9-11-2013：西班牙day 10．西班牙足球的皇者風範@Madrid

嚟到旅程o既最後一日，只剩一個上午，我哋下晝就搭飛機走啦~我哋從針織畫廠同皇家馬德里球會主場之中挑選，最後足球場當選﹗事不宜遲，要快啲出發，因為唔知入場有冇限時限刻呢，如果要你十一點至入場咁就趕唔切lu~所以早餐都唔食就拿拿林去咗買門券先~

到咗皇馬主場Estadio Santiago Bernabeu，非常近地鐵站呢，比起上次去巴塞個主場簡單得多了~而且近地鐵站出口嗰度好快亦清晰見到買飛o既人龍~見人唔係太多係前面，未開始賣飛，我哋都唔敢行開去搵食了，萬一返嚟好長龍咪弊囉~

所以我哋餓住肚子，捱住寒冷天氣排隊…今日天氣都幾凍呢，睇過預報好似一早一晚去到負o既度數，不過西班牙o既天氣真係同香港好唔同，我哋係西班牙12至20度一直著o既衫，係香港我係16-22度左右著囉，真係冇香港咁凍﹗﹗所以我哋帶去o既羽絨、仲有幾件冷衫一次都未著過呢，反而啲短袖tee就有用嚟打下底~

之前買咗o既postcard終於有機會寄啦~不過結果都係只寄咗俾爸媽咋~本來都仲有一張寫番俾我哋自己，但我哋邊排隊時先邊寫，到走時唔記得咗寄喎，所以原封不動帶番返嚟香港囉~

球場外當然唔少得呢啲賣紀念品o既攤販啦~不過俾著我要買都係去專門店買~

仲未開始發售入場券，我哋都排住隊先，排隊時寫住postcard先，不過我哋最後唔記得咗寄出呢張俾自己o既postcard呢~
係西班牙，好多時都見到呢啲賣獎券o既人，乜真係咁多人買獎券？同埋兜售獎券真係可以維生？

yeah，買到入場券lu，每張門券都有唔同o既球星呢~而張介紹小冊子打開嚟都係一張小poster嚟o架，對於fans嚟講都已經係好好o既souvenir lu~

係搵早餐食同埋入場之間，我哋都係揀咗入場，諗住裡面可能都有餐廳小賣部之類呢~所謂o既Bernabeu Tour，其實係一條已經規劃好o既參觀路線，跟住個指示牌一站一站咁去參觀，而並非有個人帶住你行o既tour，一入場首先要搭好多層扶手電梯，因為…

第一站係panoramic view，可以鳥瞰整個球場﹗

俾我o既第一印象，呢度冇巴塞o既Camp Nou咁大，不過就新淨啲~我o既觀感都冇錯喎，客觀資料顯示，Camp Nou容量係99786人，而Bernabeu就85454人，所以香港大球場o既四萬幾人容量去比就真係好小型o既球場了~

我哋就係跟住呢啲指示牌行啦~

講起西班牙足球，基本上就係講緊皇馬同巴塞之爭了，呢度顯示咗皇馬係過去百幾年入面o既威水戰績，冇贏嗰啲？恐怕就係巴塞o既天下啦~

呢個展館非常豐富，集合古典與現代於一身~

點解現代？因為有好多多媒體o既資料囉，click邊個錦標，邊個年份，可以睇番當年精彩片段，非常自助~

點解古典？因為有過百年o既實物展出，由球衣到足球到波boot到獎座都有﹗我終於知道點解波boot叫波boot了，原來以前o既球鞋真係boot o既形態﹗

同埋原來以前皇馬唔叫皇馬，見到1920年開始個黴號先至有個皇冠o架咋，就係嗰段時間皇室賜俾佢皇家馬德里呢個稱號﹗

呢度係VIP包廂，唔，俾我就寧願同大伙兒一齊坐都唔坐私人包廂喇，係出面氣氛一定好好多~

呢度有好一大部份係呢個Ferenc Puskas球員o既個人展覽，我本身都唔識得呢個傳奇人物呢，原來呢位匈牙利o既球員以頗大o既年紀先加入皇馬，但佢做就咗非常多o既入球，二十年o既職業球員生涯為各個球會總共入咗五百幾個入球，好驚人o既數字﹗

http://en.wikipedia.org/wiki/Ferenc_Pusk%C3%A1s

呢個tour係參觀之中，有兩站設有影相station，都估到係同你影完相之後要俾$$買嗰啲啦，但都認真影下啦，其中一張係捧住獎盃影，另一張搞鬼啲，係自己同藍色background影，原來你可以揀你喜愛o既球員同佢「合照」呀，我同day都揀咗卡斯拿斯，不過價錢真係太貴，而且我哋黃種人同Casillas合成得唔係太自然，冇啲鬼嗰啲效果咁靚，所以忍痛冇出手咯~

之後落去靠近草地o既貴價區~

如果係呢啲位睇波實好正~

Real Madrid CF

仲可以試下坐下球員席呢~感覺…好似坐飛機嗰啲位~

呢邊貴價區啲椅係靚啲o既梳化椅，唔知點解觀眾席o既地仲鋪咗人造草地添~

最後一站，記者室~

請大家繼續支持球隊~

結束前梗係唔少得紀念品店啦，球衣太貴了，唔捨得買…

唔捨得買張合照…我哋自製一張﹗

紀念品店有三層呢，大過巴塞嗰間﹗﹗

係球場外面有呢啲著住球衣o既卡通人，相信係自雇人士，佢哋都好落力兜生意~

結果我哋都係餓住肚子參觀完，但係繼續時間op-so，所以返酒店拎行李就直接去機場至搵食啦~好在可以搭地鐵去機場，雖然都要轉轉車，但機場線有扶手電梯o既機率提高咗，咁都冇咁辛苦~以前就見過人哋啲行李有保鮮紙包住，原來係咁樣o既服務嚟o既~

結果過晒關先搵咗麥當勞嚟食，食多一次最後o既1955堡同埋McRib至走~本來時間都好似幾鬆動，我哋買埋最後o既西班牙火腿至去登機閘，但我哋去到閘口，oops，點解一個人都冇？﹗連原來o既閘口都冇標示話改咗閘口喎，我哋半跑半行咁要去另一個wing至搵到登機閘，好在冇變另一次機場客運站啫~(請參閱：14-4-2012：首爾濟州櫻花遊day 7．笨蛋的奇遇)

嚴格嚟講今次個trip仲有day 11，因為確實我哋10-11-2013至返到屋企，不過今次o既flight同轉機都冇乜特別事情喇，所以今次o既blog就到呢度結束了~多謝收看~因為係西班牙都買夠，結果day 1見過o既阿拉伯糖果對我哋嚟講都冇乜吸引力了，下次真真正正去卡塔爾旅行時至買啦~

西班牙之旅完滿結束

前住其他西班牙旅遊blog

============================================

感謝 Rita 提供以上資料

Rita的網誌: http://www.wufamilyblog.com/~rita/

============================================