唔俗氣~所以要同兔子影張相呀﹗

都攰lu~我哋行番出去大街影埋「凱旋門」同埋Caesar Palace就去搵車搭lu~又係搭番嗰架巴士﹗

天黑lu~番到去金字塔Luxor，day話，頭頂發光係咪要呼喚外星人？﹗哈哈~

我又影番一張先﹗click番上一篇，有「天光版」o既呢張相﹗heehee~

待續

前往其他美國旅遊blog

============================================

感謝 Rita 提供以上資料

Rita的網誌: http://www.wufamilyblog.com/~rita/

============================================