8-11-2013：西班牙day 9(part 3)．健力士最悠久餐廳Botin@Madrid

不得不獨立俾一篇blog呢一餐飯，之前都唔係未試過，當然，要達到我心目中呢個地位，係質素上都要好有水準至得o架~未睇呢篇blog前，可以去下其他我給予同等地位o既進餐experience o既blog~(請參閱：25-11-2009：大阪白浜day 2(part 3)．回味無窮松阪牛燒肉、26-5-2013：釜山麗水day 2(part 3)．高雅又清新的韓式套餐)

我哋係酒店稍稍休息一陣，亦等之前係Mercado de San Miguel食過o既立雜嘢落咗隔先，再慢慢步得出番嚟，去我哋今晚o既重點項目—-Restaurante Botin~

要去Botin，要行番過去頭先去過一次o既Plaza Mayor，因為係由嗰邊一條小路通過去o既~唔知Plaza Mayor有咩function搞呢，排咗咁多椅子係度~

途中經過呢間名為火腿博物館o既鋪頭，雖然叫博物館，其實係一間售賣林林總總火腿o既專門店，入面亦有少量餐點供應~

非常壯觀o既火腿s~

到啦到啦﹗呢間就係Botin餐廳了~

http://www.botin.es/

其實我哋向來都好少跟旅遊書特別去搵乜搵乜食，但今次點都要跟一跟，因為Botin係全世界最古老o既餐廳，已經納入咗健力士世界紀錄大全啦~1725年就開業o既餐廳，經歷咗兩次世界大戰，經濟上o既起起跌跌，到今時今日依然屹立不倒，一定要睇下佢o既成功之道~

不過係入去之前，首先要睇下食唔食得起，望一望餐牌，貴就肯定貴o架喇，不過以我哋當係特別紀念日去睇(雖然今日確實唔係咩紀念日)，價錢都可以接受o既，人一世物一世(去旅行時所有消費o既解釋…)，去吧~咦，click番入去個網，原來有得睇menu，但係冇show價錢，detail我都唔係好記得，但好似為起上嚟每人400-500港紙埋單？

門口有餐廳模型，有三層，通常旅遊書都會影佢地牢嗰層好似洞穴餐廳咁o既照片，但我哋坐o既位置唔係呢度show出嚟呢，點解？

健力士o既證書都放咗出嚟，童叟無欺﹗

我哋話兩位，之後有服務員帶位，以為跟住前面一組人我哋都坐樓上，點知，別有洞天﹗哈，個侍應拉開堂簾，經過廚房，去咗一個小偏廳，嗰度大概放咗六張枱左右，裝修都四四正正，但佢o既入口…要經過廚房﹗﹗點解係世界最悠久o既餐廳都有創發(我工作附近o既一間茶餐廳)o既VIP房o既？﹗

雖然係廚房後o既VIP房，但一啲都冇待慢啲客人，有個waiter專門負責我哋呢幾枱客人，而且非常殷勤呢~三百年老店果然係三百年老店，waiter制服都係正式的白西裝~

因為唔想太大鄉里，用個大相機咔唰咔唰，所以用電話影咋，係暗暗環境像素低少少將就下吧~ :p

見咁高興，day都話飲sangria，咁我諗我一個人叫半pint，兩個人叫一pint啦，點知，好似多咗啲bor~呢度個壺好靚呢~

實在唔知食物size點樣，除咗呢度必食o既名菜烤乳豬之外，我哋叫咗一個沙律，一個side dish菇菇，同埋多一個主菜，食住先睇下點啦~因為根據香港人o既固有觀念，貴o既餐廳一般都係越貴越細份o架啦~不過原來有例外o既…

呢個係Ensalada Botin，即是自家招牌沙律，表面只係將唔同o既材料堆埋一齊，但呢個簡單o既沙律就見證咗Botin o既功力﹗入面每一樣食材都非常新鮮，而且味道彼此牽連滲透，好好味丫~

呢個就係我先一晚講過o既煮磨菇了，呢度用新鮮磨菇，但調味上真係同尋晚嗰間罐頭磨菇係一樣的﹗我都話咯，牛油、蒜蓉、金華火腿，就咁食鹹咗少少，如果配白飯就正咯~

墨汁小墨魚配白飯，中規中矩有實力o既一道主菜~

我哋叫o既係半隻烤乳豬，其實食之前咕嚕，中國人o既乳豬咁好味，你哋鬼佬真係整得好味過我哋？﹗我抱住半信半疑o既心態去叫呢個咁貴o既乳豬~上菜了﹗原來此乳豬不同彼乳豬，我哋廣東人食o既乳豬食佢o既脆皮為主+濃厚o既豬肉味，但西方乳豬原來食o既係肉質o既嫰滑juicy~難怪可以各有千秋啦~好味，以味吉陽一o既講法，肚餓係最好o既調味料，而我哋呢一刻已經飽到八八九九，依然感受到佢o既美味，所以真勁﹗不過叫我頭痛o既係嗰兩粒薯仔囉，真係冇位放落去…早知唔叫個菇菇啦~

今次day真係好有義氣，陪我飲多啲sangria~上次係Sevilla時佢都冇盡力~識佢o既人知道，佢飲少少就會好快變紅+醉，今次佢難得地紅咗+迷糊咗之後，休息一陣，醒番，再嚟過，夠義氣啦啩~不過我哋最終都飲唔晒嗰pint呢~醉都唔係問題，而係太飽啦~

所以好遺憾地，雖然甜品menu好吸引，但我哋無能為力啦~下次啦~

令人滿足o既一餐﹗大家下次嚟西班牙旅行，記得嚟呢間Botin餐廳試下呀~

晚上o既皇宮~

又係火腿？點解day可以攬住佢？因為其實係攬枕﹗﹗我真係估唔到究竟有咩人會想買隻火腿返屋企攬呢？

充滿垃圾o既馬德里，好啦，我原諒你啦，都係因為罷工先至咁污糟o既啫~

聽日就係西班牙之旅o既最後一日啦，大家要繼續留意啊~

待續

前住其他西班牙旅遊blog

============================================

感謝 Rita 提供以上資料

Rita的網誌: http://www.wufamilyblog.com/~rita/

============================================