7-11-2013：西班牙day 8(part 3)．華麗與血腥的鬥牛場@Sevilla

離開阿卡乍堡我哋要即刻去Sevilla最後一個景點鬥牛場了，之後就要趕下午o既火車返馬德里啦，距離話近唔近話遠唔遠，係Santa Cruz邊緣、河o既旁邊，如果唔迷路的話步行大概15-20分鐘啦，好在今次我哋都順利去到~

鬥牛場o既外觀﹗

買好票~之前睇旅遊書話冇鬥牛o既日子去參觀的話只可以去博物館，冇得睇場館內部，其實期望唔大，但買票時話一定要參加guided tour，咦，咁係咪即係可以去鬥牛場裡面參觀呢？

冇錯﹗有個導遊小姐迎接我哋一行十幾人o既團入內，佢問大家講西班牙文定點，當然有我哋呢啲外國人係度佢唔可以全西班牙文啦，所以基本上每個point係講完西班牙文再講英文，哈，英文學就學咗廿幾年，但原來佢毫無先兆轉channel的話都唔係馬上catch到佢講咩，所以要超級留心~其實英文講解都幾清楚，但有個團友好似係意大利人，成日都人哋講完一次之後又用意大利文發問，搞到個導遊小姐都躁躁地，佢用英文講：「我唔可以每次都用意大利文再講一次o架~」哇，佢連意大利文都識，勁﹗

一開始tour先入鬥牛場，哇，好大丫~我哋先聽講解再影相，主要都係講下鬥牛o既歷史啦，場館o既detail啦等等~

呢邊呢個包廂係皇室專用﹗貴族都唔可以坐o架~

有幾條通道可以通進「戰場」，其中當然有鬥牛勇士出場o既地方、牛出場o既地方，原來有一條通道係通去手術室o架﹗我哋未嚟參加都知道鬥牛係好危險、好血腥同埋好高死亡率o架啦，但唔知原來有on-site手術室添，原來鬥牛勇士比賽前要見定醫生、簽定手術同意書、配定血，當定每一次都有機會會重傷需要急救做手術囉，做呢度o既外科/骨科醫生真係好大壓力好緊張~所以我後來都問導遊小姐，既然咁危險，點解而家都仲有人入行呢？原來佢哋覺得好光榮同埋贏咗會有好多$$的~

之後我哋入去博物館參觀﹗呢幾幅畫介紹咗鬥牛o既過程，首先會有副手同隻牛鬥到佢少少損傷+激嬲隻牛先，之後主角o既鬥牛勇士就有三次機會去殺隻牛，一定要一刺刺中後頸o既要害先為之高水準，如果刺三下隻牛都唔死咁鬥牛勇士就輸啦，牛如果唔死亦唔需要再參加鬥牛了~咁當然好少情況會係咁啦~

牛頭標本~

古代o既鬥牛係冇鬥牛場的，就咁係市集空地舉行，所以更加危險，後來為咗安全理由先興建鬥牛場~

樂隊

如果係後背/後頸直接插入牛心臟，令佢即刻死亡的話，咁就屬於高水準演出了，但我睇wiki講其實多數插唔中，都係插咗入肺，先隻牛慢慢失血至死~

華麗o既鬥牛服裝，但多數都會染有鮮血…

呢個係鬥牛勇士出場前去o既小教堂，佢哋會祈禱，祈求平安同埋勝利，但呢啲嘢邊有得祈o架丫~

呢度係放鬥牛同埋馬o既地方~

tour結束，呢度係多年來o既鬥牛比賽o既poster~紀念品唔太吸引所以都冇買丫~

真係好在呢個季節冇鬥牛睇，我唔駛心大心細，不過我估我都係唔會睇o既多啦，因為太殘忍、太暴力、太恐怖呀~

我哋要回程返酒店拎行李再call的士去火車站啦，原本有諗過係途中食埋個lunch，但諗諗下都係唔敢，因為西班牙人太慢，如果為咗個飯走咗班火車就si cal cal，所以都係去火車站先咯~要同Sevilla呢啲窄窄街道道別咯~

待續

前住其他西班牙旅遊blog

============================================

感謝 Rita 提供以上資料

Rita的網誌: http://www.wufamilyblog.com/~rita/

============================================