7-11-2013：西班牙day 8(part 4)．溫暖的鬧市hostel．最後tapas衝刺@Madrid

為咗令時間冇咁趕，所以早少少去到火車站至搵食，開頭我哋都係火車站一間餐廳坐低咗，但見大大間鋪得兩個waitress係度做嘢，而且周圍啲食完走咗o既又未執枱，想埋單o既又未埋到單，我哋兩分鐘之後都係決定起身，與其食得咁急個心咁煩，不如都係食得自在啲，所以食咗…

登登﹗麥當勞﹗﹗yeah~~~而且係西班牙專有包包呢，day揀o既1955堡係似至尊漢堡嗰啲有大片肉+大量蔬菜，我o既McRib就似豬扒包，但肉質比較細緻，醬汁似招財福堡，都幾好味，所以後來食多次麥當勞我哋兩個都揀番同一個包呀~

三個鐘左右都到馬德里lu~落車係Charmartin站，我哋離開月台落咗隧道，諗住跟住地鐵站個logo行就ok，點知去到地鐵站，點解要嘟出站o既？明明我哋o既車票冇得嘟o架喎~今次係我西班牙文大派用場啦，但只限短句+單字跌出嚟，問個車站職員我哋冇得嘟點算，哈，解決方法原來係佢開個閘俾我哋過囉~一出嗰個閘就係地鐵站售票大堂，真係唔知點解會咁~

呢部售票機叫我激氣咗一陣，話說我哋打算買10程券，但佢會限住你唔准入某啲大幣值o既紙幣，而你俾緊部份錢時，更多o既幣值唔准入，變成鬥智遊戲，咁我唔係全部幣值都有嘛，莫非係佢冇錢找？但又冇啲唱錢機係附近喎~

馬德里果然係馬德里，地鐵靚好多，比起巴塞隆拿o既要新淨，我哋坐時都讚嘆咗一番﹗

今次訂o既旅館係Main Street Madrid Hostel，都係經agoda.com訂，貪佢地點方便，睇落又靚靚地咁，就係地鐵站Callao旁邊，不過第一次到時個門牌唔係太明顯，要小心搵至搵到入口~我形容我哋住係重慶大廈，因為Main Street Madrid Hostel位於舊樓o既5樓，入口簡直就似商住大廈，有個古老o既更亭同電梯~上到五樓，深嚴o既鐵大門唔通窿，如果唔係一早已經預約，係唔會夠膽盲中中按門鐘入住的﹗

http://www.mainstreetmadrid.com/index_EN.html

當然，入到去就豁然開朗啦，reception只係一個小counter，但走廊同房間都係明亮o既藍色白色做主題，而且都唔細喎，條走廊好長，再轉彎夾埋都有十幾間房~帶大家參觀下我哋o既房間啦~

新淨o既裝修佈置，同網頁一模一樣，仲有towel art歡迎你，而且係女孩子喜歡o既設計呢~

麻雀雖小，五臟俱全，沖涼都舒舒服服，要彈o既係浴簾短咗少少，水濺晒出嚟~

呢個就係我講o既深嚴大鐵門喇﹗原來入住時除咗有自己房鎖匙之外，仲有大門鎖匙同埋大樓鎖匙(即「重慶大廈」鎖匙)，所以係全自助的﹗

要特別介紹下部電梯，大家見到o既係舊式自助開門o既電梯…

而且勁細小﹗﹗只能放三個人or兩個人+行李﹗令我諗起當年係印度住咗好耐o既Pals Hotel呢~(請參閱：23-4-2008：難得搏盡的一天)

好，雖然都入黑，但時間有限，點都要出下去，決定今晚去Sol廣場逛街﹗﹗地鐵咁近真好~

出番嚟大城市lu~

人多到咁？原來有示威~

原來有示威~

亦因為有示威，有啲Sol廣場應該要睇o既嘢都見唔到…>_<"例如我哋冇見到「零公里」牌，原來呢度係全國國土o既中心，所有西班牙地方o既距離o既起點~Sol廣場應該就似Time Square吧？旅遊書話跨年倒數都係度舉行的~

雖然只係十一月頭，但都開以籌備聖誕佈置了~

兩個「雕塑」，一真一假~

我哋呢兩個外國人都係唔太慣夜得交關o既西班牙晚飯時間，所以開始晚市我哋都會盡快想食嘢~都冇prep到附近有咩餐廳要食，我哋隨便揀咗Sol附近呢間Cfeteria Restaurante Arenal~

點解？因為佢外面有呢張大tapas poster﹗差唔多到旅程o既尾聲，有啲未食o既經典tapas要係走之前試一試，我哋係度指指點點，要食埋邊款？

入面係好舊式o既餐廳feel，呢度係唔係西班牙o既波士頓餐廳？不過到我哋食完都唔係好多客人呢…似乎唔係太旺o既餐廳~ :p

右邊呢四款其實都係想趁臨走之前要試o既tapas，右上o既青口啦，呢個最好味，酸酸凍凍o既青口好醒胃，我都有係腦海度想像過睇下可唔可以返香港模仿到…右下o既煮磨菇都係經典，但有少少失望呢，因為係罐頭磨菇…我哋聽晚去咗間超勁餐廳，唔小心又點咗呢個菜，係新鮮菇不過味道都係一樣﹗想像到可以用牛油+蒜蓉+西班牙火腿炒就係嗰個味了(係香港就可以用金華火腿代替，反正煮熟咗o既質感分別唔太大~)﹗上中o既叫俄羅斯沙律，好似都係經典tapas，對我哋嚟講都係熟悉口味o既蔬菜薯仔沙律啦~下中o既叫croqueta，應該就係翻譯做可麗餅或者可樂餅吧，就係炸薯餅入面有啲肉碎芝士咁啦，好在只係一人一粒，因為味道都幾濃~左上o既sangria係今個trip o既尾二一杯sangria啦，機會無多，要好好珍惜~左下o既係普通o既烘三文治，因為怕只食tapas唔夠飽而叫的，哎吔，後悔中，因為有麵包贈送…

之後去行街街，入咗一楝有幾層高o既商店，好似有成三四層都係賣聖誕裝飾禮品﹗我都係度買咗個聖誕樹掛飾俾爹媽~

係呢度見到個超勁o既馬槽﹗﹗

逛街當然唔少得去超級市場啦~不過呢度啲嘢就冇去韓國時咁啱買啦~(請參閱：29-5-2013：釜山麗水day 5(part 2)．買手信去．期待已久的Spaland)買咗少少罐頭tapas、橄欖咁，唔敢買火腿住，因為酒店房冇雪櫃，打算臨尾至買~

又係好勁o既火腿部﹗我哋係西班牙時周圍食乜食貴食平都會加啲火腿入去，以為係大眾食物，但去到超級市場至知一pack扁平的都要7歐羅左右，覺得都貴貴地，我哋係機場買o既10歐羅一pack，返嚟香港係吉之島發現要二百幾蚊﹗﹗難怪我同事話我哋係機場買嗰啲都抵~我真係唔知價錢呢~

對我哋嚟講，橄欖咪橄欖囉，最多可以分為黑色定青色，係呢度至知，全個櫃廿幾款都係唔同o既橄欖﹗﹗犀利呀~有得買黑飯汁同海鮮飯汁呢，但都冇買呀，可能覺得返嚟都未乜會煮吧，都講得啱o既，上次去曼谷啲咖喱同冬陰公調味包都未煮﹗﹗:p(同埋個blog 都未打好，完西班牙要打番…)

後來超級市場趕人走我哋先走﹗:p真係唔好意思呢~

待續

前住其他西班牙旅遊blog

============================================

感謝 Rita 提供以上資料

Rita的網誌: http://www.wufamilyblog.com/~rita/

============================================